1Sa qai vosa ko Sofa na kai Neama, ka kaya,
2“Me sega beka ni saumi yani na vosa e vuqa,
se me vakadonui beka na tamata dauvosa?
3Me ra tiko lo beka na tamata e na vuku ni nomu lasu,
ka me sega beka ni vakamaduataki iko e dua ni ko sa ia na veivakaisini?
4Ia ko sa kaya, ‘Sa dodonu na noqu i vakavuvuli,
ka'u sa savasava talega e na mata ni Kalou.’
5Ia me vosa mada na Kalou,
ka dolava na tebenigusuna vei iko,
6ka vakatakila vei iko na ka vuku e vuni tu!
Ni sa levu cake, ka lailai na kena sa kilai.
Mo qai kila ni sa ka lailai e taroga vei iko na Kalou
ka levu cake na nomu i valavala ca.
7“Ni ko sa dikeva, ko na kilai koya rawa beka kina na Kalou?
Ko na kilai koya deivaki rawa sa Kaukauwa?
8Sa cecere cake vei lomalagi—a cava ko na cakava?
Sa titobu cake vei Bulu—a cava ko na kila?
9A kenai vakarau sa balavu ka lekaleka ko vuravura,
ka sa rabailevu cake mai na wasawasa.
10Kevaka sa lako tu ka sogolatia,
ka vakasoqona vata, ko cei me tarovi koya?
11Ni sa kilai ira na tamata lasulasu;
sa kunea talega na caka ca, ia ena sega beka ni vakanananu kina?
12Ni sa viavia vuku na tamata lialia,
ia ka sa sucu ga me vaka na luve ni asa kila.
13“Kevaka ko sa vakarautaka na yalomu,
ko na dodoka na ligamu vei koya.
14Kevaka sa tu na ca e ligamu, mo biuta vakayawa,
ia me kakua ni tiko nai valavala ca e na nomu veivale.
15Ni ko na qai ta cake ka na sega ni tauvi duka na matamu;
ia ko na tudei ga, ka na sega ni rere.
16Ni ko na guilecava na nomu vakaloloma;
ka dau nanuma kina ni sa vaka na wai sa lako tani yani.
17Ia na nomu bula ena uasivi cake mai na rarama ni siga levu;
ko na cila yani, ko na tautauvata kei na kida ni mataka.
18Ia ena tiko dei na lomamu, ni sa nuitaka na vinaka;
ia ko na vakararai voli ga, ka koto sobu e na vakacegu.
19Ia ko na koto sobu, ka na sega e dua me vakarerei iko;
a ra na vakamasuti iko na lewe vuqa.
20Ia ena oca wale na matadra nai valavala ca;
ena yali na nodra i drodro,
ia na nodra i nuinui sai koya me ra ciba yani.”
Who We AreWhat We EelieveWhat We Do
2025 by iamachristian.org,Inc All rights reserved.
