2 Tui 1 - Ai Vola Tabu (Vakadewa Makawa Vakavoutaki 2021)（FRV21）

Ko Ilaijia kei Easaia na Tui Isireli

1Ia ni sa mate ko Eapi, sa qai bese ni qaravi ira tiko na Isireli ko ira na Moapi.

2A sa lutu ko Easaia mai nai sogo cicila e nona i taba loma-ni-vale e cake mai Samaria, ka sa tauvi mate kina; a sa tala kina eso na tamata ko koya, ka sa kaya vei iratou, “Dou la'ki tarogi Peali-sipupi na kalou ni Ekironi, se'u na bula tale mai na tauvi mate oqo, se segai.”

3Ia sa kaya na agilosi i Jiova vei Ilaijia na kai Tisipa, “Mo ia, mo la'ki tavaki iratou nai talaki nei tui Samaria, ka kaya vei iratou, ‘Sa sega beka na Kalou e Isireli, dou sa lako kina me tarogi Peali-sipupi na kalou ni Ekironi?’

4O koya oqo sa kaya kina ko Jiova, ‘Ko na sega ni kevu sobu tale mai nai mocemoce ko sa cabe cake kina, ia ko na mate vakaidina ga.’ ” A sa lako yani ko Ilaijia.

5A sa lesu tale vua na tui ko iratou nai talaki, ka sa kaya vei iratou ko koya, “A cava dou sa qai lesu tale mai kina?”

6A ratou sa kaya vua, “Sa lako cake mai e dua na tamata me tavaki keitou, ka sa kaya vei keitou, ‘Dou lesu tale vua na tui ka talai kemudou, ka kaya vua: Sa vosa vakaoqo ko Jiova: Sa sega beka na Kalou e Isireli, ko sa talatala kina me tarogi Peali-sipupi na kalou ni Ekironi? O koya oqo ko na sega ni kevu sobu tale mai nai mocemoce ko sa cabe cake kina, ia ko na mate vakaidina ga.’ ”

7A sa kaya vei iratou ko koya, “A tamata vakacava ka lako cake me tavaki kemudou ka tukuna vei kemudou na vosa oqo?”

8Maciu 3.4; Mari 1.6A ratou sa kaya vua, “A tamata sa vakaisulu e nai sulu vuti-ka-ni-manumanu, ka sa vau na tolona e nai vau kuli-ni-manumanu.” A sa kaya ko koya, “Oqori ko Ilaijia na kai Tisipa.”

9Sa qai tala vua ko koya e dua na kavetani ni le limasagavulu, kei ira vata kaya na nona tamata le limasagavulu. A sa lako cake vua ko koya, ka raica, sa tiko ko koya e na dua na dela-ni-koro. A sa kaya vua ko koya, “O iko na tamata ni Kalou, sa kaya na tui, ‘Mo lako sobu mai.’ ”

10Luke 9.54Ia sa vosa ko Ilaijia vua na kavetani ni le limasagavulu, ka kaya, “Kevaka ka'u sa tamata ni Kalou, me lako sobu mai lomalagi na bukawaqa ka kani iko kei ira na nomu tamata le limasagavulu.” A sa qai lako sobu mai lomalagi na bukawaqa, ka sa kani koya kei ira na nona tamata le limasagavulu.

11A sa qai tala tale vua ko koya e dua na kavetani ni le limasagavulu, kei ira vata kaya na nona tamata le limasagavulu. A sa vosa ko koya, ka kaya vua, “O iko na tamata ni Kalou, sa kaya vakaoqo na tui, ‘Mo lako sobu mai vakatotolo!’ ”

12Ia sa sauma ko Ilaijia, ka kaya vei ira, “Kevaka ka'u sa tamata ni Kalou, me lako sobu mai lomalagi na bukawaqa, ka kani iko kei ira na nomu tamata le limasagavulu.” A sa qai lako sobu na bukawaqa ni Kalou mai lomalagi, ka kani koya kei ira na nona tamata le limasagavulu.

13A sa qai tala tale ko koya na kavetani ni kenai katolu ni le limasagavulu, kei ira vata kaya na nona tamata le limasagavulu. A sa lako cake na kenai katolu ni kavetani ni le limasagavulu, ka la'ki tekiduru e na mata i Ilaijia, ka vakamamasu vua, ka kaya vua, “Oi kemuni na tamata ni Kalou, me ka talei e matamuni na noqu bula, kei na nodra bula na nomuni tamata e le limasagavulu oqo.

14Raica, sa lako sobu mai lomalagi na bukawaqa ka kani rau na kavetani ni le limasagavulu erau liu mai, kei na nodrau tamata yayalimasagavulu. Ia oqo, me ka talei e matamuni na noqu bula.”

15A sa kaya vei Ilaijia na agilosi i Jiova, “Mo drau lako sobu kaya; kakua ni rerevaki koya.” A sa cavu tu ko koya, ka lako sobu kaya vua na tui,

16ka sa kaya vua ko koya, “Sa vosa vakaoqo ko Jiova: Ni ko a talai iratou nai talaki me tarogi Peali-sipupi na kalou ni Ekironi—sa ka beka ni sa sega na Kalou e Isireli mo taroga kina na nona vosa? — o koya oqo ko na sega kina ni kevu sobu mai nai mocemoce ko sa cabe cake kina, ia ko na mate vakaidina ga.”

Sa Mate ko Easaia

17A sa qai mate ko koya me vaka na vosa i Jiova ka cavuta ko Ilaijia. A sa tekivu me lewa ko Jiorami na tacina me kenai sosomi, e na kenai karua ni yabaki i Jiorami na luve i Josefati na tui Juta; ni sa sega na luvena tagane ko Easaia.

18Ia na kena vo ni cakacaka i Easaia ka kitaka ko koya, sa sega li ni volai e nai Vola ni Veika sa Caka e na Nodra Gauna na Tui Isireli?