1I Jiova, mo ni veileti kei ira era sa veileti kei au;
ni veivala kei ira era sa veivala kei au.
2Mo ni taura nai sasabai kei nai vakaruru,
ka tucake mo ni vukei au.
3Mo ni laveta talega na moto kei nai matau ni vala
me ravuti ira era sa vakacemuri au!
Mo ni kaya mai ki na yaloqu,
“Koi au na nomu i vakabula!”
4Me ra vakidroataki ka vakamaduataki
era sa saga na yaloqu.
Me ra vakasukai ki muri ka vakataqayataki
ko ira era bosea na ka me'u ca kina.
5Me ra vaka na qa-ni-sila sa cagina,
ka me vakasavi ira talega na agilosi i Jiova.
6Me butobuto ka tidara na nodra sala,
ka me vakasavi ira talega na agilosi i Jiova.
7Ni sa sega na vuna ni ra vunia na nodra lawa e nai keli me rawai au;
era kelia me'u mate kina ka sega na vuna.
8Me yaco vakidacala vua na rusa.
Ia me rawai koya ga na nona lawa sa vunia ko koya;
me lutu ga kina ko koya—ki na nona rusa!
9Ia na yaloqu ena rekitaki Jiova,
ena reki ga ni sa vakabulai au ko koya.
10Ena kaya talega na suiqu kecega,
“O cei sa vakataki kemuni, i Jiova?
Ni kemuni sa vakabulai koya sa dravudravua
mai vua sa rui kaukauwa vua,
kei koya na dravudravua kei na luveniyali mai vua sa vakacacani koya.”
11Era sa tucake mai na dauveibeitaki vakailasu;
era sa taroga vei au na ka ka'u sa sega ni kila.
12Era sa kitaka vei au na ka ca mei sau ni ka vinaka;
ka sa ca kina na yaloqu.
13Ia koi au, ni ra sa tauvi mate,
ka'u sa vakaisulu e nai sulu taga;
ka'u sa vakamalumalumutaki au e na lolo;
ka'u sa vakacuva na uluqu ki lomaserequ ka masu,
14ka sa vaka ni'u tagicaka voli na noqu i tokani se taciqu;
ka vaka e dua sa lelevaka na tinana,
ni sa cuva sobu ka lolosi.
15Ia ena gauna ka'u sa tao kina, era sa sota vata e na reki,
ka ra soqoni vata mai me ra saqati au;
ko ira na tamata ca ka'u sa sega ni kilai ira
era sa basuraki au ka sega ni cegu;
16era sa vaka na dauveivakasewasewani e na kana magiti,
era sa vakasequruquru bati vei au.
17A cava na kena dede, i Jiova, mo ni na vakararai mai kina?
Ni vakabulai au mai na nodra veivakarusai,
na noqu bula mai vei ira na laione!
18Au na qai vakamolimoli vei kemuni e nai soqosoqo levu;
ka'u na vakavinavinaka vei kemuni e na kedra maliwa na lewe vuqa.
19 Same 69.4; Joni 15.25 Me ra kakua ni reki e na vukuqu ko ira na noqu meca ni sa sega na vuna,
me ra kakua talega ni katariva ko ira era cati au walega.
20Ni ra sa sega ni vosataka na vosa ni vakacegu,
ia kivei ira era tiko vinaka e na vanua,
era veinanuyaka ga na ka ni dauveivakaisini.
21A ra sa dalaga vakalevu vei au;
a ra sa kaya, “Sai koya! Sai koya!
Sa qai kunea na matada.”
22O ni sa kunea talega, Jiova, mo ni kakua ni galu tiko!
Noqu turaga, ni kakua ni yawa vei au!
23Mo ni yavala mai! Ka yadra mo ni lewai au,
io mo ni totaki au mai, na noqu Kalou kei na noqu Turaga!
24Mo ni lewai au, Jiova na noqu Kalou,
me vaka na nomuni yalododonu;
ia mo ni kakua ni laivi ira me ra rekitaki au.
25Me ra kakua ni kaya e lomadra,
“Sai koya, sa loma i keitou oqo!”
Me ra kakua ni kaya, “Keitou sa tilomi koya sara.”
26Me ra madua ka kidroa vata
ko ira sa rekitaka na noqu vakacacani!
Me ra vakaisulu e na veivakamaduataki kei na veivakarogocataki
ko ira era sa vakalevulevui ira vei au!
27Me ra kaikaila e na marau ka reki
ko ira era sa vinakata me'u vakadonui,
ka me ra kaya tikoga,
“Me vakacaucautaki ko Jiova,
o koya sa vinakata me ra tiko vinaka na nona tamata!”
28Ia na yamequ ena tukuna na nomuni lewa dodonu
kei na nomuni vakavinavinaka e na veisiga kece.
Who We AreWhat We EelieveWhat We Do
2025 by iamachristian.org,Inc All rights reserved.
