1Sa qai vosa mai vei Jope ko Jiova mai na covulaca, ka kaya:
2“Ko cei oqo sa vakabutobutotaka nai vakasala e na vosa sa sega ni vuku?
3Mo vauca mada vakatagane na tolomu,
ni'u na vakataroga vei iko, ia mo vakatakila mai vei au.
4“Ko a tiko li mai vei e na gauna ka'u a tauyavutaki vuravura kina?
Mo tukuna mai vei au, kevaka ko sa kila.
5Ko cei sa lewa na kenai vakarau—ko sa qai kila vakaidina!
Se ko cei ka dreta kina na dali i vakarau?
6Sa tauyavutaki li e na dela ni cava,
se ko cei ka vakasobura na kena duru-vatu e tutuna,
7ni ra lagasere vata na veikalokalo ni mataka lailai
ka ra kaila e na reki ko ira kecega na luve ni Kalou?
8 Jere 5.22 “Se ko cei sa sogolatia na wasawasa e nai sogo
ni sa curu vakaukauwa tani mai na kete?—
9ni'u a cakava na o me kenai sulu
kei na butobuto loaloa me kenai vau,
10ka vakarautaka na kenai yalayala
ka cakava na kenai vakadei kei na kenai sogo,
11ka kaya, ‘Ko sa na yaco ga e ke, ka kakua ni sivia,
ka na yala ga eke na nomu biua viavialevu’?
12“Ko sa vakarota beka na mataka e nai tekivu ni nomu gauna,
ka vakatakila ki na mataka na vanua me kida cake kina,
13me rawa ni taura kina nai yalayala kei vuravura,
ka kureitaki tani kina ko ira nai valavala ca?
14Sa vukici me vaka na tete e na ruku ni ka sa tabaki kina,
kei na veika e baleta sa vaka nai sulu.
15Sa bureitaki vei ira nai valavala ca na kedra rarama,
ka sa ramusu na liga sa viavialevu.
16“Ko sa curuma beka nai vurevure ni waitui,
se ko sa lako voli e na dreke ni wasawasa?
17Sa dola oti beka vei iko na katuba kei mate,
se ko sa kunea na matamata ni yaloyalo ni mate?
18Ko sa bau kila beka na kena levu na vuravura?
Tukuna mai kevaka ko sa kila na veika kecega oqo.
19“Evei na gaunisala ki nai tikotiko ni rarama,
ka evei na kena vanua na butobuto,
20mo kauta kina ki na kena vanua
ka mo kila talega kina na sala ki na kena vale?
21Ko sa kila ga, ni ko sa sucu oti tu kina,
ka ni sa vuqa nai wiliwili ni nomu siga!
22“Ko sa curuma beka na lololo ni uca-vulavula,
se ko sa raica na lololo ni uca-cevata,
23na kena ka'u sa maroroya me baleta na gauna ni leqa,
e na vuku ni siga ni vala kei na veivaluvaluti?
24A sala cava sa mua ki na vanua e wasewasei kina na rarama,
se vanua e veibiuyaki kina na cagi ni tokalau e delai vuravura?
25“Ko cei sa cakava na sala-ni-wai me baleta na uca levu
kei na gaunisala me muria na kurukuru,
26me vakatauca na uca e na vanua sa sega ni bula kina e dua,
e na vanua dravuisiga sa sega kina na tamata,
27ka me mamau kina na vanua sa lala ka sega ni teivaki,
ka me vakarautaki kina na qele me vakatubura na co?
28“Sa vakatamani beka na uca,
se ko cei beka sa vakatubura na mata ni tegu?
29A kete i cei li sa lako mai kina na wai cevata,
ka ko cei sa vakasucuma na tegu cevata ni lomalagi?
30Sa cokocokovata na wai me vaka na vatu,
ka sa cevata na dela ni wai titobu.
31 Jope 9.9; Emo 5.8 “Ko na rawa li ni vauca vata na veikalokalo ko Peliatisi,
se sereka nai vau kei Oraioni?
32Ko na rawa li ni vakauti Masaroci e na kena gauna,
se ko rawa li ni tubera na Bea kei ira na luvena?
33Ko sa kila beka nai valavala ni kena lewai na lomalagi?
Ko rawa li ni vakataudeitaka na nodra lewa e delai vuravura?
34“Ko rawa li ni tabalaka cake na domomu ki na o,
me luvuci iko kina na wai levu?
35Ko rawa li ni vakatala yani na livaliva, me ra lako yani kina
ka kaya vei iko, ‘Koi keitou ga oqo’?
36Ko cei li sa vakatikora na vuku ki na lomada,
se ko cei sa vakayalomatuataka na tamata?
37Ko cei li sa tu vua na vuku me wilika rawa kina na veio ni lomalagi?
Se ko cei li e na rawa ni sova na bola-ni-wai kei lomalagi,
38ni sa kaukauwa mai na kuvu-ni-soso,
ka veikabiti sara na qele qa?
39“Ko rawa li ni vakasasataka na kena kakana na laione,
se vakamamautaki ira na luve ni laione ni ra sa viakana,
40ni ra sa koto sobu e na nodra qara
se wawa lo tiko e na nodra vanua ni tobo kakana?
41Ko cei li sa solia na kena na reveni,
ni sa tagi na luvena vua na Kalou,
ka ra vuka vaka ka vaka ni sa sega na kedra?
Who We AreWhat We EelieveWhat We Do
2025 by iamachristian.org,Inc All rights reserved.
