Jeremaia 23 - Ai Vola Tabu (Vakadewa Makawa Vakavoutaki 2021)（FRV21）

Na Veivakacokotaki ni Oti na Veivakabobulataki

1“Ena ca ko ira nai vakatawa era vakacacana ka vakasavi ira na sipi ni noqu vanua veico,” sa kaya ko Jiova.

2O koya sa kaya kina ko Jiova na Kalou ni Isireli vei ira nai vakatawa era sa vakani ira na noqu sipi: “Koi kemudou, dou sa vakatolosevi ira na noqu qele ni sipi, ka vakasavi ira tani, ka sega ni la'ki raici ira. Raica, au na cudruvi kemudou e na vuku ni ca ni nomudou i valavala, sa kaya ko Jiova.

3Ia koi au, ka'u na vakasoqoni ira vata mai na kena vo ni noqu qele ni sipi mai na veivanua kecega ka'u sa dui vakasevi ira kina, ia ka'u na kauti ira tale mai ki na nodra lomanibai; ka ra na vakaluveni ka tubu.

4Ia ka'u na lesia eso me nodra i vakatawa era na vakani ira, ka ra na sega ni rere tale, se taqaya, se yali, sa kaya ko Jiova.

Na Coke Yalododonu i Tevita

5 Jere 33.14-16 “Raica, sa kaya ko Jiova, ena yaco na gauna, ka'u na vakatubura kina vei Tevita e dua na Coke yalododonu, ia ena lewa e dua na Tui ka cakacaka yaco, ena ia ko koya na lewa kei na cakacaka dodonu e vuravura.

6E na nona gauna era na vakabulai kina na Juta, ia ko ira na Isireli era na tiko vinaka. Ia oqo na yacana ena vakatokai kina, ‘Ko Jiova na noda Yalododonu’ (ko Jiova-sikenu).

7“O koya oqo sa kaya ko Jiova, ena yaco dina kina na gauna, era na sega tale ni kaya, ‘Me vaka sa bula ko Jiova, ko koya ka kauti ira cake na Isireli mai na vanua ko Ijipita’,

8ia era na kaya ga, ‘Sa bula ko Jiova, ko koya ka kauta cake mai ka tubera na nodra kawa na vale i Isireli mai na vanua ki na vualiku, kei na veivanua kecega ka'u a dui vakasevi ira kina’; ka ra na tiko ga e na nodra vanua.”

Nai Tukutuku i Jeremaia me Baleti Ira na Parofita

9E na vukudra na parofita:

Sa ramusu kina na yaloqu e lomaqu;

sa yavavala na suiqu kecega;

au sa vaka na tamata sa mateni,

ka vaka na tamata sa rawai koya na waini,

e na vuku i Jiova,

e na vuku talega ni nona vosa tabu.

10Ni sa sinai na vanua e na veibutakoci;

ni sa tagi na vanua e na vuku ni ruru,

ka sa mamaca mai na veiyasana vinaka ni vanua lala,

ka sa ca na nodra i valavala,

ka sa sega ni dodonu na nodra lewa kaukauwa.

11“Ko ira na parofita kei na bete talega era sa tamata ca,

io, e na noqu vale ka'u sa kunea na nodra ca,

sa kaya ko Jiova.

12O koya oqo ena yaco kina na nodra sala

me vaka sa titidara e na butobuto,

era na veibili yani, ka bale kina;

ni'u na vakayacora na ca vei ira,

io na yabaki me ra cudruvi kina,

sa kaya ko Jiova.

13Ia ka'u sa kunea talega

vei ira na parofita ni Samaria na ka lialia;

era sa ia na parofisai ka cavuti Peali,

ka ra sa vakasesei ira kina na noqu tamata na Isireli.

14 Vteki 18.20; Isi 16.49 Ia ka'u sa kunea talega na ka vakasisila

vei ira na parofita ni Jerusalemi:

era sa ia na veibutakoci ka muria na ka lasu;

era sa totaki ira na daucaka ca, me sega kina e dua sa lesu mai na nona ca;

era sa tautauvata kecega vei au ko ira oqo kei ira na kai Sotoma,

kei ira na lewe ni koro oqo era sa tautauvata kei Komora.”

15O koya oqo sa kaya kina ko Jiova-ni-lewevuqa e na vukudra na parofita:

“Raica, au na vakani ira e na kau gaga,

ka vagunuvi ira e na wai gaga;

ni sa lako yani na ka ca mai vei ira na parofita ni Jerusalemi

ki na vanua taucoko.”

16Sa kaya vakaoqo ko Jiova-ni-lewevuqa, “Dou kakua ni vakarorogo ki na nodra vosa na parofita era sa ia na parofisai vei kemudou; era sa vakalialiai kemudou ga. Era sa cavuta na raivotu wale e vu mai na lomadra ga, ka sa segai mai na gusu i Jiova.

17Era sa kaya tikoga vei ira era beci au, Sa kaya ko Jiova, ‘Ena yaco ga na vakacegu vei kemudou,’ ia vei ira kece era muria na kaukauwa ni lomadra era sa kaya, ‘Ena sega na ca me yacovi kemudou.’ ”

18Ia ko cei ka tiko e na bose i Jiova,

ka kunea ka rogoca na nona vosa?

Ko cei ka vakarorogo ki na nona vosa, ka rogoca?

19Raica, na covulaca rerevaki i Jiova sa lako yani,

io na covulaca rarawa;

ena lutu vakararawa sara

ki na uludra na tamata ca.

20Ena sega ni malumu na cudru i Jiova,

ena cakava mada ga, ka vakayacora na nanuma ni lomana;

e na gauna mai muri dou na kila deivaka sara ga kina.

21“Au a sega ni talai ira na parofita oqo,

ia era sa cici ga;

au a sega ni vosa vei ira,

ia era sa parofisai ga.

22Ia kevaka era sa tiko ga e na noqui vakasala,

era na qai la'ki vakarogoya na noqu vosa vei ira na noqu tamata,

ka ra na vuki tani mai na nodra sala cala,

mai na ca ni nodra i valavala talega.

23“Au sa Kalou beka e na tikina voleka ga sa kaya ko Jiova, ka'u sa sega talega ni Kalou e na tikina vakayawa?

24Me vunitaki koya rawa beka e dua e na yasana vuni, me'u kakua ni raici koya? Sa kaya ko Jiova. Au sa sega li ni roboti lomalagi kei vuravura? sa kaya ko Jiova.

25Au sa rogoca na ka era kaya na parofita, era sa parofisaitaka na ka lasu e na yacaqu, ka kaya, ‘Au a tadra, io au a tadra.’

26A cava na kena dede me sa tiko na ka lasu e na lomadra na parofita—ko ira era sa parofisaitaka na ka lasu, ka ra sa parofita daulawaki ga e na lomadra,

27ka ra sa nanuma me ra cakava vei ira na noqu tamata me ra guilecava na yacaqu mai na nodra tadra era sa dui tukuna vua na kai nona, me vaka ga na nodra guilecava na yacaqu ko ira na nodra qase ka golevi Peali?

28A parofita sa tu vua e dua na tadra, me tukuna ga na nona tadra; ia ko koya sa tu vua na noqu vosa, me tukuna dina ga na noqu vosa. E tautauvata li na qana kei na witi? sa kaya ko Jiova.

29Sa sega beka ni vaka na bukawaqa na noqu vosa, sa kaya ko Jiova, ka vaka nai tukituki sa vorolaka na vatu?

30Sa kaya kina ko Jiova, Raica au sa cati ira na parofita, era sa dui butakoca na noqu vosa mai vua na kai nona.

31Raica, au sa veimecaki kei ira na parofita, sa kaya ko Jiova, era sa vosa walega e na yamedra ka ra kaya, ‘sa kaya ko Koya.’

32Raica, au sa cati ira ga era sa parofisaitaka na tadra lasu, sa kaya ko Jiova, ka ra sa tukuna, ka vakasesei ira kina na noqu tamata e na nodra lasu, kei na nodra vosa walega; ia koi au ka'u a sega ni talai ira, se'u vakaroti ira. Era na sega kina ni yaga vakalailai vei ira na tamata oqo, sa kaya ko Jiova.

Nai Colacola i Jiova

33“Ia ni ra sa tarogi iko ko ira na tamata oqo, se na parofita, se na bete, ka vaka, ‘A vosa ni parofisai bibi cava sa tukuna mai ko Jiova?’ Mo qai kaya vei ira, ‘A vosa ni parofisai bibi cava? Ia ka'u na biuti kemudou ga, sa kaya ko Jiova.’

34Ia ko ira na parofita, kei na bete, kei na tamata, era na kaya, ‘A vosa ni parofisai bibi mai vei Jiova’, ka'u na cudruva na tamata ko ya kei na nona vuvale.

35Sa vaka ga oqo mo dou dui kaya vua na kai nona, vua talega na tacina, ‘A cava sa kaya ko Jiova?’ Ia, ‘A cava sa vosataka ko Jiova?’

36Ia ‘na vosa ni parofisai mai vei Jiova’, mo dou kakua ni cavuta tale, ni na nona i colacola na tamata yadua na nona vosa walega, ni dou sa vakatanitaka na vosa ni Kalou bula, na vosa i Jiova-ni-lewevuqa na noda Kalou.

37Me vaka ga oqo na nomu vosa vua na parofita, ‘A cava sa kaya vei iko ko Jiova?’ Ia, ‘A cava sa vosataka ko Jiova?’

38Ia ni dou sa kaya, ‘Na vosa ni parofisai bibi mai vei Jiova’, o koya oqo sa kaya kina ko Jiova, ‘Ni dou sa cavuta na vosa oqo, “Na vosa ni parofisai bibi mai vei Jiova”, ia ka'u a tala vei kemudou, ka kaya, “Dou kakua ni kaya, ‘Na vosa ni parofisai bibi mai vei Jiova’,”

39o koya oqo, raica, koi au, io koi au, ka'u na guilecavi kemudou sara kina, ka biuti kemudou tani, kei na koro ka'u a solia vei kemudou kei ira na nomudou qase, mai na mataqu.

40Ia ka'u na vakayacora vei kemudou na veivakalialiai sa sega ni mudu, kei na madua sa sega ni mudu, ena sega ni guileca.