1A sa vakaukauwataki koya ko Jioiata e na kenai kavitu ni yabaki, ka sa kauti iratou na turaga ni yayadrau, ko Asaraia na luve i Jiroami ka tagane, kei Isimeli na luve i Jioanani ka tagane, kei Asaraia na luve i Opeti ka tagane, kei Meesea na luve i Ataia ka tagane, kei Ilisafati na luve i Sikiri ka tagane, me ia vata kaya na veiyalayalati.
2A ratou sa veilakoyaki e Juta, ka vakasoqoni ira vata na Livai mai na veikoro kecega e Juta, kei ira na nodra qase turaga na Isireli, a ra sa lako mai ki Jerusalemi.
32Samu 7.12A ra sa ia na veiyalayalati kei na tui e na vale ni Kalou ko ira nai soqosoqo taucoko. A sa kaya vei ira ko koya, “Raica, ena lewa tiko na luve ni tui, me vaka sa vosataki ira na luve i Tevita ko Jiova.
4Oqo na ka mo dou kitaka: me wase tolu koi kemudou na bete kei kemudou na Livai sa vakaitavi e na Siga ni Vakacecegu ka me dua na kena wase mei vakatawa-ni-katuba,
5ka me dua na kena wase me tiko e na vale-ni-tui, ka me tiko e na Matamata-ni-koro ni Yavu nai katolu ni wase; ka na tiko ko ira kecega na tamata e na lomanibai ni vale i Jiova.
6Ia, me kakua ni curu e dua ki loma ni vale i Jiova, ko ira ga na bete, kei ira na Livai era sa vakaitavi tiko. Era na curu ko ira ni ra sa savasava, ia ko ira kece na tamata era na muria nai vakaro sa vakarota ko Jiova.
7Ia era na vakavolivoliti koya na tui ko ira na Livai, ka ra na taura yadua na nona i yaragi; ia ko ira kece na tani sa curu ki loma ni vale, ena vakamatei, Ia koi kemudou, dou tiko vata kei na tui, ni sa curu mai ko koya ka ni sa curu yani.”
Sa Buli ko Joasi me Tui Juta8A ra sa kitaka ko ira na Livai kei ira kecega na Juta me vaka na ka kecega sa vakarota ko Jioiata na bete, a ra sa dui kauti ira na nodra tamata, ko ira sa nodra i tavi me curu ki loma e na Siga ni Vakacecegu, kei ira sa nodra i tavi me curu yani ena Siga ni Vakacecegu, ni sa sega ni sereki ira era sa dauveiqaravi ko Jioiata na bete.
9Sa solia talega ko Jioiata na bete kivei ira na turaga ni yayadrau na moto, kei nai sasabai lalai, kei nai sasabai kece, ka nei Tevita na tui, ka tu e na vale ni Kalou.
10A sa lesi ira kecega na tamata, me ra dui taura tu na tamata yadua na nona i yaragi, mai na yasana i matau ni vale-ni-soro, ka yaco ki na yasana i mawi ni vale-ni-soro, e na yasa ni cabocabo-ni-soro kei na vale-ni-soro, ka vakavolivolita na tui.
11Era sa qai kauta mai na luvena na tui, ka vakaisalataka e nai sala vakatui, ka solia vua nai vola ni vunau, ka buli koya me tui. A ra sa lumuti koya ko Jioiata kei iratou na luvena, a ra sa kaya, “Me bula na tui.”
Sa Vakamatei ko Acalaia12Ia ni sa rogoca ko Acalaia na nodra ue na tamata ni ra sa cici, ka vakarokorokotaka na tui, sa lako mai ko koya kivei ira na tamata ki na vale i Jiova.
13A sa rai yani ko koya, ka raica, sa wavu tu na tui e na nona i tutu e nai curucuru kei ira vata kaya na turaga kei na davui voleka vua na tui. A ra sa reki ko ira kecega na lewe-ni-vanua, ka ra uvu davui, kei ira talega na dausere era taura nai vakatagi domo vinaka, ka liutaka na sere ni vakavinavinaka. Sa qai dresulaka na nona i sulu ko Acalaia, ka kaya, “Na vere! Na vere!”
14Sa qai kauti ira mai na kavetani ni yayadrau era sa lesi me lewa na mataivalu ko Jioiata na bete, ka kaya vei ira, “Kauti koya tani ki tautuba e na maliwa ni matayadra; ia kevaka sa muri koya e dua, me vakamatei e nai seleiwau.” Ni sa kaya na bete, “Me kakua ni vakamatei ko koya e na vale i Jiova.”
15A ra sa tauri koya; ia ni sa yaco ki na Matamata-ni-koro ni Ose, o koya sa voleka ki na vale-ni-tui, era a vakamatei koya kina.
16A sa ia na veiyalayalati ko Jioiata kei ira kecega na tamata, kei koya na tui, me ra nona tamata ko Jiova.
17Sa ra qai lako ko ira kecega na tamata ki na burekalou i Peali, ka basuraka sobu, ka basuraka na nona i cabocabo-ni-soro kei na nona matakau, ka ra sa vakamatei Matani na bete i Peali e na mata ni cabocabo-ni-soro.
18A sa lesia ko Jioiata na tamata turaga e na vale i Jiova me ra muri ira na bete kei ira na Livai, ko ira sa lesia ko Tevita me ra dui tiko e nona yasana e na vale i Jiova, me cabora na veisoro kama i Jiova, me vaka sa volai e na vunau i Mosese, ka ia na reki kei na sere me vaka sa vakarota ko Tevita.
19A sa lesi ira nai vakatawa me tiko ki na matamata-ni-koro ni vale i Jiova, me kakua ni curu kina e dua sa sega ni savasava e na vuku ni dua na ka.
20A sa kauti ira na turaga ni yayadrau, kei ira na turaga, kei ira na nodra turaga na tamata, kei ira kecega na lewe-ni-vanua, ka kauti koya sobu na tui mai na vale i Jiova. A ra sa curuma na matamata-ni-koro e cake ki na vale-ni-tui, ka ra sa vakatikora na tui e nai tikotiko vakatui ni matanitu.
21A sa reki kecega na lewe-ni-vanua, ka sa vakacegu na koro, ni ra sa vakamatei Acalaia e nai seleiwau.
Who We AreWhat We EelieveWhat We Do
2025 by iamachristian.org,Inc All rights reserved.
