Vakatekivu 46 - Ai Vola Tabu (Vakadewa Makawa Vakavoutaki 2021)（FRV21）

Toki ki Ijipita na Vuvale nei Josefa

1A sa lako ko Isireli kei na veika kecega sa taukena ka yaco ki Peri-sepa, ka sa vakacabora nai soro vua na Kalou i Aisake na tamana.

2A sa vosa vei Isireli na Kalou, e na raivotu e na bogi, ka kaya, “I Jekope, i Jekope!” A sa kaya ko koya, “Koi au saka oqo.”

3A sa kaya, “Koi au na Kalou, na Kalou i tamamu; kakua ni ko rere ni lako sobu ki Ijipita, ni'u na vakamatanitulevutaki iko mai kina.

4Au na lako sobu kei iko ki Ijipita, ia ka'u na kauti iko cake tale mai; ka na qai sogota na matamu ko Josefa e na ligana.”

5A sa cavu tu mai Peri-sepa ko Jekope. Ko ira na luve i Isireli era sa kauti Jekope na tamadra, kei na nodra lalai, kei na watidra e na qiqi-ni-tamata ka vakatala mai ko Fero me kauti koya.

6Caka 7.15A ra sa kauta talega na nodra manumanu kei na nodra i yau era sa rawata e na vanua ko Kenani, ka ra sa lako ki Ijipita, ko Jekope kei ira kece vata kaya na nona kawa,

7ko ira na luvena tagane kei na makubuna tagane, kei na luvena yalewa, kei ira na makubuna yalewa; ko ira na nona kawa kecega a sa kauta vata kaya ki Ijipita.

8Ia oqo na yacadra na luve i Isireli era sa lako ki Ijipita, ko Jekope kei na luvena: ko Rupeni, na ulumatua i Jekope.

9Ia na luve i Rupeni eratou tagane: ko Enoke, ko Palu, ko Esironi, kei Kamai.

10Ia na luve i Simione eratou tagane: ko Jimueli, kei Jamini, kei Oati, kei Jakini, kei Soari, kei Saula, na luvena e dua na yalewa ni Kenani.

11Ia na luve i Livai eratou tagane: ko Kerisoni, ko Koaca, kei Mirari.

12Ia na luve i Juta eratou tagane: ko Eri, kei Onani, kei Sela, kei Peresi, kei Sera; ia ko Eri kei Onani erau a mate e na vanua ko Kenani; ia na luve i Peresi erau tagane ko Esironi kei Emuli.

13Ia na luve i Isakari eratou tagane: ko Tola, kei Fuva, kei Jopi, kei Simironi.

14Ia na luve i Sevuloni eratou tagane: ko Sereti, kei Eloni, kei Jalieli.

15Ko ira na tagane oqo na luve i Lia, ka vakasucuma vei Jekope mai Petani-erama, kei Taina na luvena yalewa; ko ira vata na luvena tagane kei na luvena yalewa, era lewe tolusagavulu ka tolu.

16Ia na luve i Kata eratou tagane: ko Sifioni, ko Aki, ko Suni, kei Esiponi, ko Eri, kei Eroti, kei Areli.

17Ia na luve i Aseri eratou tagane: ko Imina, kei Isiva, kei Isivi, kei Piria, kei Sera na ganedratou. Ia na luve i Piria erau tagane: ko Eperi kei Malikieli.

18Ko ira na tagane oqo na luve i Silipa, ko koya ka solia ko Lepani vei Lia na luvena yalewa; ia ko ira oqo sa vakasucuma ko koya vei Jekope, era lewe tinikaono.

19Na luve i Raijeli na wati Jekope: ko Josefa kei Penijamini.

20Vteki 41.50-52Ia na luve i Josefa sa sucu e na vanua ko Ijipita, ko Manasa kei Ifereimi, koi rau ka vakasucuma ko Asenaca na luve i Potifera na bete mai Oni.

21Ia na luve i Penijamini eratou tagane: ko Pela, kei Pekeri, kei Asipeli, ko Kira, kei Neamani, ko Ei, kei Rosi, ko Mupimi, kei Upimi, kei Ariti.

22Ko ira na tagane oqo era luve i Raijeli, ko ira sa vakasucuma vei Jekope—a tamata kecega era lewe tinikava.

23Na luve i Tani ka tagane, ko Usimi.

24Na luve i Navitalai eratou tagane: ko Jasieli, kei Kuni, kei Jeseri, kei Silemi.

25Ko ira na tagane oqo na luve i Pila, ko koya ka solia ko Lepani vei Raijeli na luvena yalewa; a sa vakasucumi ira oqo ko koya vei Jekope, ko iratou kecega era lewe vitu.

26Ko ira na tamata kecega ka lako vata kei Jekope ki Ijipita, ka ra taka mai vua, era lewe onosagavulu ka ono, ia ka sa vo na watidra na luve i Jekope.

27Caka 7.14Ia sa lewe rua na luve i Josefa, erau sa sucu mai Ijipita. Ko ira kece na tamata e na vuvale i Jekope era lako ki Ijipita era sa lewe vitusagavulu.

Sa Lako ko Jekope ki Ijipita

28A sa talai Juta me liutaki koya vei Josefa, me kauti koya ki Koseni; a ra sa yaco ki na vanua ko Koseni.

29A sa vakarautaka na nona qiqi vakaturaga ko Josefa, ka lako cake me veitavaki kei Isireli na tamana mai Koseni. A sa vakaraitaki koya vua, a sa mokota na domona, a sa tagi vakadede kina.

30A sa kaya vei Josefa ko Isireli, “Au sa rawa ni mate oqo, ka ni'u sa qai raica tale e mataqu ni ko se bula tiko.”

31A sa kaya ko Josefa vei ira na veitacini kei na vuvale i tamana, “Au na lako cake ka tukutuku vei Fero, ka kaya vua, ‘Ko iratou na tuakaqu kei na vuvale i tamaqu, ko ira ka tiko mai na vanua ko Kenani, era sa lako mai vei au.

32Era sai vakatawa ni sipi ko ira na tagane, ni ra sa tamata dauvakana manumanu; ka ra sa kauta mai na nodra sipi kei na nodra bulumakau, kei na veika kecega era taukena.’

33Ia ni sa kacivi kemudou ko Fero, ka vaka, ‘A cava dou sa daukitaka?’

34mo dou qai kaya, ‘Koi keitou na nomuni tamata keitou sa dauvakana manumanu mai na gauna keitou a gone kina me yacova mai na gauna oqo, koi keitou kei ira talega na neitou qase’—ka oqo mo dou rawa kina ni tiko mai na vanua ko Koseni, ni ra sa ka vakasisila vei ira na kai Ijipita na tamata kecega sa dauvakana sipi.”