Sakaraia 5 - Ai Vola Tabu (Vakadewa Makawa Vakavoutaki 2021)（FRV21）

Ai Kaono ni Raivotu: Nai Vola Vivigi e Vuka

1Au a qai ta cake tale, ka raica, sa dua nai vola vivigi sa vuka tiko.

2A sa kaya vei au ko koya, “A cava ko sa raica?” Au a kaya, “Au sa raica e dua nai vola vivigi ka vuka tiko; a kena balavu sa ruasagavulu na kiupiti, kei na kena raraba e tini na kiupiti.”

3Sa qai kaya vei au ko koya, “Oqo na vosa ni dauveivakarusai sa lako yani e dela ni vanua taucoko; io, ko ira kece era butako era na muduki laivi vakakina me vaka e na tabana oqo; kei ira kece era bubului vakailasu era na muduki laivi vakakina me vaka e na tabana ko ya.

4Au na vakayacora yani, sa kaya ko Jiova-ni-lewevuqa, ka na curuma na vale ni daubutako, kei na nona vale sa bubului vakailasu e na yacaqu; ena tiko talega e nona loma ni vale, ka vakayavuna vata kei na kena kau kei na kena veivatu.”

Ai Kavitu ni Raivotu: Na Yalewa e na Loma ni Basikete (Efa)

5Sa qai lako mai na agilosi keirau sa veivosaki kaya, ka vaka vei au, “Mo ta cake mada, ka raica se cava sa qai lako mai.”

6Au a kaya, “A cava mada oqo?” A sa kaya ko koya, “Oqo na basikete sa lako tu mai.” Ka sa kaya talega, “Sa vakaoqo na nodra i valavala ca e na vanua taucoko.”

7Ka raica, sa dua na uma bibi, ka sa dua na yalewa sa tiko e na loma ni basikete!

8A sa kaya ko koya, “Oqo ko Vu-ni-ca.” Ka sa qai biuta lesu ki na loma ni basikete, ka sa tauca na uma bibi ki na gusu ni basikete.

9Au a qai ta cake, ka vakararai, ka raica, sa le rua na yalewa erau sa lako mai. Ia na cagi sa tiko e na tabadrau. Erau sa vakatabana vakabelo, ka rau sa laveta cake na basikete e na kedrau maliwa ko vuravura kei lomalagi.

10Au a qai vaka vua na agilosi keirau sa veivosaki kaya, “Erau sa kauta kivei na basikete?”

11A sa kaya vei au ko koya, “Me la'ki tara na kena vale e na vanua ko Saina. Ni sa vakarautaki oti, e na qai vakatikori mai kea e na kenai tutu.”