1“Ni kemuni sa lako yani me vala kei ira na nomuni meca, ka sa raica na ose kei na qiqi-ni-valu, kei na tamata era lewe vuqa, ka lewe lailai koi kemuni, mo ni kakua ni rerevaki ira, ni sa tiko vata kei kemuni ko Jiova na nomuni Kalou, o koya ka kauti kemuni cake mai na vanua ko Ijipita.
2Ia ni kemuni sa la'ki toro voleka ki nai valu, me qai toro mai na bete ka vosa vei ira na tamata,
3ka kaya vei ira, ‘Mo ni rogoca, na Isireli, kemuni sa toro ki nai valu edaidai vei ira na nomuni meca. Me kakua ni waicala na yalomuni, mo ni kakua ni rere, ni kakua tale ni sautaninini, ni kakua talega ni domobula e na vukudra,
4ni sa lako vata kei kemuni ko Jiova na nomuni Kalou me vala kei ira na nomuni meca ka totaki kemuni, ka me vakabulai kemuni.’
5Me qai vosa vei ira na tamata ko ira na turaga-ni-valu, ka kaya, ‘Ko cei vei kemuni sa tara e dua na vale vou, ka sa sega ni curuma? Me lesu ko koya ki na nona vale, de mate e nai valu, ka sa curuma na tamata tani.
6Se ko cei na tamata sa tea e dua na loga-ni-vaini ka sa sega ni bau kania na vuana? Me lesu ga ko koya ki na nona vale, de mate e nai valu, ka qai kania na vuana na tamata tani.
7Se ko cei na tamata sa veivosaki kei na dua na yalewa me watina, a sa sega ni kauti koya? Me lesu ga ko koya ki na nona vale, de mate e nai valu, ka qai vakawati kaya na tamata tani.’
8Ia me ra vosa tale vei ira na tamata ko ira na turaga-ni-valu, ka me ra kaya, ‘Ko cei vei kemuni sa rere ka sa waicala na lomana? Me lesu ga ko koya ki na nona vale, de waicala na yalodra na wekana me vakataki koya.’
9Ia ni ra sa vosa oti na turaga-ni-valu vei ira na tamata, me ra qai lesia na komada ni mataivalu me liutaki ira na tamata.
10“Ni ko ni sa toro voleka ki na dua na koro me veivala kaya, mo ni qai kacivaka kina me sautu.
11Ka kevaka sa vosa vinaka mai vei kemuni ka me sautu, ka sa dolava na koro vei kemuni, me ra qai nomuni qali na tamata kecega era sa tiko kina ka ra na qaravi kemuni.
12Ia kevaka sa bese ni sautu kei kemuni, ka sa bolea ga me vala kei kemuni, mo ni qai bukuya na druadrua ni koro ko ya.
13Ka gauna sa soli ira kina ki na ligamuni ko Jiova na nomuni Kalou, mo ni qai yavita na kena tagane kecega e nai seleiwau.
14Ia ko ira na yalewa, kei na gone, kei na manumanu e yavai va, kei na ka kecega sa tiko e na koro, io na kenai yau kecega, mo ni tokitaka me nomuni. Ka mo ni marautaka nai toki mai vei ira na nomuni meca, o koya sa solia vei kemuni ko Jiova na nomuni Kalou.
15Mo ni kitaka vakaoqo ki na veikoro kecega sa tiko vakayawa sara vei kemuni, era sa sega ni koro ni veimatanitu oqo.
16Ia me baleta na koro ni veimatanitu oqo ka sa solia vei kemuni ko Jiova na nomuni Kalou mo ni taukena, mo ni kakua ni qai vakabula tale e dua na ka sa cegu tiko.
17Mo ni vakarusai ira sara—ko ira na Itaiti, kei na Amoraiti, na kai Kenani, kei na Perisaiti, na Aivaiti, kei na Jepusaiti—me vaka sa vakaroti kemuni ko Jiova na nomuni Kalou,
18me ra kakua kina ni vakavulici kemuni me kitaka na nodra ka vakasisila kecega era sa kitaka ki na nodra kalou, mo ni kakua kina ni valavala ca vei Jiova na nomuni Kalou.
19“Ni kemuni sa buku druadrua ni dua na koro ka sa dede, ni ko ni sa kaba tiko, mo ni kakua ni vakacacana na kena kau sa dauvua. Ni ko ni na kana rawa kina, ia mo ni kakua kina ni taya sobu. Era sa tamata li na kau ni vanua me sa buku na druadrua mai vei kemuni?
20Ia na kau ga ko ni sa kila sa sega ni daulaukana na vuana mo ni vakacacana ka taya sobu, ka mo ni ia kina na viri bai ki na koro sa veivaluti kei kemuni, me yacova ni ra sa vakamalumalumutaki.
Who We AreWhat We EelieveWhat We Do
2025 by iamachristian.org,Inc All rights reserved.
