Vakarua 15 - Ai Vola Tabu (Vakadewa Makawa Vakavoutaki 2021)（FRV21）

Na Yabaki ni Vakacecegu(Vunau ni Soro 25.1-7)

1“E na mua ni kavitu ni veiyabaki, mo ni dauia e dua na veisereki.

2Sa vakaoqo nai valavala ni veisereki: a tamata yadua sa soli-ka vua na kai nona me qai sereka ka me kakua ni saumi lesu. Me kakua ni taroga vua na kai nona se na wekana, ni sa kacivaki na veisereki i Jiova.

3E rawa mo ni la'ki taroga vua na kai tani, ia na ka sa nomuni ka sa tu vua na wekamuni mo ni sereka ga ka me kakua ni saumi.

4Ia ena sega kina ni dua na tamata me dravudravua vei kemuni, ni na vakalougatataki kemuni vakalevu ko Jiova e na vanua sa solia vei kemuni ko Jiova na nomuni Kalou me nomuni votavota mo ni taukena,

5ka kevaka walega ko ni sa vakarorogo vakavinaka ki na domo i Jiova na nomuni Kalou, ka nanuma mo ni cakava nai vakaro kecega oqo ka'u sa vakarota vei kemuni edaidai.

6Ni na vakalougatataki kemuni ko Jiova na nomuni Kalou, me vaka sa yalataka vei kemuni, ia ko ni na dausoli-ka vei ira na veimatanitu e vuqa, ia ko ni na sega ni kerekere; ko ni na lewa talega na matanitu e vuqa, ia era na sega ni lewai kemuni.

7 Vsoro 25.35 “Kevaka sa tiko vei kemuni na tamata dravudravua, e dua vei ira na wekamuni, e na dua na nomuni lomanibai, e na nomuni vanua sa solia vei kemuni ko Jiova na nomuni Kalou, mo ni kakua ni vakaukauwataka na yalomuni se qumia na ligamuni vua na wekamuni dravudravua,

8ia mo ni dedeka ga na ligamuni vei koya, ka solia vua na ka me sotavi kina na nona gagadre, se mani cava soti na ka e gadreva.

9Mo ni qarauni kemuni de dua na nanuma ca e na basika e yalomuni, ka vaka, ‘Sa voleka mai nai kavitu ni yabaki, na yabaki ni veisereki’, ka sa ca na matamuni vua na wekamuni dravudravua, ka ko ni sega ni cakacaka vakayalololoma vua; ka sa rawa ni tagi kina vei Jiova e na vukumuni ko koya, ka ko ni sa cala kina.

10Mo ni dausoli ka ni loloma e na yalo savu, ka mo ni kakua ni dauyaloca ni ko ni sa soli-ka vua, ni vuku ni ka oqo ena vakalougatataki kemuni kina ko Jiova na nomuni Kalou e na nomuni cakacaka kecega, kei na ka kecega sa cakava na ligamuni.

11Maciu 26.11; Mari 14.7; Joni 12.8Ni na sega ni mudu na tamata dravudravua e na loma ni vanua, o koya ka'u sa vakaroti kemuni kina, ka kaya, ‘Mo ni dedeka sara na ligamuni vua na wekamuni, ki na nomuni tamata wale, kei na nomuni tamata dravudravua, e na nomuni vanua.’

Vakaro e Vauci Ira na Bobula(Lako Yani 21.1-11)

12 Vsoro 25.39-46 “Kevaka sa volitaki vei kemuni e dua na wekamuni, sa Iperiu tagane, se sa Iperiu yalewa, ka sa qaravi kemuni ka yabaki ono, ia mo ni qai sereki koya me lako yani e na galala e nai kavitu ni yabaki.

13Ia ni kemuni sa laiva e dua na bobula tagane me sa lako e na galala, mo ni kakua ni laivi koya me lako liga lala yani.

14Mo ni solia vakayauyau vei koya na veika mai na nomuni qele ni manumanu, mai na nomuni rara ni samu sila, kei na nomuni keli-waini, ka mo ni solia vei koya eso na ka sa vakalougatataki kemuni kina ko Jiova na nomuni Kalou.

15Mo ni daunanuma ni kemuni a bobula taumada mai na vanua ko Ijipita, ka sa qai vakabulai kemuni ko Jiova na nomuni Kalou; o koya ka'u sa vakarota kina na ka oqo vei kemuni edaidai.

16Ia kevaka sa kaya vei kemuni ko koya, ‘Au na sega ni lako tani vei kemuni’, ka ni sa lomani kemuni kei na nomuni lewe-ni-vuvale ko koya, ni sa tiko vinaka kei kemuni,

17mo ni qai taura nai cula ka cula na daligana ka veituituitaka kei nai sogo ni vale, ena qai nomuni bobula ka sega ni mudu.

Ia mo ni kitaka talega vakakina vua na nomuni bobula yalewa.

18Mo ni kakua ni nanuma ni sa ka dredre vei kemuni mo ni sereki koya me lako yani e na galala, ni sa tautauvata na nona qaravi kemuni e na loma ni yabaki ono kei na nona qaravi kemuni e na loma ni yabaki tinikarua na tamata sa voli na nona cakacaka. Ia ena vakalougatataki kemuni ko Jiova na nomuni Kalou e na ka kecega ko ni sa cakava.

Vakaro e Vauci Ira na Ulumatua ni Manumanu

19 Lako 13.12 “A ulumatua tagane kecega ni nomuni bulumakau kei na nomuni sipi mo ni vakatabuya me nei Jiova na nomuni Kalou. Mo ni kakua ni vakayagataka na ulumatua ni nomuni bulumakau e na dua na cakacaka, ka mo ni kakua talega ni kotiva na ulumatua ni nomuni sipi.

20Mo ni kania ga, koi kemuni kei na nomuni lewe-ni-vuvale, e na mata i Jiova na nomuni Kalou, e na veiyabaki, e na yasana sa digitaka ko Jiova.

21Ia kevaka sa ca e dua na tikina—ke sa lokiloki, se mataboko, se dua na tikina e ca—mo ni kakua ni vakacabora vei Jiova na nomuni Kalou.

22Mo ni kania e nomuni lomanibai, ko koya sa sega ni savasava vata kei koya sa savasava, me vaka na kaseli kei na dia.

23Vteki 9.4; Vsoro 7.26,27; 17.10-14; 19.26; Vrua 12.16,23Ia na kena dra ga mo ni kakua ni kania; mo ni livia tani ga ki na qele me vaka na wai.