Sere i Solomoni 4 - Ai Vola Tabu (Vakadewa Makawa Vakavoutaki 2021)（FRV21）

1Raica, ko sa matavinaka, na wekaqu;

raica, ko sa rui totoka!

Na matamu sa vaka na mata ni ruve

ka sa ubi tu.

Na drau ni ulumu sa vaka na qele ni me,

sa gole sobu mai na Ulunivanua ko Kiliati.

2Na batimu sa vaka na qele ni sipi yalewa sa kotivi,

ka sa lako cake mai nai silisili;

era sa dui vakaluveni drua yadua,

ka sa sega ni dua vei ira me sega ni vakaluveni.

3Na tebenigusumu sa vaka na wa kulakula,

a sa dau kilikili na nomu vosa.

A nomu kanavalavala sa vaka na tiki ni pomekaraneti

sa ubi tu.

4Na domomu sa vaka na vale-cecere i Tevita,

sa tara me vale ni yaragi;

ka dua na udolu nai sasabai sa rube kina,

na nodra i sasabai kecega na qaqa.

5Na sucumu ruarua sa vaka e rua na dia lalai,

erau drua,

ka rau kana voli e na maliwa ni viavia.

6Ka'u na lako mada yani ki na ulunivanua ni mura,

kei na ulu-ni-koro ni drega boi vinaka,

ka yacova na kena kida na mataka,

ka sa seavu yani na malamalawa.

7Ko sa matavinaka sara, na wekaqu;

sa sega na tikimu e ca.

8Daru mai lako vata tani e Lepanoni, na watiqu;

daru lako tani e Lepanoni.

Mo rai tu mai na dela i Emana,

mai na dela i Siniri kei Erimoni,

mai na nodra qara na laione,

mai na nodra ulunivanua na lepate.

9Ko sa rawa na lomaqu taucoko, na ganequ, na watiqu;

ko sa rawa na lomaqu taucoko e na dua na matamu,

e na dua nai taube ni domomu.

10Sa ka vinaka sara na nomu loloma, na wekaqu, na watiqu!

Sa vinaka cake sara na nomu loloma ka ca na waini,

kei nai boi ni nomu i lumu e na kau boi vinaka kecega!

11Na tebenigusumu, na watiqu, sa tiri me vaka na qa-ni-oni;

na oni kei na wai-ni-sucu sa no e ruku ni yamemu;

ia nai boi ni nomu i sulu sa vaka na kenai boi ko Lepanoni.

12A were sa viribaiti tu na wekaqu, na watiqu,

a mata-ni-wai sa sogo, nai vurevure ni wai sa dregati.

13A nomu i teitei na pomekaraneti,

sa kamikamica na vuana;

na kamifaia kei na narita,

14na narita kei na safaroni;

na drove kei na sinamoni,

kei na kau drega boi vinaka kecega;

na mura kei na yasi,

kei na kau kece e boi vinaka sara—

15a mata-ni-wai ni veiwere, ai keli-wai ni wai bula,

kei na wai drodro mai Lepanoni.

16Mo yadra mai, na vualiku;

mo liwa mai, na ceva!

Drau mudre mai ki na noqu were

me tiri yani kina na kena drega sa boi vinaka.

Me lako mai ko koya ka'u sa lomana ki nona were,

me kania na kena vuanikau vinaka.