Isikeli 44 - Ai Vola Tabu (Vakadewa Makawa Vakavoutaki 2021)（FRV21）

Na Matamata-ni-koro Tasogo

1Sa qai kauti au tale ko koya ki na matamata-ni-koro ni tikina tabu e taudaku sa qara donu ki na tokalau; ka sa sogo tu.

2Sa qai kaya vei au ko Jiova, “A matamata-ni-koro oqo me sogo tu ga, me kakua ni dolavi, ia me kakua e dua na tamata me curu kina; ni sa curu kina ko Jiova, na Kalou ni Isireli, o koya oqo ena sogo tu kina.

3Sa nona na turaga; io na turaga, ena tiko kina ko koya me kana madrai e na mata i Jiova. Ena curu mai ko koya e na sala ni curucuru ni matamata-ni-koro ko ya, e na sala talega ko ya ena curu yani kina ki tautuba.”

Na Kena Curumi na Vale Tabu

4Sa qai kauti au ko koya e na sala ni matamata-ni-koro ki na vualiku ki na mata ni vale tabu; ia ka'u a vakaraica, ka raica, sa vakasinaiti na vale i Jiova e na serau i Jiova; ka'u sa qai cuva vakatoboicu.

5A sa kaya vei au ko Jiova, “Ko iko na luve ni tamata, mo vakasara na lomamu, mo raica e na matamu, ka rogoca e na daligamu na ka kecega ka'u sa kaya vei iko e na vuku ni lesilesi kecega i vale i Jiova, kei na kena vunau kecega; ka vakasara na lomamu vei ira era curu mai ki na vale, kei ira kece era lako tani mai na tikina tabu.

6Ia mo kaya vei ira na dautalaidredre, io ki na vale i Isireli, Sa kaya vakaoqo na Turaga ko Jiova; Me kena levu oqo na nomudou i valavala vakasisila kecega, oi kemudou na vale i Isireli,

7ni dou a kauti ira mai na kai tani, sa sega ni cilivi na yalodra, ka sega ni cilivi na yagodra, me mai tiko e na noqu tikina tabu, me vakacacana, io na noqu vale, ni dou a vakacabora tiko na noqu madrai, kei na uro kei na dra, ka ra sa vakacacataka na noqu veiyalayalati e na vuku ni nomudou i valavala vakasisila kecega.

8Ia dou a sega ni cakava dina na cakacaka ni noqu ka tabu; ia dou a lesia na tani me ra vakaitavi e na noqu tikina tabu me kemudou i sosomi.

9“Sa kaya vakaoqo na Turaga ko Jiova: Me kakua e dua na kai tani e sega ni cilivi na yalona, ka sega ni cilivi na yagona, me curuma na noqu vale tabu, io e dua vei ira na kai tani sa tiko vata kei ira na Isireli.

10Ia ko ira na Livai sa ra lako vakayawa tani vei au, ni ra sa lako sese na Isireli, ka lako sese tani vei au me ra muria na nodra matakau; ena baleti ira dina ga na nodra caka cala.

11Ia era na tiko ga e na noqu tikina tabu me ia na veiqaravi, me vakatawa na matamata-ni-koro ni vale, ka qarava na vale. Era na vakamatea nai soro kama kei na nodra i soro na tamata, ka ra na tu e matadra me ra qaravi ira.

12Baleta ni ra sa qaravi ira e na mata ni nodra matakau ka vakacalai ira na vale i Isireli, o koya oqo ka'u sa dulaka cake kina na ligaqu vei ira, sa kaya na Turaga ko Jiova, ka na baleti ira ga na nodra caka cala.

13Ka ra na sega ni toro mai vei au, me ia vei au nai tavi vakabete, se torova e dua na noqu ka tabu, e na tikina tabu sara; ia ena kani ira ga na nodra madua, kei na nodra i valavala vakasisila era a kitaka.

14Ia ka'u na lesi ira me ra ia na cakacaka ni vale, me ra ia na kena dauveiqaravi kecega, kei na ka kece sa daucaka kina.

Ko Ira na Bete vei Ira na Livai

15Ia ko ira na bete vei ira na Livai ka ra kawa i Setoki, ko ira era a vakaitavi tikoga e na cakacaka ni noqu tikina tabu e na gauna era lako sese tani kina vei au ko ira na Isireli, ko ira ga era na toro mai vei au me ra qaravi au. Ka ra na mai tu e mataqu me ra vakacabora vei au na uro kei na dra, sa kaya na Turaga ko Jiova.

16Io, sai ira ga era na curuma na noqu tikina tabu, ka torova na noqu tepeli, me ra qaravi au kina, a ra na vakaitavi e na noqu cakacaka.

17Lako 28.39-43; Vsoro 16.4Ia, ni ra sa curuma na matamata-ni-koro ki na lomanibai e loma, me ra vakaisulu e nai sulu lineni ga; me ra kakua ni vakaisulu e na vutika ni sipi, ni ra ia na cakacaka e na matamata-ni-koro ni lomanibai e loma, ki loma sara talega.

18Me ra vakaisala e nai sala lineni ga; ka me ra vakatarausese lekaleka e na lineni; me ra kakua ni vauca vei ira e dua na ka era na bunobunoa kina.

19Vsoro 16.23Ia ni ra curu yani ki na lomanibai ki taudaku, vei ira na tamata, me ra qai luvata tani na nodra i sulu era ia kina na nodra i tavi, ka virinoca e na veitikina tabu, ka me ra qai vakaisulu e nai sulu tani; me ra kakua ni vakatabui ira na tamata e na nodra i sulu.

20Vsoro 21.5Ia me ra kakua ni tasia na uludra, ka me kakua ni balavu na drau ni uludra; ia ni ra kotiva, me ra kotiva vakavinaka.

21Vsoro 10.9Me kakua talega ni gunu waini e dua na bete, ni sa curu ki na lomanibai ki loma.

22Vsoro 21.7,13,14Ia me ra kakua ni veiwatini kaya e dua na yada, se dua sa veibiu kei na watina, me sa vakawati ga kei na goneyalewa ga sa kawa ni vale i Isireli, se dua na yada ka watina e dua na bete sa mate.

23Vsoro 10.10Ia me ra vakavulici ira na noqu tamata ni sa duatani na ka tabu ka duatani na ka sa sega ni tabu, ka duatani na ka sa savasava ka duatani na ka sa sega ni savasava, me macala vei ira.

24Ia e na ka sa veiletitaki me ra tu ga mai me veilewaitaki; me ra lewa kina vakadodonu me vaka na noqu lewa dodonu. Ka me ra vakabauta talega na noqu vunau kei na noqu i lesilesi sa bale ki na noqu solevu kecega; ka me ra vakatabuya na noqu Siga ni Vakacecegu.

25Vsoro 21.1-4Ia me ra kakua ni torova e dua na tamata sa mate me vakadukadukalitaki ira kina. Ia e na vuku ni tamadra, se na tinadra, se na luvedra tagane, se na luvedra yalewa, se na tacidra, se na ganedra sa sega ni vakawati, sa tara me ra vakadukadukalitaki ira ga kina.

26Ia ni sa vakasavasavataki oti ko koya, sa na vakatabui tiko bogi vitu.

27Ia e na siga sa curu tale kina ko koya ki na tikina tabu, ki na lomanibai ki loma, me ia na nona i tavi e na tikina tabu, me qai vakacabora ko koya na nona i soro ni valavala ca, sa kaya na Turaga ko Jiova.

28 Tiko 18.20 “Ia sai koya oqo na nodra i votavota: Koi au ga sa nodra i votavota; dou kakua ni solia vei ira e dua nai votavota vanua e Isireli; koi au ga na nodra i votavota.

29Tiko 18.8-19Era na kania nai madrali laukana, kei nai soro ni valavala ca, kei nai soro ni caka cala, kei na ka kece sa vakacabori me nei Jiova e Isireli ena nodra ga.

30Ia me nodra talega na bete na veta ni sevu kece kei na ka kecega, kei nai madrali kece ni vuata kece e na nomudou i madrali kecega. Kei na veta ni nomudou madrai droka kece mo dou solia ga vua na bete, me vatonaka ko koya na nomu vale me vakalougatataki kina.

31Vsoro 22.8Me ra kakua ni kania ko ira na bete e dua na ka sa mate walega, se dresulaki, se manumanu vuka, se manumanu ni vanua.