Lako Yani 21 - Ai Vola Tabu (Vakadewa Makawa Vakavoutaki 2021)（FRV21）

Nai Vakaro me Baleti Ira na Bobula(Vakarua 15.12-18)

1“Ia oqo na vunau mo tauca vei ira.

2 Vsoro 25.39-46 Kevaka ko sa volia e dua na Iperiu me nomu bobula, me qaravi iko ko koya ka yabaki ono ga, ia e na kenai kavitu sa na sereki wale yani.

3Kevaka sa lako duadua ga mai vakai koya, me na lako duadua tale yani vakai koya; kevaka sa vakawati ni sa lako mai, ena lako vata kaya na watina.

4Kevaka sa solia vua e dua na watina ko koya na nona turaga, ka sa vakasucuma ko koya na luvena tagane se na luvena yalewa; sa na nei koya na nona turaga na watina kei na luvena, ia me na lako duadua yani ko koya vakai koya ga.

5Ia kevaka sa kaya vakadodonu na tamata, ‘Au sa lomana na noqu turaga, kei na watiqu, kei na luvequ; au sa sega ni via sereki’,

6ia me qai kauti koya na nona turaga vei ira na turaganilewa. Me qai kau ko koya ki na katuba se na duru ni sogo; ka me qai cula-basika na daligana ko koya na nona turaga e na dua nai cula; ena qai qaravi koya ko koya me yacova na mate.

7“Kevaka sa volitaka na luvena yalewa e dua na tamata me bobula, ena sega ni lako yani ko koya me vakataki ira na tagane bobula.

8Kevaka sa sega ni vinakati koya na nona turaga, ni sa kaya oti me watina, me qai laivi koya ko koya me voli tale. Sa tabu vua me volitaka ki na kai tani, ni sa vakaisini koya ko koya.

9Ia kevaka sa musuka vua na luvena, me na qai cakacaka vua me vaka sa luvena yalewa.

10Kevaka sa vakawati kei na dua tale; ena sega ni vakalailaitaki kina na kena kakana, na nona i sulu, kei na nona i valavala vakaveiwatini

11Ia kevaka sa sega ni via cakava vua na ka tolutolu oqo, me na qai lako wale yani ko koya, sa na sega ni voli e nai lavo.

Nai Vakaro me Baleta nai Valavala Kaukauwa

12 Vsoro 24.17 “O koya sa yavita mate e dua na tamata, ena vakamatei vakaidina ko koya.

13Tiko 35.10-34; Vrua 19.1-13; Josua 20.1-9Ia kevaka sa sega ni nakita na tamata, ia sa solia ki na ligana na Kalou; au na lesia vei iko na koro me dro kina ko koya.

14Ia kevaka e dua na tamata sa nakita me vakamatea na kai nona, ni sa lawakitaka; ko na qai kauta tani mai na noqu i cabocabo-ni-soro, me mate.

15“O koya sa yavita na tamana se tinana, ena vakamatei vakaidina.

16 Vrua 24.7 “O koya sa butakoca e dua na tamata, ka volitaki koya, se sa kune ga vua, ena vakamatei vakaidina.

17 Vsoro 20.9; Maciu 15.4; Mari 7.10 “O koya sa rukaka na tamana se tinana, ena vakamatei vakaidina.

18“Kevaka erau veivala e lewe rua na tamata ka dua sa yavita nai karua e na vatu se na ligana, ka sa sega ni mate ko koya, ia sa davo ga e nona i mocemoce,

19ka kevaka sa qai duri tale ka vakaititoko voli e tautuba, me qai kakua ni cudruvi kina ko koya ka yavita; ia me na sauma ga vua na siga sa davo kina, ka sauma talega na ka me bula vinaka tale kina.

20“Kevaka sa yavita na nona tamata se nona vada e dua na tamata e na kau, ka sa ciba ni sa yaviti tiko; ena cudruvi vakaidina.

21Ia kevaka sa bula bogi dua se bogi rua, ena sega ni cudruvi, ni sa nona i yau ko koya na tamata.

22“Kevaka erau veivala e lewe rua na tamata, ka mavoa kina e dua na yalewa sa bukete, ka sa lutudole kina, ia sa sega ga na kena leqa e muri, me na totogi vakaidina ko koya e veimoku, me vaka na ka sa lewa vua ko koya na wati yalewa, ka me sauma nai sau sa vakadonuya na mataveilewai.

23Ia kevaka e mani yaco na leqa, ko na qai sauma na mate e na mate,

24Vsoro 24.19,20; Vrua 19.21; Maciu 5.38na mata mei sau ni mata, na bati mei sau ni bati, na liga mei sau ni liga, na yava mei sau ni yava,

25na kama mei sau ni kama, na mavoa mei sau ni mavoa, na kuita mei sau ni kuita.

26“Kevaka sa yavita na mata ni nona tamata, se na mata ni nona vada e dua na tamata, ka sa boko kina, me qai sereki koya me lako yani e na vuku ni matana.

27Ia kevaka sa tila yani na batina na nona tamata, se na batina na nona vada, me qai sereki koya me lako yani e na vuku ni batina.

Nai Tavi ni Taukei ni Yau kei na Manumanu

28“Kevaka sa leuta e dua na tagane se dua na yalewa na bulumakau, a sa mate kina; ena lauviri mate vakaidina na bulumakau, ka na sega ni kani na lewena; ia ena sega ni cudruvi na kenai taukei.

29Ia kevaka sa dauveileu eliu na bulumakau ko ya, a sa tukuni oti vua na kenai taukei, a sa sega ni viribaita ko koya, a sa vakamatea kina e dua na tagane se dua na yalewa, ena lauviri mate na bulumakau, ena vakamatei talega na kenai taukei.

30Kevaka sa lewai vua me totogi lavo me kenai sau, me qai solia ko koya na ka sa lesi vua me kenai voli ni nona bula.

31Se leuta na gonetagane, se leuta na goneyalewa, ena caka vua me vaka na lewa oqo.

32Kevaka sa leuta na tamata se na vada na bulumakau; ena solia ko koya vua na nona turaga e tolusagavulu na sikeli siliva, me qai lauviri mate na bulumakau.

33“Kevaka sa sega ni ubia nai keli-wai e dua na tamata, se dua na tamata sa kelia nai keli-wai ka sega ni ubia, ka sa sikalutu kina e dua na bulumakau se dua na asa,

34ena sauma ga nai taukei ni keli-wai. Ena solia ko koya nai lavo ki vua na kenai taukei, ka na qai nona na manumanu sa mate.

35“Kevaka sa vakacacana na nona bulumakau e dua na tamata na bulumakau ni tani, ka sa mate kina, erau na qai volitaka na bulumakau sa bula, ka wasea rua na kenai voli me nodrau; me rau na wasea rua talega na manumanu sa mate.

36Ia kevaka sa kilai ni sa dauveileu eliu na bulumakau, a sa sega ni viribaita na kenai taukei, ena sauma vakaidina ko koya na kenai taukei na bulumakau e na bulumakau, ia ena maroroya na manumanu sa mate.