1 Samuela 22 - Ai Vola Tabu (Vakadewa Makawa Vakavoutaki 2021)（FRV21）

Ko Tevita kei Ira na Nona i Lawalawa mai Etulama

1 Same 57; Same 142 A sa lako tani mai kea ko Tevita, ka dro bula ki na qara mai Etulama. Ia ni sa rogoca ko ira na tuakana kei ira kecega na lewe-ni-vuvale i tamana, era sa lako sobu kina vei koya.

2Ia sa soqoni vata vua ko ira kecega sa vakasaurarataki, kei ira kecega sa dinau ka sega ni sauma rawa, kei na tamata kecega sa yalorarawa. A sa yaco ko koya me nodra turaga. A ra sa le va beka na drau na tamata era sa tiko vata kaya.

3A sa lako tani mai kea ko Tevita ki Misipe mai Moapi. A sa kaya vua na tui Moapi ko koya, “Ni yalovinaka me rau lako mada mai na tamaqu kei tinaqu, me rau tiko kei kemudou, ka yacova ni'u sa kila mada se cava na ka ena cakava vei au na Kalou.”

4A sa kauti rau ko koya vei tui Moapi, ka eratou sa tiko kaya e na gauna kecega sa tiko kina ko Tevita mai na koro ni drodro ko ya.

5Sa qai kaya vei Tevita ko Kata na parofita, “Mo kakua ni tiko e na koro ni drodro oqo; mo lako tani, ka lako ki na vanua ko Juta.” Sa qai lako tani ko Tevita, ka lako ki na veikau mai Ereci.

Vakamatei Ira na Bete mai Nopi ko Saula

6A sa rogoca ko Saula ni sa kune ko Tevita, kei ira na tamata era sa tiko vata kaya. A dabe toka ko Saula mai Kipea e na dua na ruku ni vunikau mai Rama, ka sa taura no e ligana na nona moto, ka ra sa tiko vakavolivoliti koya ko ira kecega na nona tamata.

7Sa qai kaya ko Saula vei ira na nona tamata era tiko vata kaya, “Dou rogoca, oi kemudou na Penijamini; ena solia beka vei kemudou yadua na luve i Jese na veiwere kei na veiloga-ni-vaini? Ena lesi kemudou beka mo dou turaga-ni-valu ni yayaudolu kecega, ka turaga-ni-valu ni yayadrau?

8Ko ya beka na vuna dou sa bukia kina na qau vere oi kemudou kecega? Sa sega mada e dua me bau tukuna kivei au ni rau sa vere vata na luvequ kei na luve i Jese, ka sega e dua vei kemudou sa rarawa na lomana e na vukuqu, ka sega talega e dua me vakatakila vei au ni sa vakauqeta na noqu tamata ko koya na luvequ, me lawavaki au, me vaka sa kitaka e na siga oqo.”

91Samu 21.7-9; Same 52A sa qai vosa mai ko Toeki na kai Itomi, o koya sa lesu me vakaraici ira na tamata nei Saula, ka sa kaya, “Au a raica na luve i Jese ni sa lako mai ki Nopi, kivei Eiimeleki na luve i Eiitupi;

10ka sa tarogi Jiova ko koya e na vukuna, ka sa solia vua nai vaqa, ka solia vua nai seleiwau i Koliaci na kai Filisitia.”

11A sa veitalai ko koya na tui me kacivi mai ko Eiimeleki na bete, na luve i Eiitupi, kei ira kecega na lewe-ni-vuvale i tamana, ko ira na bete era sa tiko mai Nopi; a ra sa lako kecega mai vei koya na tui.

12Ka sa kaya ko Saula, “Mo rogoca mada, na luve i Eiitupi.” A sa kaya ko koya, “Oi au saka, noqu turaga.”

13A sa kaya vua ko Saula, “A cava ko drau sa buki qau vere kina, oi kemudrau kei na luve i Jese, ni ko sa solia vua na kakana, kei nai seleiwau, ka taroga na Kalou e na vukuna, me tucake ko koya, me lawavaki au, me vaka e na siga oqo?”

14A sa vosa mai vei koya na tui ko Eiimeleki, ka kaya, “O cei vei ira kecega na nomuni tamata sa yalodina me vakataki Tevita, o koya na vugomuni na tui, ka lako voli me vaka na nomuni vosa, ka sa dokai e na nomuni vale?

15Sa kena siga beka oqori ka'u a vakatekivu kina me'u taroga na Kalou e na vukuna? Sa yawa sara vei au! Me kakua ni beitaka ko koya na tui e dua na ka vei au na nomuni tamata, se dua vei ira kecega na lewe-ni-vuvale i tamaqu, ni'u sa sega ni kila koi au na nomuni tamata e dua na ka, se ka lailai se ka levu e na ka oqo.”

16A sa kaya na tui, “O na mate vakaidina, Eiimeleki, ko iko, kei ira kecega na lewe-ni-vuvale i tamamu.”

17Sa kaya talega na tui vei ira na tamata era sa tu voleka vua, “Mo dou ia mada, ka vakamatei ira na bete i Jiova, ni ra sa duavata kei Tevita; era sa kila sa dro ko koya, ka ra sega ni tukuna vei au.” Ia era sa bese ni dodoka na ligadra ko ira na nona tamata na tui me ra yaviti ira na bete i Jiova.

18A sa qai kaya vei Toeki ko koya na tui, “Mo ia mada ko iko, ka yaviti ira na bete.” A sa ia ko Toeki na kai Itomi, ka yaviti ira na bete, ka vakamatea e na siga ko ya e le walusagavulu ka lima na tamata era sulumaka na efoti lineni.

19Ko Nopi talega, na nodra koro na bete, sa samuta ko koya e nai seleiwau, na tagane kei na yalewa talega, na gone lalai, kei ira sa sucu tiko, kei na bulumakau, kei na asa, kei na sipi.

20Ia sa dua na luve i Eiimeleki na luve i Eiitupi, na yacana ko Epaiaca, sa bula ka dro me muri Tevita.

21A sa tukuna vei Tevita ko Epaiaca ni sa vakamatei ira na bete i Jiova ko Saula.

22A sa kaya vei Epaiaca ko Tevita, “Au a kila e na siga ko ya, ka tiko kina mai kea ko Toeki na kai Itomi, ni na tukuna dina vei Saula. Sa mate e na vukuqu na tamata kecega e na vale i tamamu.

23Mo tiko mada vei au; ka kakua ni rere, ni sa qarai iko mo mate ko koya sa qarai au me'u mate. Ia ko na taqomaki vinaka ni ko sa tiko vei au.”