Aisea 38 - Ai Vola Tabu (Vakadewa Makawa Vakavoutaki 2021)（FRV21）

Sa Tauvi Mate ko Esekaia

1E na gauna ko ya sa tauvi mate ko Esekaia ka sa vakarau ciba. Ka sa lako mai vua ko Aisea na parofita na luve i Emosi, ka sa kaya vua, “Sa vosa vakaoqo ko Jiova, Mo tatau mada vei ira na nomu lewe-ni-vuvale; ni ko na mate ga, ka sega ni bula.”

2Sa qai gole ki lalaga ko Esekaia, ka masu vei Jiova,

3ka sa kaya, “Au masuti kemuni, Jiova, mo ni nanuma mada na noqu lako voli e matamuni e na yalodina kei na yaloqu taucoko, kei na noqu caka vinaka e matamuni.” Ka sa tagi vakalevu ko Esekaia.

4Sa qai yaco mai na vosa i Jiova vei Aisea, ka kaya,

5“Mo la'ki kaya vei Esekaia, Sa kaya vakaoqo ko Jiova na Kalou i Tevita na nomu qase, Au sa rogoca na nomu masu, au sa raica na wai ni matamu. Raica, ka'u na kuria na nomu gauna mo bula yabaki tinikalima tale.

6Ia ka'u na vakabulai iko kei na koro oqo mai na ligai tui Asiria, ka'u na taqomaka na koro oqo.”

7“Ia oqo na kenai vakadinadina vei iko mai vei Jiova, ni na cakava ko Jiova e dua na ka oqo sa cavuta ko koya:

8Raica, ka'u na vakasuka tale ki muri nai yaloyalo, sa lako sobu e nai vakatakilakila ni mata-ni-siga nei Easi, me tini nai kalawa.” A sa suka tale ki muri na mata-ni-siga me tini nai kalawa, a tikina oqori ka sa lako sobu kina.

9Ai vola i Esekaia na tui Juta, ni sa tauvi mate, ka sa bula tale mai na nona mate:

10Au a kaya, Ni sa siga levu tutu na noqu siga

ka'u na curuma na mata ni katuba kei Etesi;

sa yali vei au na noqu yabaki sa vo.

11Au a kaya, Au na sega tale ni raici Jiova,

io ko Jiova, e na nodra vanua na bula;

au na sega ni kunea tale na tamata

kei ira na kai vuravura.

12Sa cavuti tani na noqu vale, ka sa kau tani vei au

me vaka na valelaca ni vakatawa ni sipi;

au sa drutia laivi na noqu bula

me vaka na nona wa na dautali sulu;

sa druti au tani ko koya mai nai musumusu ni ka ni tali sulu;

ko ni na vakaotia na noqu bula mai na mataka ki na bogi.

13Au a vakasama koto ga ka mataka mai;

ni na musuka vaka na laione na suiqu kece;

ko ni na vakaotia na noqu bula e na mataka ka bogi mai.

14Au a tagi me vaka na kakabace se na belo,

au a tagi vakararawa me vaka na ruve.

Sa oca na mataqu e na rai ki cake.

Kemuni Jiova, ka'u sa bitaki sara; mo ni vukei au mai!

15A cava me'u kaya? Sa vosa mai vei au ko koya,

ka sa vakayacora talega ko koya.

Au na lako malua tiko e na noqu veiyabaki kecega,

e na vuku ni rarawa ni yaloqu.

16Kemuni Jiova, e na ka vakaoqo era bula kina na tamata,

ia e na vuku ni ka kecega oqo sa bula na yaloqu.

Kemuni na vakabulai au, me'u sa bula kina.

17Raica, sa vuki na noqu rarawa me'u vakacegu;

ia ko a lomana na yaloqu

ka vakabula mai nai keli ni rusa;

ni kemuni sa biuta ki dakumuni

na noqu i valavala ca kecega.

18Ni na sega ni vakavinavinaka vei kemuni nai bulubulu,

se vakacaucautaki kemuni na mate;

ko ira sa lako sobu ki nai keli

era na sega ni nuitaka na nomuni yalodina.

19Ko koya sa bula, io ko koya sa bula, ena vakavinavinaka vei kemuni,

me vakataki au e na siga oqo;

ena tukuna ko ira na qase vei ira na gone

na nomuni yalodina.

20Sa mai vakarau ko Jiova me vakabulai au,

ia na noqu sere eda na ia vata kina kei na qiriqiri

e na vale i Jiova,

e na veisiga ni noda bula.

21Ia sa kaya oti ko Aisea, “Me ra kauta e dua nai buli lolo, ka botana kina na kasi, ena qai bula kina ko koya.”

22Ka sa kaya talega ko Esekaia, “A cava na kenai vakadinadina ni'u na lako cake ki na vale i Jiova?”