2 Samuela 18 - Ai Vola Tabu (Vakadewa Makawa Vakavoutaki 2021)（FRV21）

Na Vakadrukai kei na Mate nei Apisalome

1A sa vakarautaki ira na tamata era tiko vata kaya ko Tevita, ka lesia eso me nodra turaga-ni-valu na veiyayaudolu, ka so na nodra turaga-ni-valu na veiyayadrau.

2A sa tala yani na nona mataivalu ko Tevita, e dua nai katolu me liutaki ira ko Joape, kei na dua nai katolu me liutaki ira ko Apisai na luve i Seruwaia, na taci Joape, kei na dua nai katolu me liutaki ira ko Itei na kai Kaca. Ka sa kaya vei ira na tamata ko koya na tui, “Ka'u na lako vata talega kei kemuni koi au.”

3A ra sa kaya na tamata, “Mo ni kakua ni lako yani. Ni kevaka keimami sa dro, era na sega sara ni bau kauwaitaki keimami. Era na sega talega ni kauwaitaka kevaka sa mate e veimama nai wase ni tamata vei keimami. Ia koi kemuni, ko ni sa tautauvata kei na le tini na udolu vei keimami. O koya oqo sa vinaka cake kina mo ni qai vakauta ga mai na veivuke mai na koro.”

4A sa kaya vei ira na tui, “A ka ga e vinaka vei kemuni, ka'u na cakava.” A sa tu kina e yasa ni matamata-ni-koro na tui, ka ra sa curu yani vakayayadrau ka vakayayaudolu ko ira na tamata kecega.

5Ka sa vakaroti Joape kei Apisai kei Itei ko koya na tui, ka kaya, “Mo dou qai tarai koya ga vakamalua, e na vukuqu, na cauravou ko Apisalome.” A ra sa rogoca ko ira na tamata kecega, ni sa vakaroti iratou kecega na kavetani ni valu ko koya na tui e na vuku i Apisalome.

6A ra sa lako yani na tamata ki vanua me ra vala kei ira na Isireli; a sa ia nai valu mai na veikau mai Ifereimi.

7A ra sa moku mai kea ko ira na Isireli ni ra mokuta ko ira na tamata i Tevita, a sa dua kina na moku levu e na siga ko ya, io sa le rua na oba (20,000).

8A sa veiseyaki nai valu e na vanua taucoko ko ya; a ra sa lewe vuqa sa mate e na veikau e na siga ko ya, ka ra sa lewe lailai sa mate e nai seleiwau.

9A sa sota kei ira na tamata i Tevita ko Apisalome. A sa vodo lako ko Apisalome e na meule, ka sa lako na meule e na ruku ni dua na vuni oki levu ka sa levu na tabana, ka sa tao na drau ni uluna e na taba ni oki, ka sa lili toka ko koya e na maliwa ni lomalagi kei vuravura, ni sa lako ga na meule ka vodo tiko kina ko koya.

10Ka sa raica e dua na tamata, ka tukuna vei Joape, ka kaya, “Raica, ka'u a kunei Apisalome ni sa lili toka e na dua na vuni oki.”

11A sa kaya ko Joape vua na tamata ka mai tukutuku vua, “Oi, ko a raici koya! Ka cava ga ko a sega kina ni mokuti koya mai kea ki na qele? Ena ka ni marau vei au me'u solia kina vei iko e tini na tiki ni siliva kei na dua na beleti.”

12Ia sa kaya vei Joape na tamata, “Ni kevaka mada ga ka'u sa rawata e na ligaqu e dua na udolu na tiki ni siliva, au na sega ni dodoka na ligaqu vua na luvena na tui; ni sa vakaroti iko, kei Apisai, kei Itei, ko koya na tui, ni keimami a rogoca tiko, ni sa kaya, ‘Dou maroroya vinaka na cauravou ko Apisalome e na vukuqu.’

13Ia, kevaka ka'u a cakava na ka ca ka vakamatei koya (ka sa sega e dua na ka me vuni vua na tui), ia ko iko ko na qai sega talega ni totaki au.”

14A sa kaya ko Joape, “Au na sega ni vakaoti gauna wale ga vakaoqo kei iko.” Ka sa kauta e ligana ko koya e tolu na moto, ka coka kina na uto i Apisalome ni se bula tiko e na taba ni oki.

15A sa le tini na cauravou eratou daucolata nai yaragi i Joape, eratou sa vakavolivoliti Apisalome, ka mokuta, ka vakamatea.

16A sa qai uvuca na davui ko Joape, ka ra sa lesu tale mai na tamata me ra kakua ni cemuri ira na Isireli, ni sa tarovi ira na tamata ko Joape.

17A ra sa kauti Apisalome, ka biuti koya ki loma ni dua nai keli levu e na veikau ko ya, ka ra sa binia kina e dua nai binibini vatu levu sara. A ra sa dui dro ko ira kecega na Isireli ki na nona vale.

18Ia ni sa bula tiko ko Apisalome, a sa vakaduria cake vua e dua na duru, mai na buca ni tui, ni sa kaya ko koya, “Sa sega na luvequ tagane me nanumi kina na yacaqu.” A sa vakatoka na duru e na yacana, a sa vakatokai, Nai vakananumi kei Apisalome ka yacova na siga oqo.

Rogoca ko Tevita na Mate i Apisalome

19A sa kaya ko Eiimaasi na luve i Setoki, “Me'u cici mada ka tukuna vua na tui ni sa vakabulai koya ko Jiova mai na ligadra na nona meca.”

20A sa kaya vua ko Joape, “Mo kakua ni la'ki tukutuku edaidai. Ko na qai la'ki tukutuku e na dua tale na siga, ia mo kakua ni la'ki tukutuku edaidai, baleta ni sa mate na luvena na tui.”

21A sa kaya vua na kai Kusa ko Joape, “Mo la'ki tukuna vua na tui na ka ko a raica.” A sa cuva sobu vei Joape ko koya na kai Kusa, ka sa cici yani.

22A sa kaya tale vei Joape ko Eiimaasi na luve i Setoki, “Veitalia ga, ia me'u cici muria talega na kai Kusa koi au.” A sa kaya ko Joape, “A cava na vuna mo cici kina, na luvequ, ni sa sega ni dua na kena i sau nai tukutuku oqori?”

23Ia sa kaya ko koya, “Veitalia ga, me'u cici mada.” A sa mani kaya vua ko koya, “Mo cici ga.” A sa cici ko Eiimaasi vaka ki na buca, ka sa cici siviti koya na kai Kusa.

24A sa dabe tiko ko Tevita e na maliwa ni matamata-ni-koro e rua. A sa cabe cake nai vakatawa ki na bai, ki dela ni matamata-ni-koro, a sa ta cake, ka rai yani, ka raica e dua na tamata sa cici duaduaga mai.

25A sa kaci nai vakatawa, ka tukuna vua na tui. A sa kaya na tui, “Kevaka sa lako duaduaga mai ko koya, sa na tiko e gusuna e dua nai tukutuku.” A sa lako vakatotolo ko koya, ka toro voleka.

26A sa qai raica nai vakatawa ni sa cici mai e dua tale na tamata. A sa kaci nai vakatawa vei koya nai vakatawa sa qarava na matamata-ni-koro, ka kaya, “Raica, e dua tale na tamata sa cici duaduaga mai!” A sa kaya na tui, “Sa kauta talega mai nai tukutuku ko koya.”

27A sa kaya ko koya nai vakatawa, “Au sa raica na nonai vakarau ni cici sa liu mai ni sa vaka nai vakarau ni cici i Eiimaasi na luve i Setoki.” A sa kaya na tui, “A tamata vinaka ko koya, ka sa kauta mai nai tukutuku vinaka.”

28Sa qai kaci mai ko Eiimaasi, ka kaya vua na tui, “Sa vinaka tu na veika kece.” Ka sa cuva vakatoboicu ki na qele e na mata ni tui, ka kaya, “Me vakarokorokotaki ko Jiova na nomuni Kalou, o koya ka soli ira mai na tamata era a dodoka na ligadra vei kemuni na noqu turaga na tui.”

29A sa taroga na tui, “Sa vinaka tiko li na cauravou ko Apisalome, se segai?” A sa kaya ko Eiimaasi, “Ni sa tala ko Joape na nona tamata na tui, koi au na nomuni tamata, au a raica e dua na ue levu, ia ka'u sa sega ni kila na kenai balebale.”

30A sa kaya na tui, “Mo vakatikitiki mada, ka mo tu e ke.” A sa lako vakatikitiki ko koya, ka tu vakadua.

Na Rarawa nei Tevita

31Ka raica, sa lako mai ko koya na kai Kusa, ka sa kaya na kai Kusa, “Sa dua nai tukutuku vinaka vei kemuni na noqu turaga na tui! Sa vakabulai kemuni edaidai ko Jiova mai na ligadra ko ira kecega era a tucake me ra vala kei kemuni.”

32A sa taroga vua na kai Kusa na tui, “Sa vinaka tiko li na cauravou ko Apisalome, se segai?” A sa kaya ko koya na kai Kusa, “Me ra tautauvata ga kei na cauravou ko ya ko ira na nomuni meca na noqu turaga na tui, kei ira kecega era tucake me vakacacani kemuni.”

33A sa rarawa vakalevu sara na tui, ka sa cabe cake ki na vale ki dela ni matamata-ni-koro, ka tagi. A sa kaya vakaoqo ni sa lako tu, “Isa na luvequ Apisalome, na luvequ, na luvequ Apisalome! E vinaka cake ke'u a mate me kemui sosomi, isa Apisalome, na luvequ, na luvequ!”