2 Tui 11 - Ai Vola Tabu (Vakadewa Makawa Vakavoutaki 2021)（FRV21）

Sa Veiliutaki e Juta ko Acalaia na Ranadi(2 Veigauna 22.10—23.15)

1Ni sa raica ko Acalaia na tina i Easaia ni sa mate na luvena, sa ia ko koya ka vakawabokotaka kecega na kawa ni tui.

2Ia na gane i Easaia, ko Jiosepa na luve i Jorami na tui, sa kauta vuni na luve i Easaia, ko Joasa, mai na kedra maliwa na luve ni tui era sa moku; ka sa vunitaki koya mai vei Acalaia e na vale ni moce, kei koya sa susuga, ka sa sega kina ni mate ko koya.

3A rau sa vuni vata kaya e na vale i Jiova, ka yabaki ono, ka sa liutaka tiko na vanua ko Acalaia.

Sa Lumuti Jioasi na Gone Lailai ko Jioiata na Bete

4Ia e na kenai kavitu ni yabaki, sa talaki ko Jioiata, ka kauti ira mai na turaga ni yayadrau, kei ira na kavetani ni valu, kei ira nai vakatawa, ka sa kauti ira vua ki na vale i Jiova, ka ia na veiyalayalati kei ira, ka vakabubuluitaki ira e na vale i Jiova, ka vakaraitaka vei ira na luvena na tui.

5A sa vakaroti ira, ka kaya, “Dou cakava na ka oqo: me dua na kena wase-i-tolu vei kemudou, ko ira sa curu mai e na Siga ni Vakacecegu me vakatawa na vale-ni-tui

6(kei nai karua ni kena wase-i-tolu me tiko e na matamata-ni-koro ko Suri, kei nai katolu ni kena wase-i-tolu me tiko e na matamata-ni-koro mai dakudra nai vakatawa) me ra yadrava na vale-ni-tui me kakua ni curu kina e dua.

7Na nomudou i wasewase e rua, o ira ka curu yani e na Siga ni Vakacecegu ka yadrava na vale i Jiova e na vukuna na tui,

8me ra qai tiko vakavolivoliti koya na tui, ka me ra dui taura tu na tamata yadua na nona i yaragi. Ia ko koya sa sivita nai yalayala ni vakatawa me na vakamatei. Dou tiko kaya na tui ni sa curu yani ka curu tale mai.”

9A ra sa kitaka ko ira na turaga ni yayadrau me vaka na ka kecega sa vakarota vei ira ko Jioiata na bete; a ra sa dui kauti ira yadua na nona tamata sa dodonu me curu mai e na Siga ni Vakacecegu, kei ira e dodonu me curu yani e na Siga ni Vakacecegu, a ra sa lako vei Jioiata na bete.

10A sa solia ko koya na bete vei ira na turaga ni yayadrau na moto kei nai sasabai i Tevita na tui, ka tu e na vale i Jiova.

11A ra sa wavu tu ko ira nai vakatawa, ni ra sa taura yadua na nona i yaragi, ka vakavolivolita na tui, mai na yasa i matau ni vale ka yaco ki na yasa i mawi ni vale, ka tu voleka ki nai cabocabo-ni-soro kei na vale.

12A sa kauta ki tautuba na luvena na tui ko koya, ka vakaisalataka e nai sala ni tui, ka solia vua nai vola ni vunau. Ka ra sa buli koya me tui, ka lumuti koya, ka ra sa vakasausau, ka kaya, “Me bula balavu na tui!”

Na Mate i Acalaia

13Ia ni sa rogoca ko Acalaia na nodra ue nai vakatawa kei na tamata, sa lako ko koya vei ira na tamata ki na vale i Jiova.

142Tui 23.3Ia ni sa rai yani ko koya, raica, sa tu e na kenai tutu ko koya na tui, me vaka na kenai valavala, kei ira na turaga, kei ira era dau-uvu davui era tu vata kei na tui, a ra sa reki kecega na lewe-ni-vanua, ka uvu davui. A sa dresulaka na nona i sulu ko Acalaia, ka kacivaka, “Na vere! Na vere!”

15Sa qai vakarota ko Jioiata na bete vei ira na turaga ni yayadrau, ko ira na turaga-ni-valu, ka kaya vei ira, “Dou kauti koya ki tautuba e na kedra maliwa nai vakatawa, ka me vakamatei e nai seleiwau na tamata sa muri koya.” Ni sa kaya na bete, “Me kakua ni vakamatei ko koya e na loma ni vale i Jiova.”

16A ra sa taura; a sa lako ko koya e na sala sa daulako kina na ose ki na vale-ni-tui, ka sa vakamatei mai kea.

Vakayacora na Veisau ko Jioiata(2 Veigauna 23.16-21)

17A sa ia ko Jioiata na veiyalayalati kei Jiova kei koya na tui kei ira talega na tamata, me ra nona tamata ko Jiova; vei koya talega na tui kei ira na tamata.

18A ra sa curuma na burekalou i Peali ko ira kecega na lewe-ni-vanua, ka basuraka; ka ra talaraka sobu na kenai cabocabo-ni-soro, ka ra sa vakacataka sara na kena veimatakau, a ra sa vakamatei Matani na bete i Peali e na mata ni cabocabo-ni-soro. Ia sa lesia na bete na turaga eso me lewa na vale i Jiova.

19A sa kauti ira na turaga ni yayadrau, kei ira na kavetani ni valu, kei ira nai vakatawa, kei ra kecega na lewe-ni-vanua; a ra sa kauti koya sobu na tui mai na vale i Jiova, ka lako e na sala sa lako ki na matamata-ni-koro era sa dautiko kina nai vakatawa, ki na vale-ni-tui. A sa tiko ko koya e na nodra i tikotiko vakaturaga na tui.

20A ra sa reki kecega na lewe-ni-vanua, a sa tiko vinaka na koro; a ra sa vakamatei Acalaia e nai seleiwau mai na vale-ni-tui.

21Sa vitu na yabaki i Jioasi ni sa tekivu me lewa.