Same 53 - Ai Vola Tabu (Vakadewa Makawa Vakavoutaki 2021)（FRV21）

Na Ca ni Tamata Kecega(Same 14) Vua nai liuliu ni sere: me vaka na Maalaca. A Masikili i Tevita.

1 Roma 3.10-12 Sa kaya e lomana na tamata lialia, “Sa sega na Kalou.”

Era sa ca sara, era sa kitaka nai valavala ca e velavela;

sa sega e dua sa caka vinaka.

2Sa rai sobu mai lomalagi na Kalou kivei ira na tamata

me raica se dua sa vuku,

se sa vakasaqara na Kalou.

3Era sa suka tani ki muri ko ira yadua: era sa yaco vata me ra velavela;

sa sega e dua sa caka vinaka, sa sega sara e dua.

4Sa sega beka na nodra vuku ko ira na daukitaka nai valavala ca,

ko ira era sa kania na noqu tamata me vaka era kana madrai,

ka ra sa sega ni masu vua na Kalou?

5Era a rere vakalevu

e na tikina sa sega kina na ka me ra rerevaka,

ni sa duibiubiuta na Kalou na suidra era sa mai soqoni vakaivalu vei iko;

o ni sa vakamaduataki ira, ni sa beci ira na Kalou.

6Me sa yaco mada na bula kivei ira na Isireli mai Saioni!

Ni sa kauti ira tale mai na Kalou na nona tamata era tiko vakabobula,

ena qai reki ko ira na Jekope, ka na marau ko ira na Isireli.