Jeremaia 14 - Ai Vola Tabu (Vakadewa Makawa Vakavoutaki 2021)（FRV21）

Na Dausiga Levu

1A vosa i Jiova sa yaco vei Jeremaia e na vuku ni dausiga.

2“Sa tagi ko Juta,

e kena veimatamata-ni-koro sa malumalumu;

era sa rarawa ka dabe e na qele,

ka sa lako cake na tagi i Jerusalemi.

3Ko ira talega na nodra turaga era sa talaki ira na nodra lalai ki na wai;

era sa yaco ki nai keli,

ka sega ni kunea na wai;

era sa lesu ka maca wale na medra bilo;

era sa madua ka taqaya,

ka ra sa ubia na uludra,

4ni sa kakaca na qele.

E na vuku ni sa sega na uca e na vanua,

era sa madua nai vakatau-ni-were,

ka ra sa ubia na uludra.

5Io, na dia talega sa vakasucu e na were, ka sa biuta na luvena,

ni sa sega na co.

6Na asa kila talega era sa tu mai na talasiga,

era dramica na cagi me vaka na gata lelevu;

sa malumalumu na matadra,

ni sa sega na co.

7“Kemuni Jiova,

ko ni sa beitaki keimami dina e na neimami caka cala,

ia mo ni cakacaka e na vuku ni yacamuni ga;

ni sa ka levu na neimami dauvuki;

keimami sai valavala ca vei kemuni.

8Vei kemuni nai nuinui i Isireli,

na nodra i vakabula e na gauna ni rarawa,

e na vuku ni cava ko ni sa vaka kina na vulagi e na vanua,

ka vaka na tamata dauveilakoyaki sa tiko walega me moce e na bogi?

9A cava ko ni sa vaka kina na tamata sa taqaya,

ka vaka na tamata qaqa sa sega ni ia rawa na veivakabulai?

Ia koi kemuni, Jiova, ko ni sa tiko kei keimami,

na yacamuni talega keimami sa vakayacani kina;

mo ni kakua ga ni biuti keimami.”

10Sa kaya vakaoqo ko Jiova vei ira na tamata oqo,

“Sa vaka ga oqo na nodra vinakata me ra lako sese,

era sa sega ni tarova na yavadra;

ia ko Jiova sa sega kina ni vinakati ira,

ena nanuma oqo na nodra caka cala,

ka cudruva na nodra i valavala ca.”

11Sa qai kaya vei au ko Jiova, “Mo kakua ni masulaki ira na tamata oqo me ra vinaka.

12Ni ra sa lolo, ka'u na sega ni rogoca na nodra tagi, ni ra sa vakacabora nai soro kama kei nai madrali, ka'u na sega ni vinakati ira. Ia ka'u na vakarusai ira ga e nai seleiwau, kei na viakana, kei na mate dauveiveitauvi.”

Ko Ira na Parofita Lasulasu

13Au sa qai kaya, “Ulei, noqu Turaga Jiova! Raica, ko ira na parofita era sa kaya vei ira, ‘Dou na sega ni raica nai seleiwau, ena sega talega vei kemudou na viakana; ni ka'u na solia vei kemudou e na yasana oqo me sautu dina ga.’ ”

14A sa kaya vei au ko Jiova, “Sa ka lasu ga era parofisaitaka e na yacaqu ko ira na parofita. Au a sega ni talai ira, au a sega ni vakaroti ira, au a sega talega ni vosa vei ira. Era sa parofisaitaka ga vei kemudou na raivotu lasu, kei na vosa mana lasu, kei na ka wale, kei nai lawaki ni lomadra.

15O koya oqo sa kaya kina ko Jiova e na vukudra na parofita era sa ia na parofisai e na yacaqu, ia koi au ka'u a sega ni talai ira, ka ra sa kaya ga, ‘Nai seleiwau kei na dausiga ena sega ni yaco ki na vanua oqo;’ Era na vakarusai ga na parofita ko ya e nai seleiwau kei na dausiga.

16Ia na tamata era sa dauparofisai vei ira era na biu tu ki na saqata ni koro ko Jerusalemi e na vuku ni dausiga kei nai seleiwau. Ena sega talega e dua me buluti ira—ko ira, se na watidra, se na luvedra tagane, se na luvedra yalewa. Ia ka'u na sovaraka ga vei ira na nodra ca.

17“Ia mo kaya vei ira na vosa oqo;

‘Me dave sobu na wai mai na mataqu e na siga kei na bogi,

ia me kakua ni cegu,

ni sa vakaleqai na goneyalewa tabutagane—na noqu tamata—e na dua na mavoa levu,

ni sa moku vakaca sara.

18Kevaka ka'u sa lako yani ki na were,

raica—ko ira sa vakamavoataki e nai seleiwau!

Kevaka ka'u sa curu yani ki na koro,

raica—ko ira sa mate e na viakana!

Ni ra sa cakacaka voli ga na parofita kei na bete e loma ni vanua

ka sa sega ni kila e dua na ka.’ ”

Era sa Vakatutusa na Tamata vei Jiova

19Ko ni sa biuti ira vakadua sara beka na Juta?

Sa vakasisilataki Saioni beka na yalomuni?

Ena cava ko ni sa cudruvi keimami kina

ka keimami sa sega tale ni vakabulai rawa?

Keimami a vakasaqara na vakacegu, ia sa sega ni yaco e dua na ka vinaka;

me yaco e dua na gauna ni veivakabulai, ia sa yaco ga na ka rarawa.

20Kemuni Jiova, keimami sa vakatusa na neimami ca,

kei na caka cala ni neimami qase,

ni keimami sai valavala ca vei kemuni.

21Mo ni kakua ni cati keimami, e na vuku ni yacamuni;

mo ni kakua ni vakarogocataka na nomuni tikotiko vakaiukuuku;

mo ni nanuma, ka mo ni kakua ni vakatawayagataka na nomuni veiyalayalati kei keimami.

22Sa dua beka na nodra ka lasu na veimatanitu me vakatauca rawa na uca?

Se sa solia rawa beka na uca ko lomalagi?

Sai kemuni duaduaga, Jiova, na neimami kalou se segai?

O koya keimami na vakararavi kina vei kemuni,

ni sai kemuni ga sa cakava na ka kece oqo.