2 Korinica 12 - Ai Vola Tabu (Vakadewa Makawa Vakavoutaki 2021)（FRV21）

Na Raivotu kei na Veivakararai ni Turaga Eso e Yaco vei Paula

1E dodonu me'u vakalevulevui au. Ia sa sega beka ni yaga, ia ka'u na goleva ga na raivotu kei na veika e vakatakila na Turaga.

2Au sa kila e dua na tamata o koya sa tu vata kei Karisito, ni sa kau cake mada ko koya oqo ki nai katolu ni lomalagi, a sa qai oti na yabaki e tinikava—se vakayago beka, se sega, au sa sega ni kila; sa sega beka ni vakayago, au sa sega ni kila; sa kila ga na Kalou.

3Io, au sa kila na tamata sa vakaoqo—se vakayago ga, se sega ni vakayago, au sa sega ni kila; sa kila ga na Kalou—

4ni sa kau cake ki Parataisi ka sa rogoca na vosa sa sega ni tukuni rawa, sa sega ni tara me tukuna na tamata.

5Au na vakalevulevui au e na vukuna sa vakaoqo, ia e na vukuqu ga, ka'u na sega ni vakalevulevui au, e na vuku ga ni noqu malumalumu.

6Ia kevaka ka'u sa vinakata me'u dokadokai au, au na sega ni lialia kina, ni'u na kaya ga na ka e dina. Ia ka'u sa kua so ga, de dua sa vakasami au ni'u sa uasivi cake e na ka sa raica vei au, se rogoca vei au.

7Ia deu vakalevulevui sara ni sa levu sara na veivakarairai, sa dua na voto ni kau sa vakalauti kina na lewequ, e dua nai talaki i Setani me vakararawataki au, deu vakalevulevui sara.

8E na vuku ni ka oqo, ka'u a masu vakatolu vua na Turaga, me kau tani vei au.

9A sa kaya vei au ko koya, “Sa rauti iko na noqu loloma, ni sa vakalevui na noqu kaukauwa ni sa malumalumu e dua.” O koya oqo sa yaloqu sara kina me'u rekitaka na noqu malumalumu, me tiko kina vei au na kaukauwa i Karisito.

10O koya oqo ka'u sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito; ia ni'u sa malumalumu, au sa qai kaukauwa.

Na Nona Kauwaitaki Ira na Kai Korinica ko Paula

11Au sa yaco me'u lialia! Oi kemudou ga sa vakavuna, ni sa dodonu mo dou vosavakavinakataki au. Ni'u sa sega ni uasivi sobu vei ira nai apositolo era sa uasivi cake, ia sa dina ga ni'u sa ka wale.

12E dina sa vakayacori e na kemudou maliwa na veivakatakilakila ni apositolo e na dauvosota kecega, e na veika-mana, kei na veika e veivakurabuitaki, kei na cakacaka mana.

13A cava beka dou sa uasivi sobu kina vei ira na veisoqosoqo lewe ni lotu tani, e na vuku ga ni ka oqo, ni'u sa sega ni vakaogai kemudou? Ia mo dou vosoti au e na vuku ni ka ca oqo!

14Raica, au sa vakarau me'u lako vakatolu yani vei kemudou. Ia ka'u na sega ni vakaogai kemudou, ni ka'u sa sega ni vakasaqara na veika e nomudou, koi kemudou ga. Ni sa sega ni kilikili kei ira na gone me ra binia nai yau me nodra na qase, ko ira ga na qase me nodra na gone.

15Ia sa yaloqu sara me'u soli au kei na ka sa tu vei au e na vuku ni yalomudou. Io kevaka sa ka levu na noqu loloma vei kemudou, me'u na lomani beka ga kina vakalailai?

16Ia me vaka ga ko ya, au a sega ni beitaki kemudou. Ia ni'u a yaloqaseqase, ka'u sa rawai kemudou e nai lawaki.

17Au sa vakaiyau mai vei kemudou li vei ira ka'u a tala vei kemudou?

18Au a masuti Taito, ka tala vata kaya e dua vei ira na veiwekani. Sa vakaiyau mai vei kemudou li ko Taito? Keirau a sega li ni valavala e na yalovata? Keirau a sega li ni muria e dua bauga nai vakarau?

19Dou sa vakasama tiko beka ni keitou sa vosavinakataki keitou vei kemudou? Keitou sa vosa tikoga e na mata ni Kalou ni keitou sa tu vata kei Karisito. Ia na ka kecega, kemudou sa daulomani, mo dou vakatataki cake kina.

20Ni'u sa rere, deu lako yani ka sega ni kunei kemudou me vaka ka'u sa vinakata, ia ka'u na qai kune vei kemudou me vaka dou sa sega ni vinakata; de sa tiko na veileti, kei na vuvu, kei na cudrucudru, kei na veiba, kei na kakase, kei na vakasolokakana, kei na viavialevu, kei na ue.

21De vakayalomalumalumutaki au e na matamudou na noqu Kalou ni'u sa lako tale yani, ka deu tagicaki ira kina era lewe vuqa era sai valavala ca oti, ka sega ni veivutunitaka na veika dukadukali, kei na dauyalewa, kei nai tovo vakasisila ni veidauci era sa kitaka.