Aisea 40 - Ai Vola Tabu (Vakadewa Makawa Vakavoutaki 2021)（FRV21）

Na Vosa ni Veivakacegui vei Ira na Tamata ni Kalou

1Dou vakacegui ira, dou vakacegui ira na noqu tamata,

sa kaya na nomudou Kalou.

2Dou cavuta na vosa ni veivakacegui ki Jerusalemi,

ka tagicaka vua,

ni sa oti na nona gauna ni oca,

ni sa buluti na nona caka cala,

ni sa ciqoma ko koya mai na liga i Jiova

me rauta vakarua na nona i valavala ca kecega.

3 Maciu 3.3; Mari 1.3; Joni 1.23 Luke 3.4-6 Sa rogo na domo ni dua sa kacikaci e loma ni vanua lala,

“Dou caramaka na sala i Jiova,

cakava me dodonu e loma ni vanua na salatu ni noda Kalou.

4Ena vakaceceretaki na buca kecega,

ka na vakalolovirataki na ulunivanua kei na vanua cecere kecega;

na tikina sa veve ena vakadodonutaki,

kei na tikina sukusukura ena vakalogalogavinakataki.

5Ena qai vakarairaitaki mai nai ukuuku i Jiova,

ka ra na raica vata na tamata kecega,

ni sa cavuta oqo na gusu i Jiova.”

6 Jeme 1.10,11; 1Pita 1.24,25 Sa vosa mai e dua ka vaka, “Mo kaci mada!”

A sa kaya ko koya, “A cava me'u kacivaka?”

Sa vaka na co ga na tamata kece,

ka sa vaka na se ni co na kedrai ukuuku kecega;

7sa daumalai na co, a sa daumira na sena,

ni sa uvuca nai cegu i Jiova;

e dina era sa vaka na co na tamata.

8Sa daumalai na co, a sa daumira na sena,

ia na vosa ni noda Kalou ena tudei ka tawa mudu.

9Mo cabeta na ulunivanua cecere,

ko iko Saioni, ka kacivaka mai nai tukutuku vinaka;

mo tabalaka vakaukauwa na domomu, ko iko Jerusalemi,

ka kacivaka mai nai tukutuku vinaka;

mo tabalaka, kakua ni ko rere;

kaya ki na veikoro e Juta,

“Raica, na nomudou Kalou!”

10 Aisea 62.11; Vtaki 22.12 Raica, ena lako vakaukauwa mai na Turaga ko Jiova,

ia na ligana ena lewa e na vukuna;

na kenai sau ena solia sa tiko ga vua,

kei na ka ni nona cakacaka e matana.

11 Isi 34.15; Joni 10.11 Ena vakani ira na nona qele ni sipi me vaka nai vakatawa;

ena keveti ira na luve ni sipi e na ligana,

ka kauti ira voli e na lomaserena;

ko ira era vakasucuma tiko na luvedra

ena tubera voli vakamalua ko koya.

Na Kalou Vakasakiti nei Isireli

12O cei sa vakarautaka na wai e na qeteqete ni ligana,

ka vakarautaka na lomalagi e nai qaqalo ni ligana,

ka kumuna vata e nai vakarau na qele kei vuravura,

ka vakarautaka e nai vakarau ni bibi na veiulunivanua,

kei na veiulu-ni-koro e nai vakarau-ni-ka?

13 Roma 11.34; 1Kori 2.16 Ko cei sa kila rawa na Yalo i Jiova,

se ko cei me nona i vakavuvuli me vakavulici koya?

14Erau sa bose vata kei cei,

se ko cei sa vakavukui koya, ka vakavulici koya e nai valavala ni lewa?

Ko cei sa vakavulici koya me kila-ka,

se ko cei sa vakatakila vua na sala ni vuku?

15Raica, na veimatanitu era sa vaka ga e dua na turu ni wai e nai takitaki,

ka vaka na kuvu-ni-soso e na dari ni vakarau;

raica, sa tomika ko koya na veiyanuyanu me vaka sa ka lailai sara.

16Ia na kau mai Lepanoni, sa sega ni rauta me buka;

ka sa lailai talega na kena manumanu mei soro kama.

17A veimatanitu kece sa vaka na ka walega vua;

io, sa nanumi me ka lailai vei koya ka levu na ka sa sega,

ka sa ka wale sara ga.

18 Caka 17.29 Ia dou na qai vakatautauvatataka na Kalou kei cei,

se dou na vakatauvatani koya kei na cava?

19A matakau ceuceu?—Sa bulia e dua na matai,

ka dua na matai ni koula sa botana e na koula,

ka sa bulia na kena taube siliva.

20Ko koya sa dravudravua ka sa dredreta na vakacaboisoro oqo,

sa digitaka ga na kau sa sega ni vuca rawa;

ka sa qai qara e dua na matai vuku

me cakava e dua na matakau sa sega ni yavala rawa.

21Dou sa sega beka ni kila? Dou sa sega li ni rogoca?

Sa sega beka ni tukuni vei kemudou mai liu?

Dou sa sega ni kila mai na gauna sa tauyavutaki kina ko vuravura?

22Sai koya ga sa tiko mai cake ka toka e ra ko vuravura,

ia na lewena era sa vaka na vodre;

sai koya ga sa tevuka, me vaka nai ubi levu, na mata-ni-lagi;

ka birika, me vaka na valelaca, mei tikotiko;

23sai koya ga sa vakasivoi ira sara na tui;

ia ko ira na turaganilewa kei vuravura

sa cakava ko koya me ka wale sara.

24Era sega ni tei dina, era sega ni kaburaki dina,

sa sega ni tei sobu dina ki na qele na wakadra;

ka sa uvuci ira walega ko koya, a ra sa malai,

ia na covulaca ena kauti ira tani me vaka na qa ni sila.

25Ia dou na qai vakatauvatani au kei cei,

se me keirau vakatautauvatataki kei cei?

sa kaya ko Koya na Yalosavasava.

26Dou ta cake, ka rai yani:

Ko cei ka bulia na ka oqori?

Ko koya sa kauta vakamataivalu mai na kedrai vavakoso,

ka sa kacivi ira kecega e na yacadra;

ka ni sa levu na nona kaukauwa,

ka sa daugumatua sara,

sa sega e dua sa yali.

27A cava ko sa vosa kina, ko iko Jekope,

ka mo kaya, ko iko Isireli,

“Sa vuni tu na noqu sala vei Jiova,

kei na noqu dodonu sa sega ni kauwaitaka na noqu Kalou?”

28Ko sa sega beka ni kila? Ko sa sega ni rogoca?

Sa Kalou ka tawa mudu ko Jiova,

ko koya ka bulia nai yalayala kei vuravura.

Ena sega ni malumalumu se oca ko koya;

ka sa sega ni dikevi rawa na nona vuku.

29Sa dausolia na kaukauwa vei ira era sa malumalumu,

ia ena vakalevutaka na kaukauwa vei ira era sa sega ni gumatua rawa.

30Io, era na malumalumu ka oca ga na cauravou,

a ra na bale sara na tamata bula;

31ia ko ira era sa waraki Jiova era na vakaukauwataki tale,

era na cabe cake me vaka era vakatabana vakaikeli,

era na cici ka sega ni oca,

era na lako tu ka sega ni malumalumu.