2 Tui 19 - Ai Vola Tabu (Vakadewa Makawa Vakavoutaki 2021)（FRV21）

Sa Vakararavi vei Jiova ko Esekaia(Aisea 37.1-7)

1Ia ni sa rogoca ko Esekaia na tui, sa dresulaka na nona i sulu, ka vakasulumi koya e nai sulu taga, ka la'ki curu ki na vale i Jiova.

2A sa talai Elaiakimi, o koya ka lewa na vale, kei Sepina na vunivola, kei ira era qase vei ira na bete ni ra sa vakaisulu e nai sulu taga, kivei Aisea na parofita na luve i Emosi.

3A ratou sa kaya vua, “Sa kaya vakaoqo ko Esekaia, Sa dua na siga ni veivakararawataki kei na veivunauci kei na veivakamadualaki na siga oqo; ni ra sa voleka ni sucu na gone, ka sega na kaukauwa me ra vakasucumi kina.

4E rairai a rogoca beka ko Jiova na nomu Kalou na vosa kecega i Rapisake, o koya sa tala mai ko tui Asiria na nona turaga, me vosavakacacataka na Kalou bula, ka vunauca na vosa sa rogoca ko Jiova na nomu Kalou; o koya oqo mo qai cavuta kina na masu e na vukudra na lewe lailai sa vo tiko.”

5Ni ratou sa lako vei Aisea ko iratou nai talaki i Esekaia na tui,

6a sa kaya vei iratou ko Aisea, “Dou la'ki kaya vakaoqo vua na nomudou turaga, ‘Sa kaya vakaoqo ko Jiova: Mo kakua ni rere e na vuku ni vosa ko sa rogoca, ka ratou sa vosavakacacataki au kina ko iratou na nona tamata na tui Asiria.

7Raica, ka'u na biuta ki vua e dua na yalo, ka na rogoca kina ko koya e dua nai tukutuku ka lesu yani ki na nona vanua, ka'u na vakabalei koya e nai seleiwau e na nona vanua.’ ”

Na Vosa ni Veivakarerei nei Asiria(Aisea 37.8-20)

8A sa lesu yani ko Rapisake, a sa kunei tui Asiria ni sa vala kei Lipina; ni sa rogoca oti ko koya ni sa lako tani ko koya na tui mai Lakisi.

9Ia ni sa rogoca ko koya na tui e na vuku i Tiraka, na tui Eciopea, ka vaka, “Raica, sa mai veivala kei iko ko koya,” sa qai tala tale ko koya eso na tamata vei Esekaia, ka kaya,

10“Dou vosa vakaoqo vei Esekaia na tui Juta, ka kaya: Me kakua ni vakaisini iko na nomu Kalou, o koya ko sa vakararavi kina, ni sa yalataka ni na sega ni soli ko Jerusalemi ki na liga i tui Asiria.

11Raica, ko sa rogoca oti na ka era sa cakava na tui Asiria ki na veivanua kecega, ni sa vakarusai ira sara. Ia ko na vakabulai beka ko iko?

12Era sa vakabula li ko ira na nodra kalou ni vanua na veivanua ka ra vakarusa ko iratou na noqu qase, io, ko Kosani, kei Arani, kei Resefi, kei ira na luve i Iteni era tiko mai Tilasari?

13Sa evei ko tui Emaci, kei tui Apati, kei na tui ni koro ko Sifaveimi, kei Ena, kei Iva?”

Na Masu nei Esekaia

14A sa taura nai vola ko Esekaia mai na ligadratou na tamata, ka wilika; a sa lako cake ko Esekaia ki na vale i Jiova, ka sa tevuka e na mata i Jiova.

15Lako 25.22A sa masu ko Esekaia e na mata i Jiova, ka sa kaya, “Kemuni Jiova na nodra Kalou na Isireli, o koya sa tiko e na tadrua ni jerupi, koi kemuni vakai kemuni ga sa Kalou ni veimatanitu kecega e vuravura; koi kemuni sa bulia na lomalagi kei na vuravura.

16I Jiova, mo ni vakalakala daligamuni, ka vakarorogo; I Jiova, mo ni vakayadrata na matamuni, ka raica; ka rogoca na vosa i Senakaripi, o koya sa talai koya me vosavakacacataka na Kalou bula.

17Kemuni Jiova, e dina ni ratou sa vakarusa na lewe ni veivanua kei na nodra vanua ko ira na tui Asiria,

18ka ratou sa biuta ki na bukawaqa na nodra kalou, ni ra sa sega ni kalou, ia era sa cakacaka walega ni liga ni tamata—na kau kei na vatu—ka ratou sa vakarusai kina.

19Ia oqo, i Jiova na neimami Kalou, mo ni vakabulai keimami mai na ligana, me ra kila kina na veimatanitu kecega e vuravura ni sai kemuni ko Jiova na Kalou, koi kemuni duaduaga.”

Tukutuku i Aisea ki Vua na Tui(Aisea 37.21-38)

20A sa talaki vei Esekaia ko Aisea na luve i Emosi, ka kaya, “Sa kaya vakaoqo ko Jiova na nodra Kalou na Isireli: Ni ko sa masu vei au e na vuku i Senakaripi na tui Asiria, ka'u sa rogoca.

21Oqo na vosa sa cavuta e na vukuna ko Jiova:

“Sa beci iko, ka matacataki iko—

na goneyalewa tabutagane ni Saioni;

sa kurea na uluna mai dakumu—

na goneyalewa ni Jerusalemi.

22“Ko sa vosavakacacataki cei, ka vakaucacataka?

Kivei cei beka ko sa tabalaka kina na domomu

ka rai cake kina?

Vei koya ga na Yalosavasava e Isireli!

23O sa vosavakacacataka na Turaga e na gusudra na nomu i talaki,

ka sa kaya,

‘Au sa cabe cake e na noqu qiqi-ni-valu e vuqa,

ki na kena cecere ni veiulunivanua, ki na veiyasa i Lepanoni;

ia ka'u na taya sobu na kena veisitari balabalavu,

kei na kena veidamanu talei;

ia ka'u na curuma na vale mai na nona i yalayala,

e na loma ni kena veikau loa.

24Au sa kelia nai keli-wai

ka gunuva na wai tani,

ka vakamamacataka e na qeteqete ni yavaqu

na uciwai kecega ni Ijipita.’

25“O sa sega beka ni rogoca

ni'u a se cakava makawa?

Au a tuvana mai liu sara

na veika au sa qai vakayacora oqo,

mo vukica me ra binibini benu

na veikoro vakabai,

26o koya era sa malumalumu kina na lewena,

ka sa waicala na yalodra ka rere;

era sa vaka na co ni vanua

kei na co drokadroka sa qai rovu,

ka vaka na co mai na dela ni vale,

kei na sila sa malai ni sa cadra cake walega.

27“Ia ka'u sa kila na nomu dabe sobu

kei na nomu curu ki tuba kei na nomu curu ki loma,

kei na nomu cudru levu vei au.

28Ni sa lako cake ki daligaqu

na nomu cudru vei au kei na nomu viavialevu,

ka'u na qai vakacuruma ki na ucumu na noqu siwa

ka vakaciqira na noqu i tubetube ki na gusumu;

ia ka'u na vakasukai iko tale yani

e na sala ko a lako mai kina.

29“Ia oqo sa na kenai vakadinadina vei iko: Dou na kania e na yabaki oqo na ka sa tubu walega, kei na kenai karua ni yabaki na ka sa tubu walega mai kina; ia e na kenai katolu ni yabaki dou kaburaka, ka tamusuka, ka tea na veiloga-ni-vaini, ka kania na vuana.

30Ena tei sobu tale na vo-ni-bula ni lewe-ni-vuvale i Juta, ka vua ki cake.

31Ni na lako tani mai Jerusalemi na vo-ni-bula, kei ira era dro bula mai na Ulunivanua ko Saioni. Ena kitaka na ka oqo na lomakatakata i Jiova-ni-lewevuqa.

32“O koya oqo sa kaya kina ko Jiova e na vuku i tui Asiria: Ena sega ni curu mai ki na koro oqo, se vanataka kina e dua na gasau, se mai tu kina vakasasabai, se viri suva kina.

33E na sala sa lako mai kina, ko ya ga ena lesu tale yani kina, ka na sega ni curu ki na koro oqo, sa kaya ko Jiova.

34Ia ka'u na vakatawa na koro oqo, ka vakabula, e na vukuqu, e na vukui Tevita talega na noqu tamata.”

Na Druka kei na Mate i Senakaripi na Tui Asiria

35Ia e na bogi ko ya, sa lako yani na agilosi i Jiova, ka vakamatea e na nodra i tikotiko ni valu e le tinikawalu na oba ka lima na udolu (185,000) na kai Asiria. Ia ni ra sa sou e na mataka, raica, era sa mate koto kecega.

36A sa lako tani ko Senakaripi na tui Asiria, ka la'ki lesu, ka tiko mai Ninive.

37Ia ni sa soro tiko ko koya e na burekalou i Nisiroki na nona kalou, erau sa vakamatei koya e nai seleiwau koi rau na luvena ko Etirameleki kei Saresa, ka rau sa dro bula ki na vanua ko Ararata. A sa lewa ko Esa-atoni na luvena, me kenai sosomi.