Roma 5 - Ai Vola Tabu (Vakadewa Makawa Vakavoutaki 2021)（FRV21）

Na Noda Vakadonui Vua na Kalou

1O koya oqo, ni da sa vakadonui e na vakabauta, me da sa qai veivinakati kei na Kalou e na vuku ni noda Turaga ko Jisu Karisito,

2e na vukuna talega eda sa torova rawa kina, e na vakabauta na loloma oqo eda sa qai tu kina; me da sa reki talega ni da sa nuitaka na veivakalougatataki ni Kalou.

3A sa sega ni ko ya walega, me da sa daureki talega e na vuku ni veika rarawa, ni da sa kila sa tubu na dauvosota mai na ka rarawa,

4ka tubu nai vakarau vinaka mai na dauvosota, kei nai nuinui mai nai vakarau vinaka,

5ka sa sega na madua e na vuku ni nuinui, ni sa sovaraki ki na yaloda na loloma ni Kalou ni sa soli vei keda na Yalo Tabu.

6Ni da se malumalumu voli, a sa mate na Karisito e na vuku ni tamata i valavala ca e na gauna taudonu.

7Ka dina sara, ni sa sega ni dauyaco me mate e dua e na vukuna na tamata yalododonu—de sa rawa beka vua e dua me na mate e na vukuna e dua na tamata vinaka.

8Ia na Kalou sa vakatakila na nona loloma vei keda, ni sa mate na Karisito e na vukuda ni da se tamata i valavala ca voli ga.

9Ia ni da sa qai vakadonui oqo e na vuku ni nona dra, ena qai vakalevu cake sara na noda vakabulai e na vukuna mai na cudru ni Kalou.

10Ni gauna eda a veimecaki voli kina, eda sa qai vakaduavatataki tale kei na Kalou e na vuku ni nona mate na Luvena, ka uasivi sara, ni da sa vakaduavatataki rawa, eda na vakabulai e na vuku ni nona bula.

11Ia sa sega ni ko ya walega, eda sa vakavinavinaka talega vua na Kalou e na vuku ni noda Turaga ko Jisu Karisito, o koya ka sa vakavuna me da ciqoma na veivakaduavatataki.

Ko Atama kei Karisito

12 Vteki 3.6 Ia me vaka sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca, a sa yaco vakakina na mate ki na tamata kecega, ni sa daucaka cala na tamata kecega—

13ka sa tu ga eliu e vuravura nai valavala ca ni se bera ni soli nai vunau, ia sa sega ni wili nai valavala ca ke sa sega nai vunau.

14Ia mai na gauna i Atama ka yacova na gauna i Mosese, a sa daulewa ko mate, ka vakakina vei ira talega era sa sega ni valavala ca me vaka na talaidredre i Atama, o koya ka nona i vakatakarakara ko koya sa lako mai e muri.

15Ia nai solisoli loloma sa sega ni tautauvata kei na talaidredre. Ka kevaka sa mate na lewe vuqa e na vuku ni nona talaidredre na le dua, sa qai levu cake sara na kena yaco vakalevu vei ira na lewe vuqa na yalololoma ni Kalou kei na loloma soli wale e na vuku ni nona loloma na tamata e le dua, ko Jisu Karisito.

16Erau sa sega ni tautauvata na ka sa yaco e na vuku ni nona cala e dua na tamata kei na loloma soli wale. Ni lewa ka sa tau-muria mai na talaidredre e dua bauga sa kauta mai na cudruvi, ia na loloma soli wale ka sa tau-muria mai na talaidredre e vuqa sa kauta mai na veivakadonui.

17Ia, e na vuku ni talaidredre ni le dua, ka sa gumatua ko mate e na vuku ni talaidredre oqori, ena qai uasivi cake sara vei ira sa ciqoma na loloma levu kei na loloma soli wale ni yalododonu, me ra gumatua e na bula e na vukuna na le dua, ko Jisu Karisito.

18O koya oqo, me vaka sa lewai me cudruvi na tamata kecega e na vuku ni nona cala e dua bau na tamata, sa vakayacori talega vakakina e na vuku ni nona valavala dodonu e dua bau na tamata me ra vakadonui ka vakabulai kina na tamata kecega.

19Ka me vaka ni sa vakacalai na lewe vuqa e na nona talaidredre e dua bau na tamata, sa vakadonui vaka talega kina na lewe vuqa e na vuku ni nona talairawarawa e dua bau na tamata.

20Ia ni sa kau mai na vunau, sa tubu vakalevu nai valavala ca; ia ni sa tubu cake nai valavala ca, sa qai tubu cake vakalevu sara na loloma,

21me rawa kina, me vaka ni sa gumatua nai valavala ca ki na mate, me gumatua vaka talega kina na loloma, e na vakadonui, ki na bula tawa mudu, e na vuku i Jisu Karisito na noda Turaga.