Opetaia 1 - Ai Vola Tabu (Vakadewa Makawa Vakavoutaki 2021)（FRV21）

1Na raivotu nei Opetaia.

Ena Vakamalumalumutaki ko Itomi ena Vuku ni Nodra Viavialevu

Sa kaya vakaoqo na Turaga ko Jiova e na vuku i Itomi:

E dua nai rogorogo eda sa rogoca mai vei Jiova,

ia sa dua na mata sa talai ki na veimatanitu:

“Dou tucake! Me da mai tucake me veivaluti kaya!”

2Raica, au sa vakalailaitaki iko e na kedra maliwa na veimatanitu:

ko sa beci vakalevu.

3Sa vakacalai iko na viavialevu ni lomamu,

ko iko ka tiko e na qara ni uluvatu,

ka sa cecere na nomu i tikotiko,

ka sa kaya e lomamu,

“O cei me na kauti au sobu ki na qele?”

4Kevaka ko tiko vakacecere me vaka na ikeli,

ka viritu na nomu sova e na maliwa ni kalokalo,

ia ka'u na kauti iko sobu mai keri,

sa kaya ko Jiova.

5Ke ra lako mai vei iko na daubutako,

ka lako mai e na bogi na daubutako

—na sala ni nomu vakarusai!—

era na sega li ni butakoca ga na ka e rauti ira?

Ke ra lako mai vei iko na dauveti vua-ni-vaini,

era na sega li ni vakavoca eso na vua-ni-vaini?

6Na kena qarai na ka nei Iso,

sa qarai e na nona yasana vuni!

7Era sa lawakitaki iko ko ira kece na nomu i to

ka kauti iko vakaukauwa ki nai yalayala ni vanua;

era sa vakaisini iko ka rawai iko, ko ira na wekamu;

ko ira era kana vata kei iko era cakava nai cori e rukumu—

ka sa sega ni kilai vakarawarawa.

8Me'u na sega li ni vakarusai ira tani na tamata vuku mai Itomi,

kei ira na yalomatua mai na ulunivanua nei Iso e na siga ko ya?

A sa kaya ko Jiova.

9Ka ra na taqaya na nomu qaqa, ko iko Temani,

me ra dui vakamatei mai na ulunivanua nei Iso ka oti kece kina.

Na Vuna e Cudruvi kina ko Itomi

10E na vuku ni nomu i valavala kaukauwa vua na tacimu ko Jekope,

ko na luvuci sara e na madua,

ia ko na muduki laivi ka tawa mudu.

11E na siga ko sa tu tani kina,

na siga sa vakabobulataka kina na nona mataivalu ko ira na kai tani,

ka ra curu ko ira na meca ki na nona matamata-ni-koro,

ka vakawiri madigi kei Jerusalemi,

ko iko talega ko sa vaka e dua vei ira.

12Ia mo kakua ni vakaraica na kena siga na tacimu

e na siga sa yacovi koya kina na ka tani;

mo kakua talega ni marau

ni yaco na ca kivei Juta e na siga ko ya;

mo kakua talega ni vosa vakaviavialevu

e na siga era rarawa kina.

13Mo kakua talega ni curu ki na nodra matamata-ni-koro na noqu tamata

e na siga era ca kina;

io mo kakua ni vakaraica na nodra rarawa

e na siga era ca kina;

mo kakua talega ni kovea na nodra i yau

e na siga era ca kina;

14 Aisea 34.5-17; 63.1-6; Jere 49.7-22; Isi 25.12-14; 35.1-15; Emo 1.11,12; Mala 1.2-5 mo kakua talega ni tu e na basoga ni sala

mo muduki ira na kai nona era dro bula;

mo kakua talega ni soli ira na kai nona sa vo

e na siga era rarawa kina.

Na Siga i Jiova vei Ira na Veimatanitu

15Ni sa voleka mai na siga i Jiova vei ira kece na veimatanitu.

Ka me vaka na ka ko sa cakava, ena caka vakakina vei iko;

na kemui sau ena lauta na ulumu.

16Me vaka dou a gunu e na noqu ulunivanua tabu,

era na gunu kece tiko vakakina na lewe ni veimatanitu;

io, era na gunu ka tiloma sara,

ka ra na yaco me vaka era a sega ga.

Na Rawati ni Qaqa vei Ira na Isireli

17Ia e na Ulunivanua ko Saioni ena tiko na kena vo era dro bula,

ena yalosavasava talega;

ia na vale i Jekope ena taukena na nodra vanua.

18Ia na vale i Jekope ena yaco me bukawaqa,

kei na vale i Josefa me yameyame ni bukawaqa,

kei na vale i Iso me vu-ni-sila;

era na vakawaqa ka vakayavuna,

ena sega talega e vo vei ira na vale i Iso;

ni sa tukuna na ka oqo ko Jiova.

19Era na taukena na ulunivanua i Iso ko ira mai na mata ni ceva,

kei ira mai na buca era na taukena na kai Filisitia;

era na taukena talega na veiwere nei Ifereimi, kei na veiwere mai Samaria,

ia ko Penijamini ena taukeni Kiliati.

20Ia ko ira sa bobula vei ira na mataivalu oqo na Isireli,

era tiko vata kei ira na kai Kenani, ka yacovi Sarifaci;

kei ira era sa bobula vei ira na kai Jerusalemi era tiko mai Sifarati,

era na taukena na veikoro e na mata ni ceva.

21Era na lako cake mai eso na dau veivakabulai ki na Ulunivanua ko Saioni

me lewa na ulunivanua i Iso;

ia na matanitu ena qai nei Jiova.