1Au sa sega li ni lalaga? Au sa sega li ni apositolo koi au? Au a sega li ni raici Jisu Karisito na noda Turaga? Oi kemudou, dou sa sega li ni vua ni noqu veiqaravi e na Turaga?
2Kevaka ka'u sa sega ni apositolo vei ira eso tani, ia ka'u sai apositolo ga vei kemudou, ni dou sai vakadinadina ni noqu cakacaka vakaiapositolo e na vuku ni Turaga.
3Sai koya oqo na veika me na taqomaki au vei ira era vakalewai au.
4Sa sega beka ni tiko vei keitou na dodonu me keitou kana ka gunu?
5Sa sega beka ni tiko vei keitou na dodonu me keitou taura e dua na yalewa lotu, me wati keitou, me vakataki iratou na vo ni apositolo kei iratou na tacina na Turaga, kei Kifa?
6Se sai keirau ga kei Panapasa ka sa sega vei keirau na dodonu me keirau kakua ni cakacaka saumi?
7O cei na sotia sa laki valu e na dua na siga, ka sa saumi koya ga vakai koya? O cei sa tea na loga-ni-vaini ka sa sega ni gunuva na vuana? Se ko cei sa vakania na qele-ni-sipi ka sa sega ni bau gunuva na kena sucu?
8Au sa kaya li na veika oqo e na kaukauwa ga vakatamata? Sa sega beka ni kaya vakakina na vunau?
9Vrua 25.4; 1Timo 5.18Ni sa volai e na vunau i Mosese, “Mo kakua ni vauca na gusu ni bulumakau ni sa buturaka na sila.” Sa kauwaitaka beka ga na bulumakau na Kalou?
10Se sa vosa beka ko koya e na vuku i keitou ga? Io, sa volai oqo e na vuku i keitou, ni sa dodonu me cuki were e na vakanuinui ko koya sa daucuki kei koya na daubutuka na sila me butu sila e na vakanuinui ni rau na vakaivotavota mai na vua ni qele.
11Roma 15.27Kevaka keitou sa kaburaka oti vei kemudou na veika vakayalo, ena sivia beka kevaka me keitou kumuna eso nai yau ni vuravura mai vei kemudou?
12Kevaka sa tu vei ira eso na dodonu me ra namaka oqo vei kemudou, ena sega li ni na levu cake sara vei keitou?
Ia keitou se sega ni vakayagataka sara na dodonu oqo, ia keitou sa vosota ga na ka kecega, de keitou tarova nai tukutuku vinaka kei Karisito.
13Vrua 18.1Dou sa sega beka ni kila, ni ra sa kana e na ka ni vale-ni-soro ko ira sa dauia na cakacaka tabu? Era sa rawata na kedra mai nai cabocabo-ni-soro ko ira era sa dauqarava nai cabocabo-ni-soro?
14Maciu 10.10; Luke 10.7Sa lesia vakakina na Turaga me ra rawata na nodra bula e nai tukutuku-vinaka ko ira era sa dautukuna nai tukutuku-vinaka.
15Ia ka'u sa sega ni vakayagataka e dua vei ira na dodonu oqo, ka'u sa sega talega ni vola na veika oqo me vakayacori kina vei au. Ni sa vinaka cake vei au me'u mate ka ca me dua e tarova na ka ka'u sa dokai au kina!
16Ia kevaka ka'u sa vunautaka nai tukutuku-vinaka, oqori sa sega ni ka me'u dokai au kina, ni sa dodonu ga me'u colata nai tavi oqori. Me'u qai ca koi au kevaka ka'u sa sega ni vunautaka nai tukutuku-vinaka!
17Ni kevaka ka'u sa cakava na ka oqo ni sa vinakata ga na yaloqu, au sa saumi; ia kevaka sa sega ni vinakata na yaloqu, sa qai soli vei au e dua na cakacaka vakaitalatala.
18A cava sa qai kenai sau vei au? Oqo ga: meu dauvunautaka ga nai tukutuku-vinaka ka kakua ni lavaka na kenai sau, ka me'u kakua ni vakayagataka vakataucoko na noqu dodonu e na vuku ni tukutuku-vinaka.
19Ka dina ga ni'u sa lalaga mai na ka kecega, ia ka'u sa qisi au me'u nodra dauveiqaravi na tamata kecega, me'u rawai ira kina na lewe vuqa.
20Ka'u sa yaco me'u vaka na Jiu vei ira na Jiu, me'u rawai ira kina na Jiu. Vei ira sa vauci e na vunau, me'u vaka e dua sa vauci e na vunau (ka dina ga ni'u sa sega ni vauci e na vunau) me'u rawai ira kina era sa vauci e na vunau.
21Vei ira e na taudaku ni vunau, me'u vaka e dua sa tiko e na taudaku ni vunau (ka dina ga ni'u sa sega ni galala mai na vunau ni Kalou, ia ka'u sa tiko ga e na ruku ni vunau i Karisito) me'u rawai ira kina sa tiko e na taudaku ni vunau.
22Vei ira era sa malumalumu ka'u sa yaco me'u vaka e dua sa malumalumu, me'u rawai ira kina era sa malumalumu. Au sa yaco me'u ka kecega vei ira kecega na tamata, me rawa ni'u vakabula kina eso e na sala kece sara.
23Ka'u sa cakava kecega e na vuku ni tukutuku-vinaka, ka me'u vakaivotavota vata kaya na kena veivakalougatataki.
24Dou sa sega beka ni kila ni ra sa cici kecega ko ira sa ciciva na cere, ia sa dua bauga sa tauca na cere? Dou cici sara e nai valavala me rawati kina na qaqa.
25Ko ira na daucici era sa daugumatua e na ka kecega. Era kitaka oqori me nodra kina nai sala sa ca rawarawa, ia vei keda—sa sega ni ca rawa.
26Ka'u sa sega kina ni cici vakaveitalia, se me'u vacu cagi walega e na veivacu.
27Ia ka'u sa vakamalumalumutaka ka lewa vakamatau na yagoqu, de'u vunau oti vei ira na tamata ka'u qai biu wale tu mai.
Who We AreWhat We EelieveWhat We Do
2025 by iamachristian.org,Inc All rights reserved.
