1 Kala 4.27 “Mo ia na sere, ko iko sa yava, sa sega ni vakasucu;
lagata mada na sere, ka ia na kaila, ko iko sa sega ni taratara!
Ni ra sa lewe vuqa na luve i koya sa biu,
ka lewe lailai na luve i koya sa vakawati,” sa kaya ko Jiova.
2“Vakalevutaka na tikina sa tu kina na nomu valelaca,
ia na kenai lati ni nomu i tikotiko me dre ga yani;
kakua ni ko maninitaka; vakabalavutaka na nomu dali,
ka vakadeitaka na nomu i vako.
3Ni ko na tete yani vaka ki nai matau kei nai mawi,
ia na nomu kawa ena taukena na veimatanitu tani,
ka vakatawa na veikoro ka rusa tu.
4“Mo kakua ni rere, ni ko na sega ni madua;
ia mo kakua ni taqaya, ni ko na sega ni vakamaduataki;
ni ko na guilecava na ka ni nomu veivakamaduataki ni ko a goneyalewa,
ia na ka ko rogo ca kina ni ko sa yada ko na sega ni nanuma tale.
5Ni sa watimu ko koya ka buli iko,
ko Jiova-ni-lewevuqa na yacana;
sai koya na nomu i Vakabula na Yalosavasava ni Isireli;
ena vakatokai ko koya na Kalou ni vuravura taucoko.
6Ko sa vaka na yalewa biu ka rarawa na lomana
ni sa kacivi iko ko Jiova,
ka vaka na watina e dua sa cauravou, ni sa biu ga,
sa kaya na nomu Kalou.
7Sa vakalekaleka wale na noqu biuti iko;
ia e na yalololoma levu ka'u na vakasoqoni iko.
8E na noqu cudru,
ka'u a tabonaka mada vakalailai na mataqu mai vei iko;
ia e na loloma sa sega ni mudu ka'u na lomani iko kina,”
sa kaya na nomu i Vakabula ko Jiova.
9 Vteki 9.8-17 “Ni sa vaka na waluvu e na gauna i Noa na ka oqo vei au:
Ka'u a bubului me kakua ni luvuci vuravura tale na waluvu i Noa;
ka'u sa bubului vakakina me'u kakua ni cudruvi iko,
ka sega ni vunauci iko.
10Ni na takali na veiulunivanua
ka yavavala na veiulu-ni-koro,
ia na noqu yalololoma ena sega ni takali vei iko,
ka na sega talega ni kau tani na noqu veiyalayalati ni sautu,”
sa kaya ko Jiova, ko koya sa lomani iko.
11 Vtaki 21.18-21 “Ko iko na daurarawa, na daucagina e na cava, ka sega ni vakalecataki,
raica, ka'u na viritoka na nomu veivatu e na drega-i-qumu,
ka tauyavutaki iko e na safaia,
12ka'u na cakava na nomu bai ni valu e na rupi,
kei na nomu matamata-ni-koro e na kapuquli,
kei na nomu i yalayala e na vatu daudomoni.
13 Joni 6.45 A luvemu kecega e na vakavulici ira ko Jiova,
ena ka levu talega na nodra vakacegu na luvemu.
14Ni sa tu mai na ka dodonu ko na vakataudeitaki kina;
ena yawa ga vei iko na veivakararawataki, ni na sega na ka mo rerevaka;
kei na taqaya, ni na sega ni torovi iko.
15Raica, era na soqoni dina mai,
ia ena sega ni vu vei au;
ko koya ena soqoni vakaivalu mai vei iko,
ena vuki ga vei iko ko koya.
16Raica, koi au ka'u a bulia na matai
sa iriva na qilaiso waqa,
ka sa cakava mai nai yaragi e na nona cakacaka;
koi au talega ka'u a buli koya na dauvakacaca
me ia na veivakacacani.
17Nai yaragi kecega sa buli me ravuti iko ena sega ga ni yaco,
kei na yame kecega ena mai vakalewai iko ko na vakacala ga.
Oqo na nodra i votavota na tamata i Jiova,
kei na nodra veivakadonui mai vei au,” sa kaya ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
