Vakarua 3 - Ai Vola Tabu (Vakadewa Makawa Vakavoutaki 2021)（FRV21）

Sa Vakamalumalumutaki ko Oki na Tui Pasani(Tiko mai na Lekutu 21.31-35)

1“Eda a qai gole yani, ka lako cake e na sala ki Pasani. A sa lako mai me vala kei keda ko Oki na tui Pasani, ko koya kei ira kecega na nona tamata, me ia nai valu mai Etirei.

2A sa kaya vei au ko Jiova, ‘Mo kakua ni rerevaki koya: ni'u na soli koya, kei ira kecega na nona tamata, kei na nona vanua, ki na ligamu; ia ko na kitaka vua me vaka ko a kitaka vei Sioni na nodra tui na Amoraiti, ko koya ka tiko mai Esiponi.’

3A sa soli Oki talega, na tui Pasani, ko Jiova na noda Kalou, ki na ligada, kei ira kecega na nona tamata. Ia eda sa yaviti ira ka sa sega e dua sa vo vua.

4Ia eda sa rawa na nona koro kecega e na gauna ko ya, sa sega e dua na koro eda sa sega ni kovea mai vei ira—e onosagavulu na koro, na vanua kecega ko Arikopi, na matanitu i Oki mai Pasani.

5A koro kecega oqo sa viribaiti e na bai vatu cecere, ka sa vakaisogo, ka sa vakalawalawa kaukamea, ia sa vuqa sara talega na veikoro era sa sega ni vakabai.

6Ia eda a vakawabokotaki ira, me vaka na ka eda a kitaka vei Sioni na tui Esiponi, ni da a vakarusai ira kece sara na tagane, kei ira na yalewa, kei ira na lalai, e na koro kecega.

7Ia na manumanu kecega e yavai va, kei nai yau e na veikoro, eda sa tokitaka me noda.

8Ia eda sa kovea, e na gauna ko ya, mai na ligadrau na nodra tui na Amoraiti na vanua sa koto e na baravi ni Joritani oqo, mai na uciwai ko Arinoni ka yaco ki na Ulunivanua ko Erimoni

9(ko Erimoni era vakatoka ko Sirioni ko ira na kai Saitoni; ia era sa vakatoka ko Siniri ko ira na Amoraiti),

10a veikoro kecega mai na buca, kei Kiliati taucoko, kei Pasani taucoko, ka yacovi Salika kei Etirei, na veikoro ni matanitu i Oki mai Pasani.

11Sa vo ga ko Oki na tui Pasani vei ira na kena vo ni tamata yagolevu sara; raica, sai mocemoce kaukamea na nona i mocemoce; sa sega li ni toka mai Rapa era sa taukena na luve i Amoni? E ciwa na kiupiti na kena balavu, ka va na kiupiti na kena rabailevu, me vaka na kiupiti ni tamata.

Wasei na Vanua e na Tokalau ni Joritani(Tiko mai na Lekutu 32.1-42)

12“Ia na vanua oqo, eda sa taura e na gauna ko ya, mai Aroeri, ko koya mai na uciwai ko Arinoni; ia e dua na wase ni vanua veiulunivanua ko Kiliati, kei na kena veikoro, au a solia vei ira na Rupeni kei ira na Kata.

13Ia na kena wase i Kiliati sa vo, kei Pasani taucoko, na matanitu i Oki, au a solia ki na yavusa-veimama i Manasa. (Na vanua kecega ko Arikopi: na vanua ko Pasani, o koya sa dau vakatokai na vanua ni tamata yagolevu sara.

14Ko Jairi na luve i Manasa sa taura na vanua kecega ko Arikopi ka yaco ki na nodra i yalayala na luve i Kisuri kei Meeka, ka sa vakatokai ira e na yacana, ko Avevoci-jairi—oqori ko Pasani—ka yacova na gauna oqo.)

15Ia ka'u a soli Kiliati kivei Mekiri.

16Ia vei ira na Rupeni kei ira na Kata, ka'u a solia mai Kiliati ka yacova na uciwai ko Arinoni, e dua na kena wase ni buca, kei nai yalayala me yacova na uciwai ko Japoki, sa nodra i yalayala na luve i Amoni;

17na vanua veibuca talega, kei na Joritani kei na baravi, mai Kinereci ka yacova na wasawasa mai na vanua veibuca, na Wasa Tuituina, e ruku i Asitoci-pisika vaka ki na tokalau.

18 Josua 1.12-15 “Ia ka'u a vakaroti kemuni e na gauna ko ya, ka kaya, ‘Sa solia vei kemuni na vanua oqo ko Jiova na nomuni Kalou mo ni taukena. Kemuni kecega na tamata i valu mo ni vakaiyaragi ka liutaki ira na wekamuni na Isireli.

19Ia ko ira ga na watimuni, kei na nomuni lalai, kei na nomuni manumanu susu—ka'u sa kila ni sa levu na nomuni manumanu susu—era na tiko e na nomuni veikoro ka'u sa solia oti vei kemuni,

20ka me solia oti mada ko Jiova nai vakavakacegu vei ira na wekamuni, me vaka vei kemuni, ka me ra taukena talega na vanua sa solia vei ira ko Jiova na nomuni Kalou mai na tai kadua ni Joritani. Ko ni na qai lesu na tamata yadua ki na nona vanua, ka'u sa solia vei kemuni.’

21Ia ka'u a vakaroti Josua e na gauna ko ya, ka kaya, ‘Sa raica na matamu na ka kecega sa cakava ko Jiova na nomu Kalou vei rau na tui oqo. Ena cakacaka vakakina ko Jiova ki na matanitu kecega ko na lako yani kina.

22Mo kakua ni rerevaki ira, ni sa vala e na vukumuni ko Jiova na nomuni Kalou.’

Sega ni Vakadonui vei Mosese me Butuka na Vanua Yalataki

23 Tiko 27.12-14; Vrua 32.48-52 “Ia ka'u a vakamasuti Jiova e na gauna ko ya, ka kaya,

24‘Kemuni Jiova na Turaga, ko ni sa ia me vakatakila vua na nomuni tamata na kemuni levu, kei na ligamuni kaukauwa. Ia ko cei na kalou mai lomalagi se e vuravura me cakava rawa na ka sa tautauvata kei na nomuni cakacaka, kei na nomuni kaukauwa?

25Me'u lako mada, ka raica na vanua vinaka, mai na tai kadua ni Joritani, na vanua veiulunivanua vinaka ko ya vata kei Lepanoni.’

26Ia ka sa cudruvi au ko Jiova e na vukumuni, ka sega ni rogoci au. Sa kaya ga vei au ko Jiova, ‘Mo kua so! Mo kakua ni vosa tale vei au e na ka oqo!

27Mo cabe ki na dela i Pisika, ka rai yani vaka ki na ra, kei na vualiku, kei na ceva, kei na tokalau, ka raica e na matamu, ni ko na sega ni qalo kosova na Joritani oqo.

28Ia mo vakaroti Josua, ka vakayaloqaqataki koya, ka vakaukauwataki koya, ni na liutaki ira na tamata oqo ko koya, ka na vakatikori ira ko koya e na vanua ko na raica.’

29Ia eda a tiko e na buca sa donui Peci-piori.