Jope 23 - Ai Vola Tabu (Vakadewa Makawa Vakavoutaki 2021)（FRV21）

Sauma ko Jope: Na Noqu Kudru sa Rui Mosimosi

1A sa vosa ko Jope, ka kaya:

2“E na siga oqo sa gaga na noqu vosa kudrukudru;

sa bibi sara na ligaqu ni sa tarai au na vutugu.

3Me'u kila mada na vanua me'u kunei koya kina,

ka me'u torova sara na nona i tikotiko!

4Ka'u na vakataqara vua na ka me baleti au,

ka vakasinaita na gusuqu e nai vakamacala.

5Ka'u na qai kila na vosa ena kaya mai vei au,

ka vakasamataka na ka ena kaya vei au.

6Ena veivorati li kei au ko koya e na nona kaukauwa levu?

E segai; ena golevi au ga ko koya.

7Ena veisa-vosa rawa kaya mai kea ko koya sa yalododonu,

ka'u na qai vakabulai sara mai vua sa lewai au.

8“Raica, ka'u sa lako ki liu, ka sa sega kina ko koya;

se ki muri, ia ka'u sa sega ni kunea;

9ki na liga i mawi, na yasana sa cakacaka kina ko koya, ia ka'u sa sega ni kunea;

sa vunitaki koya e na liga i matau, au sa sega ni raici koya rawa kina.

10Ia sa kila ko koya na sala ka'u sa muria;

ni sa vakatovolei au oti ko koya, ka'u na qai rairai mai me vaka na koula.

11Sa muria dina na nona i lakolako na yavaqu;

a nona sala ka'u sa vakabauta ka sega ni lako tani mai kina.

12Au sa sega talega ni biuta na vunau ni tebenigusuna;

a vosa ni gusuna ka'u sa vinakata ka cata na qau kakana.

13Ia sa duabau ga na lomana, ko cei me vagolea tani?

Na ka sa vinakata na yalona, sa kitaka ga.

14Ni sa vakacavara ko koya na ka sa lesia vei au;

ka sa vuqa na ka vakaoqo sa tiko e na nona vakanananu.

15O koya oqo ka'u sa kidroa kina e matana;

ni'u sa vakasamataka, ka'u sa qai rerevaki koya.

16Ni sa vakamalumalumutaka na yaloqu na Kalou;

sa vakavuna na noqu rere ko Koya sa Kaukauwa;

17ia ka'u se sega ni muduki tani e na vuku ni butobuto,

ka segai talega e na vuku ni butobuto vavaku sa tabonaka na mataqu.