1 1Samu 10.1 A sa kaya vei Saula ko Samuela, “A sa talai au ko Jiova me'u lumuti iko mo nodra tui na nona tamata, ko ira na Isireli; ia mo rogoca mada oqo na vosa i Jiova.
2Lako 17.8-14; Vrua 25.17-19Sa kaya vakaoqo ko Jiova-ni-lewevuqa, ‘Au sa nanuma tiko na ka era kitaka vei ira na Isireli ko ira na Amalekaiti, ni ra sa saqati ira e na sala ni ra sa lako cake mai Ijipita.
3Ia oqo mo lako ka la'ki ravuti ira na Amalekaiti, ka vakarusa na ka kecega sa tu vei ira; mo kakua ni lomani ira, ia mo vakamatea ruarua na tagane kei na yalewa, na gone lailai kei koya sa dramidrami, na bulumakau kei na sipi, na kameli kei na asa.’ ”
4A sa soqoni ira vata na tamata ko Saula, ka wiliki ira mai Tilaimi, e le rua na drau na udolu nai valu sa taubale, ka le tini na udolu na tamata ni Juta.
5A sa lako mai ko Saula ki na dua na nodra koro na Amalekaiti, ka wawa koto e na buca.
6A sa kaya vei ira na Kenaiti ko Saula, “Dou lako tani, lako sobu mai vei ira na Amalekaiti, de'u sa vakarusai kemudou vata kei ira; ni dou a caka vinaka vei ira kecega na Isireli ni ra sa lako cake mai Ijipita.” A ra sa lako tani na Kenaiti mai vei ira na Amalekaiti.
7A sa vakadrukai ira na Amalekaiti ko Saula, mai Avila ka yaco ki Suri, ko ya sa donui Ijipita.
8Ia ko Ekaki na nodra tui na Amalekaiti, sa taura bula ko koya, ka vakarusai ira laivi na tamata kecega e nai seleiwau.
9Ko Ekaki, kei ira na sipi vinaka, kei na bulumakau, kei na manumanu uro, kei na luve ni sipi, kei na ka kecega sa vinaka, sa vakabula ko Saula kei ira na tamata, ka sa sega ni vakamatei ira laivi. Ia na ka kecega sa vakasisila ka sega ni yaga era sa vakarusa sara.
Veivutunitaki na Buli nei Saula me Tui10A sa lako mai na vosa ni Kalou kivei Samuela, ka kaya,
11“Au sa veivutuni ni ka'u sa buli Saula me tui, ni sa vuki tani ko koya me kakua ni muri au, ka sega ni vakayacora na noqu vosa.” A sa rarawa ko Samuela, ka sa tagi vei Jiova e na bogi taucoko.
12Sa qai sou e na mataka lailai ko Samuela me la'ki tavaki Saula, ka sa tukuni vakaoqo vei Samuela, “Sa lako mai ki Kameli ko Saula, ka raica, sa vakaduria e dua na nona i vakananumi, ka sa lako voli yani, ka lako sobu ki Kilikali.”
13A sa lako mai kivei Saula ko Samuela, ka sa kaya vua ko Saula, “Me vakalougatataki iko ko Jiova. Au sa vakayacora na vosa i Jiova.”
14Ia sa kaya ko Samuela, “Oi, ka qai cava na nodra tagi na sipi oqo, kei na domo ni bulumakau ka'u sa rogoca?”
15A sa kaya ko Saula, “Era sa kauti ira mai vei ira na Amalekaiti; ia ko ira na tamata era sa vakabula na kena e vinaka duadua vei ira na sipi kei na bulumakau, me ra vakacabora vei Jiova na nomu Kalou; ia na kena vo keimami sa vakarusa laivi.”
16A sa kaya vei Saula ko Samuela, “Wawa! Me'u tukuna mada vei iko na ka sa kaya vei au e na bogi ko Jiova.” A sa kaya vua ko koya, “Mo tukuna mada mai.”
17A sa kaya ko Samuela, “E dina ga ni ko sa ka lailai ga e matamu, ia ko a sega li ni buli mo nodra turaga na veiyavusa i Isireli? Sa lumuti iko ko Jiova mo nodra tui na Isireli.
18Ka sa talai iko ko Jiova e na dua nai tavi mo qarava, ka kaya, ‘Mo la'ki vakamatei ira laivi na tamata ca, io ko ira na Amalekaiti, ka vala kei ira me yacova ni ra sa rusa kece.’
19Ia ka cava ko sa sega kina ni vakarorogo ki na vosa i Jiova? A cava na vuna ko a taura kina nai toki-ni-valu, ka kitaka na ka ca e na mata i Jiova?”
20A sa kaya vei Samuela ko Saula, “Au sa vakarogoca na vosa i Jiova, ka'u sa la'ki qarava nai tavi ka talai au kina ko Jiova, ka'u a kauti Ekaki mai na tui Amaleki, ka'u sa vakamatei ira sara na Amalekaiti.
21Ia ko ira ga na tamata, era sa taura nai toki-ni-valu, na sipi kei na bulumakau, io, na ka talei sa dodonu me vakarusai, me ra vakacabora vei Jiova na nomu Kalou mai Kilikali.”
22A sa kaya ko Samuela,
“Sa vinakata li ko Jiova nai soro kama kei nai madrali,
me vaka sa vinakata ko koya na talairawarawa ki na vosa i Jiova?
Raica, sa vinaka na talairawarawa ka ca na vakacaboisoro,
sa vinaka na vakarorogo ka ca na uro ni sipi tagane.
23Ni sa tautauvata na kena ca ni talaidredre kei na caka-i-sausau,
ia na yalokaukauwa sa ka ca, ka vaka na dauqarava na matakau.
Ni ko sa beca na vosa i Jiova,
sa beci iko talega ko koya, mo sa kakua ni tui.”
24A sa kaya vei Samuela ko Saula, “Au sa cala sara, ni ka'u sa talaidredre ki na vosa i Jiova, kei na nomu vosa, ni'u a rerevaki ira na tamata, ka vakarorogo ki na nodra vosa.
25Ia, ka'u sa vakamasuti iko mo vosota mada na noqu ca, ia me daru lesu vata tale, me'u ia nai soro vei Jiova.”
26A sa kaya vei Saula ko Samuela, “Au na sega ni lesu vata kei iko. Ni ko sa beca na vosa i Jiova, sa beci iko ko Jiova, mo kakua tale ni nodra tui na Isireli.”
271Samu 28.17; 1Tui 11.30,31Ia ni sa vuki lesu ko Samuela me lako yani, sa vesuka ko Saula na bui ni nona i sulu, ka sa kadresu.
28A sa kaya vua ko Samuela, “Sa kaliraka mai vei iko edaidai ko Jiova na matanitu ko Isireli, ka sa solia vua e dua na kai nomu sa vinaka cake vei iko.
29Ia ena sega ni vosa lasu se veivutuni ko koya na nodra Kaukauwa na Isireli, ni sa sega ni tamata ko koya me veivutuni rawa.”
30A sa kaya ko Saula, “Au sa cala sara; ia oqo, mo vakarokorokotaki au mada ga e matadra na nodra qase na noqu tamata, kei na matadra na Isireli, ka me daru lesu mada me'u soro vei Jiova na nomu Kalou.”
31Sa qai lesu tale ko Samuela, ka muri Saula, ka sa ia nai soro vei Jiova ko Saula.
32Sa qai kaya ko Samuela, “Kauti Ekaki mai vei au ki ke, o koya na nodra tui na Amalekaiti.” A sa lako vakayalomamada mai vei koya ko Ekaki. Ni sa kaya ko Ekaki, “Sa takali vakaidina na rarawa ni mate.”
33Ia sa kaya ko Samuela,
“Me vaka sa vakamatei ira na yalewa me ra sega kina ni vakaluveni na nomu i seleiwau,
ena sega ni vakaluveni vakakina na tinamu vei ira na yalewa.”
Ka sa qai tatalaki Ekaki ko Samuela e na mata i Jiova mai Kilikali.
34A sa lako ki Rama ko Samuela; ka sa lako cake ki na nona vale ko Saula ki Kipea.
35A sa sega ni raici Saula tale ko Samuela ka yacova na siga sa mate kina, ia sa lolositaki Saula ga ko Samuela. A sa veivutuni ko Jiova ni sa lesi Saula me nodra tui na Isireli.
Who We AreWhat We EelieveWhat We Do
2025 by iamachristian.org,Inc All rights reserved.
