1O koya sa dauvunauci ia sa vakadomoqataki koya,
ena vakarusai vakasauri, ka sega na ka me bula kina.
2Ni ra sa lewa na yalododonu, sa ra reki na tamata;
ia ni ra sa lewa ko ira nai valavala ca, era sa qai tagi na tamata.
3A tamata sa vinakata na vuku sa vakamarautaki tamana,
ia ko koya sa tiko vata kei ira na dautagane sa vakayalia wale na nona i yau.
4A tui sa lewa vakadodonu sa vakadeitaka na vanua,
ia ko koya sa dautaura nai solisoli, sa vukica.
5A tamata sa vosaveicavilaki vua na kai nona
sa tevuka na lawa me coko kina na yavana.
6Ni sa caka cala na tamata ca, sa tacori kina:
ia na yalododonu sa dausere ka marau.
7Sa vakananuma na yalododonu na nona tiko vakaca na dravudravua;
ia na tamata ca sa sega ni via kila.
8Na tamata dauveivakalialiai sa tacori kina na koro,
ia ko ira na tamata vuku era vakadaroya na cudru.
9Kevaka erau sa veileti na tamata vuku kei na tamata lialia,
se cudru se dredre ko koya, sa na sega ni vakacegu.
10Ko ira na liga ca era sa cati koya sa yalododonu,
ia ko ira na yalododonu era gumatua me vakabulai koya.
11Sa tukuna kece na lomana na yalolialia,
ia ko koya sa vuku sa galu mada, ka qai vosa e muri.
12Ke vakarorogo na turaga ki na vosa lasu,
era na tamata ca ko ira kece na nona dauveiqaravi.
13Na dravudravua kei na dauveivakasaurarataki erau sa tautauvata vakaoqo:
sa vakararamataka na matadrau ruarua ko Jiova.
14A tui sa lewai ira vakadodonu na dravudravua,
ena vakataudeitaki me sega ni oti na nona i tikotiko.
15A kuita kei na vunau sa vakayacora na vuku,
ia na gone sa biu wale tu me veitalia sa vakamaduataki tinana.
16Ni ra lewe vuqa mai na tamata ca, sa levu cake tiko nai valavala ca,
ia ko ira na caka dodonu era na raica na nodra bale.
17Mo vakavulica na luvemu, ena vakacegui iko;
io, ena vakamarautaka na yalomu.
18Ni sa sega nai vakavuvuli, era sa rusa na tamata,
ia ko koya sa muria na vunau, sa kalougata ko koya.
19Sa bese ni vakavulici e na vosa na dauveiqaravi,
ke sa rogoca, ke sa sega ni via vosa mai.
20Ko sa kunea li na tamata sa dauriri ni vosa?
Sa na vuku rawa vei rau ko koya sa lialia.
21O koya sa susuga na nona tamata ni se gone
ena yaco e muri ko koya me luvena.
22A tamata daucudru sa dauvakatubura na veileti,
kei na tamata yalo dauveikata sa dau levu na nona caka cala.
23A nona viavialevu na tamata ena vakasivoi kina,
ia ko koya sa yalomalumalumu ena dokai tiko.
24O koya sai votavota kaya na daubutako sa cata na yalona dina;
sa vakabubuluitaki, ia ka sega ga ni tukuna.
25Na rerevaka na tamata sa da tacori kina,
ia ko koya sa vakararavi vei Jiova ena taqomaki vinaka.
26Era lewe vuqa era kere loloma vua sa lewa,
ia sa mai vei Jiova ga na kena lewa e na vuku ni tamata yadua.
27A tamata sa sega ni dodonu sa ka vakasisila vei ira na yalododonu,
ka sa ka vakasisila vua na tamata ca ko koya sa yalodina.
Who We AreWhat We EelieveWhat We Do
2025 by iamachristian.org,Inc All rights reserved.
