Same 145 - Ai Vola Tabu (Vakadewa Makawa Vakavoutaki 2021)（FRV21）

Na Cecere kei na Vinaka ni Kalou A vakacaucau. A nei Tevita.

1Au na vakacaucautaki kemuni, na noqu Kalou, na Tui;

ia ena sega ni mudu na noqu vakavinavinaka ki na yacamuni.

2E na veisiga kecega ka'u na vakavinavinaka vei kemuni;

ia ena sega ni mudu na noqu seretaka na yacamuni.

3Sa levu ko Jiova, a sa dodonu me vakavinavinakataki vakalevu;

ia sa sega ni kilai rawa na kena levu.

4Ena seretaka na nomuni cakacaka na veitabatamata era sa veitaravi,

ka tukuna na nomuni cakacaka kaukauwa.

5Au na cavuta voli na lagilagi ni kemuni rogorogo vakaturaga levu,

kei na nomuni cakacaka sa veivakurabuitaki.

6Ia era na vosataka na kena kaukauwa na nomuni cakacaka rerevaki,

ia ka'u na tukuna voli talega na nomuni levu.

7Era na daucavuta tikoga na ka me nanumi kina na nomuni yalololoma levu,

ka seretaka na nomuni cakacaka dodonu.

8Sa daulomasoli ko Jiova, ka yalololoma;

sa dauberabera ni cudru, a sa levu na nona loloma.

9Sa yalovinaka ko Jiova vei ira na tamata kecega,

ka sa yacova na nona cakacaka kecega na nona yalololoma.

10Sa vakacaucautaki kemuni Jiova, na nomuni cakacaka kecega,

ka ra sa vakavinavinakataki kemuni na nomuni tamata yalododonu.

11Era sa vosataka na kena totoka ni nomuni matanitu,

ka veivosakitaka na nomuni kaukauwa,

12me ra vakarogoya vei ira na luve ni tamata na nona cakacaka kaukauwa,

kei na lagilagi vakaturaga ni nona matanitu.

13A nomuni matanitu sa tiko ga e na veigauna kecega ka sega ni mudu,

ka sa yacova nai tabatamata kecega na nomuni lewa.

14Sa tokoni ira kecega era sa bale ko Jiova,

ka sa vakatudonutaki ira kecega era sa vakalairoro.

15Sa rai vei kemuni na matadra na ka kecega;

ia ko ni sa solia vei ira na kedra kakana e na gauna e dodonu kina.

16O ni sa dedeka na ligamuni,

ka vakamamautaka na ka bula kecega e na ka era gadreva.

17Sa dodonu ko Jiova e na nona i valavala kecega,

ka yalololoma e na nona cakacaka kecega.

18Sa voleka ko Jiova vei ira kecega era sa masu vua,

vei ira kecega era masu vua e na yalodina.

19Ena vakayacora ko koya na ka era gadreva ko ira era rerevaki koya;

ena rogoca talega na nodra tagi, ka na vakabulai ira.

20Sa maroroi ira kecega era lomani koya ko Jiova,

ia ena vakawabokotaki ira kecega nai valavala ca.

21Ena vosataka na gusuqu na nona vinaka ko Jiova,

ia me vakavinavinakataka talega na yacana tabu na tamata kecega, ka sega ni mudu.