1 Samuela 14 - Ai Vola Tabu (Vakadewa Makawa Vakavoutaki 2021)（FRV21）

Sa Vakadrukai Ira na Kai Filisitia ko Jonacani

1Ia e na dua na siga sa kaya ko Jonacani na luve i Saula vua na cauravou sa daucolata na nona i yaragi, “Daru lako yani ki na nodra i tikotiko vakaivalu na kai Filisitia, sa tu mai na yasana kadua.” Ia sa sega ni tukuna vei tamana.

2A sa tiko ko Saula mai nai yalayala kei Kipea e ruku ni vu ni pomekaraneti sa tu mai Mikironi. Ia ko ira era tiko kaya sa le ono beka na drau na tamata,

3ka vakakina ko Eaia, na luve i Eiitupi, na tuakai i Ikapote, na luve i Finiasi, na luve i Ilai na bete i Jiova mai Sailo, ka sa daramaka voli e dua na efoti. A ra sa sega ni kila ko ira na tamata ni sa lako yani ko Jonacani.

4Ia e na maliwa ni sala sa vakatovolea ko Jonacani me curu rawa yani kina ki na nodra i tikotiko vakaivalu na kai Filisitia, sa dabe no e dua na vatu momoto e na dua na yasana, ka dua na vatu momoto mai na yasana ka dua. Na yacana e dua ko Posesi, kei na yaca ni kenai karua ko Sene.

5A yasana e dua sa qarava na tokalau me donui Mikimasi, ia na kenai karua sa qarava na ceva me donui Kipea.

6A sa kaya ko Jonacani vua na cauravou sa daucolata na nona i yaragi, “Lako mai, me daru lako yani ki na nodra i tikotiko vakaivalu na tawa cili oqori. Ena cakacaka beka e na vukudaru ko Jiova, ni sa sega ni dredre vei Jiova me ia na veivakabulai se ra lewe vuqa se ra lewe lailai.”

7A sa kaya vua ko koya sa daucolata na nona i yaragi, “Mo ni kitaka ga na ka kecega sa tu e lomamuni. Ka raica, ka'u sa duavata kei kemuni me vaka na lomamuni.”

8A sa kaya ko Jonacani, “Raica, edaru na takoso yani kivei ira na tamata oqori, ka vakaraitaki kedaru vei ira.

9Kevaka era na kaya vei kedaru vaka ne, ‘Drau wawa mada ka me keimami lako yani vei kemudrau’, edaru na qai tiko vakadua ga e na nodaru tikina, ka sega ni lako cake vei ira.

10Ia kevaka era na kaya vakaoqo, ‘Drau lako cake mai vei keimami’, edaru na qai lako cake, ni sa soli ira ko Jiova ki na ligadaru. Ka oqo ena kena i vakatakilakila vei kedaru.”

11A rau sa qai vakaraitaki rau ki na nodra i tikotiko vakaivalu na kai Filisitia. A ra sa kaya na kai Filisitia, “Raica, era sa lako mai na Iperiu mai na veiqara era a dauvunitaki ira kina.”

12Ia sa vosa ko ira na mataivalu vei Jonacani kei koya sa daucolata na nona i yaragi, ka kaya, “Drau lako cake mai vei keimami, ia keimami na vakatakila vei kemudrau e dua na ka.” A sa kaya ko Jonacani vei koya sa daucolata na nona i yaragi, “Mo muri au mai; ni sa soli ira ko Jiova ki na ligadra na Isireli.”

13A sa cabe cake e na ligana kei na yavana ko Jonacani, ka sa muri koya yani ko koya sa daucolata na nona i yaragi. Era sa bale sobu na kai Filisitia e na mata i Jonacani, ka sa vakamatei ira ko koya sa daucolata na nona i yaragi e na nona muri voli yani.

14Ia nai matai ni veimoku oqo ka rau kitaka ko Jonacani kei koya sa daucolata na nona i yaragi, sa mate kina e le ruasagavulu beka na tamata, e na loma ni dua ga na tiki ni vanua lailai.

15A sa dua na lomaleqa levu e na keba, e na loma ni vanua, kei na kedra maliwa na tamata kecega. Ko ira na mataivalu kei ira talega na batikadi era sa sautaninini talega; a sa yavala na vanua, ka sa dua na ka levu vakaidina na sautaninini ko ya.

16A sa vakararai tu yani ko ira na tamata yadra nei Saula mai Kipea e Penijamini, ka raica, era sa veilecayaki na lewe vuqa, ka ra sa veiseyaki voli.

17A sa kaya ko Saula vei ira na tamata era tiko vata kaya, “Dou wilika mada na tamata; ka raica se ko cei sa lako tani vei keda.” A ra sa wilika, ka raica, sa yali ko Jonacani kei koya sa daucolata na nona i yaragi.

18A sa kaya vei Eaia ko Saula, “Kauta mada mai eke na kato ni Kalou.” Ni sa tiko kei ira na Isireli na kato ni Kalou e na gauna ko ya.

19Ia ni sa vosa tiko vei koya na bete ko Saula, sa tubu cake vakalevu tikoga na ue e na nodra i tikotiko vakaivalu na kai Filisitia. Ka sa kaya vua na bete ko Saula, “Mo kakua mada.”

20Era sa qai duavata mai, ko Saula kei ira na tamata kecega era tiko vata kaya, ka ra sa lako ki nai valu. Ka raica, era sa veiraravui vakataki ira na kai Filisitia e nai seleiwau, ka sa yaco kina e dua na veilecayaki levu sara.

21Ia sa qai yaco oqo, ni ko ira na Iperiu era sa la'ki tu vata kei ira na kai Filisitia, ka lako vata kei ira mai na veiyasana voleka ki na nodra i tikotiko, era sa vuki tale me nodra i to na Isireli era tiko vata kei Saula kei Jonacani.

22Sa vaka talega kina ko ira kece na Isireli era a vunitaki ira tu e na vanua veiulunivanua ko Ifereimi, ni ra sa rogoca na nodra sa dro voli na kai Filisitia, era a toro voleka mai ka cicimuri ira talega e nai valu.

23A sa vakabulai ira na Isireli ko Jiova e na siga ko ya. A sa toso nai valu ka yacovi Peci-aveni.

Na Bubului Sega ni Vakasamataki Vinaka i Saula

24A ra sa vakaloloma ko ira na Isireli e na siga ko ya, ni sa vosa bubului vei ira na tamata ko Saula, ka vaka, “Me cudruvi na tamata sa kania e dua na kakana, ka me yakavi mada, ka me'u cudruvi ira mada na noqu meca.” A ra sa sega kina ni kania e dua na kakana ko ira na tamata.

25Sa ra qai yaco na tamata kecega ki na dua na veikau, ka sa no e na qele na de ni oni.

26Ia ni ra sa lako ki na veikau na tamata, raica, sa titiri tiko na de ni oni; ia ka sa sega na tamata sa kauta na ligana ki na gusuna; ni ra sa rerevaka na vosa bubului ko ira na tamata.

27Ia ko Jonacani e a sega ni rogoci tamana ni sa vakabubuluitaki ira na tamata, ka sa dodoka kina na mua ni titoko sa qumia tiko na ligana, ka tonisua e na qa-ni-oni, ka kauta na ligana ki na gusuna, ka sa serau vinaka kina na matana.

28A sa qai vosa mai e dua vei ira na tamata, ka kaya, “Ko tamamu sa vakabubuluitaki ira na tamata, ka vaka, ‘Me cudruvi na tamata sa kania e dua na kakana edaidai.’ Era sa malumalumu kina ko ira na tamata i valu.”

29A sa kaya ko Jonacani, “Sa vakaleqa na vanua ko tamaqu. Raica mada, ni sa serau vinaka mai na mataqu ni'u sa kania vakalailai na de ni oni oqo.

30Ena vinaka cake beka kevaka era sa kana edaidai ko ira na tamata e nai toki ni nodra meca era sa kunea; ia sa qai sega ni levu na moku edaidai vei ira na kai Filisitia.”

31Ni ra sa yaviti ira oti na kai Filisitia e na siga ko ya mai Mikimasi ka yaco ki Eijaloni, era sa malumalumu sara na tamata i valu;

32era sa qai goleva kina nai toki-ni-valu ko ira na tamata i valu, ka taura eso na sipi, kei na bulumakau, kei na luve ni bulumakau, ka vakamatea e na qele. A ra sa kania vata kei na dra ko ira na tamata.

33Vteki 9.4; Vsoro 7.26,27; 17.10-14; 19.26; Vrua 12.16,23; 15.23A sa qai tukuni vei Saula, ka vaka, “Raica, era sa cala sara vei Jiova ko ira na tamata ni ra sa kania vata kei na dra.” A sa kaya ko koya, “Dou sa cala sara; dou vaqiqica mai vei au edaidai e dua na vatu levu.”

34A sa kaya ko Saula, “Dou dui lako voli e na kedra maliwa na tamata, ka kaya vei ira, ‘Ni kauta mai vei au ki ke na tamata yadua na nona bulumakau, kei na tamata yadua na nona sipi, ka vakamatea eke, ka kania; ia mo ni kakua ni caka cala vei Jiova ni ko ni kania vata kei na dra.’ ” A ra sa kauta mai e na bogi ko ya na nona bulumakau ko ira na tamata yadua, ka vakamatea e na tikina ko ya.

35A sa cakava ko Saula e dua nai cabocabo-ni-soro vei Jiova; ko ya nai matai ni cabocabo-ni-soro sa cakava ko koya vei Jiova.

36A sa kaya ko Saula, “Me da muri ira sobu na kai Filisitia e na bogi, ka kovei ira tiko ka me rarama mada na mataka; ia me da kakua ni vakavoca vei ira e dua na tamata.” A ra sa kaya, “Mo ni kitaka ga na ka kecega sa vinaka vei kemuni.” Ia sa kaya ko koya na bete, “Me da toro voleka mada vua na Kalou eke.”

37A sa taroga na Kalou ko Saula, “Me'u muri ira sobu li na kai Filisitia, se me'u kakua? O ni na soli ira li ki na ligadra na Isireli, se segai?” Ia sa sega ga ni vosa vua ko koya e na siga ko ya.

38Ka sa kaya ko Saula, “Dou toro mai ki ke, oi kemudou kecega sa veiliutaki vei ira na tamata; ka me da mai kila ka raica vata mada se sa vu vakacava nai valavala ca oqo edaidai.

39Ia me vaka sa bula ko Jiova, o koya ka vakabulai ira na Isireli, ni kevaka sai koya na luvequ ko Jonacani sa vakavuna na ka oqo, ena mate vakaidina ko koya.” A sa sega e dua vei ira na tamata kecega sa vosa vua.

40A sa qai kaya ko koya vei ira kecega na Isireli, “Ni tu yani koi kemuni e na dua na yasana, ia koi au kei Jonacani na luvequ, keirau na tu e na yasana kadua.” A ra sa kaya vei Saula ko ira na tamata, “Mo ni kitaka ga na ka e vinaka vei kemuni.”

41Tiko 27.21; 1Samu 28.6A sa qai kaya ko Saula, “Kemuni Jiova na Kalou ni Isireli, a cava na vuna ko ni sega kina ni vosa vua na nomuni tamata edaidai? Mo ni vakatakila mada e na vakawiri madigi se ko cei sa dodonu.” A sa tauri rau ko Jonacani kei Saula na madigi, ka ra sa galala kina ko ira na tamata.

42Sa qai kaya ko Saula, “Ni vakawiri madigi vei keirau kei Jonacani na luvequ.” Ka sa tauri Jonacani na madigi.

43A sa kaya vei Jonacani ko Saula, “Mo tukuna mai vei au na ka ko a cakava.” A sa tukuna vua ko Jonacani, ka kaya, “Au a vakatovolea walega e dua na de ni oni lailai e na mua ni titoko sa tu e ligaqu. Sai au oqo; au na mate kina.”

44A sa kaya ko Saula, “Me cakacaka vakakina na Kalou, ka vakaikuritaka; ni ko na mate vakaidina, Jonacani.”

45A ra sa kaya vei Saula ko ira na tamata, “Ena mate li ko Jonacani, o koya ka sa kitaka na veivakabulai levu oqo e Isireli? Me kakua sara! Me vaka sa bula ko Jiova, ena sega e dua na drau ni uluna me lutu ki na qele, ni rau sa cakacaka vata kei na Kalou edaidai.” A ra sa vakabulai Jonacani kina ko ira na tamata, ka sa sega kina ni mate ko koya.

46A sa lako cake ko Saula, ka sega ni vakacemuri ira tale tiko na kai Filisitia, ka ra sa dui lako yani ki na nodra tikina na kai Filisitia.

Tomana ko Saula na Nodra Valuti na Meca i Isireli

47E na gauna sa tui kina ko Saula e na matanitu ko Isireli, a sa valuti ira na nodra meca kecega era sa tiko vakavolivolita—vei ira na Moapi, kei ira na luve i Amoni, kei ira na kai Itomi, kei ira na tui Sopa, kei ira na kai Filisitia. A sa ia na veivakararawataki vei ira kecega sa valuta ko koya.

48A sa tamata qaqa e nai valu ko koya ka yaviti ira na Amalekaiti, ka vakabulai ira na Isireli mai vei ira era vakacacani ira.

49Ia ko iratou na luve i Saula ko Jonacani, kei Isivi, kei Malikisua. Kei na yacadrau na luvena yalewa ko Merapi ka ulumatua, ia na yacana ka gone ko Mikali.

50Na yaca ni wati Saula ko Eiinoami, na luve i Eiimaasi. Ia na yacana na nona kavetani ni valu ko Epineri, na luve i Neri, na tamana lailai ko Saula.

51Ia na tama i Saula ko Kisi, ia na tama i Epineri ko Neri, na luve i Epieli.

52A kaukauwa sara na veivaluvaluti kei ira na kai Filisitia e na dela ni gauna ni bula i Saula. Ia ni sa dauraica ko Saula e dua na tamata kaukauwa se tamata qaqa, sa dau kauti koya vakavoleka ki vua.