Tiko mai na Lekutu 13 - Ai Vola Tabu (Vakadewa Makawa Vakavoutaki 2021)（FRV21）

Talaki ki Kenani eso na Yamata Vuni(Vakarua 1.19-33)

1A sa vosa vei Mosese ko Jiova, ka kaya,

2“Mo tala na tamata eso, me ra raica vakavinaka na vanua ko Kenani, o koya ka'u sa solia vei ira na Isireli. Me dua na gone turaga mai na yavusa yadua ni nodra qase mo dou talai ira.”

3A sa talai ira yani mai na vanua lala mai Perana ko Mosese me vaka na vosa i Jiova, ko ira kecega oqo era sa turaga vei ira na Isireli.

4Oqo na yacadra: Mai na yavusa i Rupeni, ko Samua na luve i Sakuri;

5mai na yavusa i Simione, ko Safati na luve i Ori;

6mai na yavusa i Juta, ko Kelepi na luve i Jifune;

7mai na yavusa i Isakari, ko Ikiali na luve i Josefa;

8mai na yavusa i Ifereimi, ko Osea na luve i Nuni;

9mai na yavusa i Penijamini, ko Paliti na luve i Rafu;

10mai na yavusa i Sevuloni, ko Katieli na luve i Soti;

11mai na yavusa i Josefa, io mai na yavusa i Manasa, ko Kati na luve i Susi;

12mai na yavusa i Tani, ko Amieli na luve i Kimali;

13mai na yavusa i Aseri, ko Sicuri na luve i Maikeli;

14mai na yavusa i Navitalai, ko Napi na luve i Vofisi;

15mai na yavusa i Kata, ko Kueli na luve i Maki.

16Oqo na yacadra na tamata sa tala ko Mosese me raica vakavinaka na vanua. Ia ko Mosese sa vakayacani Osea, na luve i Nuni, ko Josua.

17A sa talai ira ko Mosese me raica vakavinaka na vanua ko Kenani, a sa kaya vei ira, “Dou lako cake e na sala oqo ki na mata ni ceva, ka cabe ki na ulunivanua,

18ka raica na vanua, se sa vakaevei; kei ira na tamata era tiko kina, se ra kaukauwa se malumalumu, se ra lewe lailai se ra lewe levu,

19ka vakaevei na vanua era sa tiko kina, se vinaka se ca; ka vakaevei na veikoro era sa tiko kina, se koro wale, se koro vakabai,

20ka vakaevei na vanua, se qele vinaka se qele ca, se tu kina na kau, se segai. Ia dou gumatua, ka dou kauta talega mai eso na vuanikau ni vanua.” Ia na vula ko ya na vula sa dreu kina na vua-ni-vaini taumada.

21A ra sa lako cake ka raica vakavinaka na vanua, ka vakatekivu mai na vanua lala ko Sini ka yacovi Riopi, e na sala sa basika yani ki Emaci.

22A ra sa lako cake e na yasana sa donuya na ceva, ka lako ki Epironi, era sa tiko kina ko Eiimani, ko Sesei, kei Talimei, na luve i Anaki. (Ia ko Epironi sa tara oti ka yabaki vitu, sa qai tara e muri ko Soani mai Ijipita.)

23A ra sa yaco ki na buca ko Esikoli, ka cebeta vata kina e dua nai soso vua-ni-vaini kei na tabana talega, a rau sa colata na lewe rua, e nai vua; era kauta talega eso na lolo, kei na pomekaraneti eso.

24Sa vakatokai na tikina ko ya na buca ko Esikoli, e na vuku ni soso vua-ni-vaini era sa cebeta kina na Isireli.

Na Nodra Ripote na Yamata

25A sa oti e bogi vasagavulu ka ra sa qai lesu mai na nodra rai vanua.

26Era sa lesu vei Mosese kei Eroni kei nai soqosoqo taucoko ni Isireli ki na vanua lala mai Perana, e Ketesa. Era sa tukutuku vei rau, vei ira kece talega nai soqosoqo, ka vakatakila vei ira na vuata ni vanua.

27A ra a tukuna vua, “Keitou a lako ki na vanua ko a talai keitou kina; ka sa dina sara sa dave kina na sucu kei na oni; ia oqo na vuana.

28Ia, ko ira na tamata sa tiko e na vanua era sa kaukauwa, a sa vakabai ni valu na veikoro, ka sa levu sara. Keitou a raici ira talega kina na luve i Anaki.

29Era sa tiko e na vanua sa donuya na ceva ko ira na Amalekaiti; kei ira na Itaiti, kei ira na Jepusaiti, kei ira na Amoraiti, era tiko mai na ulunivanua. A ra sa tiko na kai Kenani e na baravi, kei na bati ni Joritani.”

30A sa vakatabatabasobutaki ira na tamata ko Kelepi e na mata i Mosese, ka sa kaya, “Me da lako cake sara, me da taukena; ni sa rawa vei keda me da vakamalumalumutaka.”

31Ia ko iratou na tamata eratou a lako kaya, eratou sa kaya, “Eda na sega ni vorati ira rawa na tamata oqo, ni ra sa kaukauwa cake vei keda.”

32A ratou sa solia kina nai tukutuku ca vei ira na Isireli me baleta na vanua eratou a la'ki raica, ni ratou sa kaya, “Na vanua keitou a lakova me keitou raica vakavinaka sa dua na vanua e kania na lewena; kei na tamata kecega keitou a raica kina era tamata yagolevu.

33Vteki 6.4Ia keitou a raica kina na tamata yagolevu sara; ia keitou sa vaka na vodre e na mata i keitou, ka sa vaka talega kina vei ira.”