Dauveilewai 18 - Ai Vola Tabu (Vakadewa Makawa Vakavoutaki 2021)（FRV21）

Na Nodra Qara Vanua na Mataqali i Tani

1Ena gauna ko ya sa sega na tui vei ira na Isireli. Ia e na gauna ko ya sa qara e dua nai votavota me nodra me ra tiko kina ko ira na yavusa i Tani; ni sa sega ni rawa vei ira na nodra i votavota e na kedra maliwa na veiyavusa i Isireli, ka yacova na gauna ko ya.

2A ra sa tala ko ira na Tani e le lima na tamata e na nodra mataqali mai na nodra i yalayala, eratou sa tamata qaqa, mai Sora kei Esitaoli, me ratou la'ki rai vanua, ka dikeva vakavinaka. A ra sa kaya vei iratou, “Dou la'ki dikeva vakavinaka na vanua.” A ratou sa lako yani ki na vanua veiulunivanua ko Ifereimi, ki na vale i Maika, ka ratou sa moce kina.

3Ni ratou sa voleka ki na vale i Maika, eratou sa kila na domo ni cauravou, o koya na Livai. A ratou sa curu kina, ka kaya vua, “O cei e kauti iko mai ki ke? Ka cava ko mai cakava tiko e ke? Ka cava sa rawa vei iko e ke?”

4A sa kaya vei iratou ko koya, “Sa kitaka vakaoqo ga vei au ko Maika: a sa voli au me'u veiqaravi vua, ka'u sa nona bete.”

5A ratou sa kaya vua, “Kerekere, mo vakataroga mada na Kalou, me keitou kila kina se na rawa vinaka na ka keitou sa lako kina, se segai.”

6A sa kaya vei iratou ko koya na bete, “Dou lako ga e na vakacegu. Sa tu e na ruku ni mata i Jiova na sala dou sa lako kina.”

7Eratou sa qai lako na tamata e lewe lima, ka ratou sa lako mai ki Laisi; a ratou sa kunea na tamata era sa tiko kina, ni ra sa tiko wele ga, me vaka na nodra tiko na kai Saitoni, era tiko vakacegu ka wele ga; a sa sega e dua sa kaukauwa me vakacacana e dua e na dua na ka; a ra sa tiko veiyawaki kei ira na kai Saitoni, ka ra sa sega ni veilakovi kei ira na tamata tani.

8Ia ni ratou sa lesu tale mai vei ira na wekadra ki Sora kei Esitaoli, era sa kaya vei iratou ko ira na wekadra, “A cava sa nomudoui tukutuku?”

9A ratou sa kaya, “Tou ia, me da lako cake ka vala kei ira; ni keitou sa raica oti na vanua, ka sa vinaka sara. Ia dou sa wele tiko? Mo dou kakua ni vucesa mo dou lako mo dou taukena na vanua.

10Ni dou sa lako kina, dou na yaco vei ira na tamata era tiko wele ga. Ia sa dua na vanua levu ko ya, ni sa solia ki na ligamudou ko koya na Kalou, a vanua sa sega ni dravudravua e na veika sa tiko e vuravura.”

11A ra sa cavu tu mai kea e le ono na drau na tamata e na yavusa i Tani, ka ra biubiu mai Sora kei Esitaoli, ka ra sa vakaiyaragi tu me ia nai valu.

12A ra sa lako cake, ka tiko mai Kiriaci-jiarimi e Juta. O koya oqo era sa vakatoka kina na yasana ko ya ko Meene-tani, ka yacova na siga oqo. Raica, sa koto e na yasana ki na ra kei Kiriaci-jiarimi.

13A ra sa lako yani mai kea ki na vanua veiulunivanua ko Ifereimi, ka yaco ki na vale i Maika.

14A ratou sa qai vosa ko iratou na tamata limalima eratou a la'ki dikeva na vanua ko Laisi, ka kaya vei ira na wekadratou, “Dou sa kila beka ni sa tiko e na veivale oqo e dua na efoti, ka so na matakau, ka dua na matakau ceuceu, ka dua na matakau kaukamea? Ia oqo, dou lewa mada na ka mo dou cakava.”

15A ra sa gole kina, ka lako ki na nona vale na cauravou, na Livai, io ki na vale i Maika, a ra sa veikidavaki kaya.

16Ia sa tu mai na matamata-ni-koro ko ira na tamata e lewe ono na drau vei ira na yavusa i Tani, o ira era sa vakaiyaragi tu e nai yaragi ni valu.

17Eratou sa qai lako cake na tamata limalima eratou a la'ki dikeva na vanua ka ratou curu ki loma, ka kauta na matakau ceuceu, kei na efoti, kei na veimatakau tani kei na matakau kaukamea. Ia sa tucake tu e na matamata-ni-koro na bete, kei ira na tamata e lewe ono na drau era sa vakaiyaragi tu e nai yaragi ni valu.

18E na gauna eratou sa curu kina ki na vale i Maika ko iratou oqo ka kauta mai kina na matakau ceuceu, na efoti, kei na matakau kaukamea, kei na veimatakau tani, a sa qai kaya vei iratou ko koya na bete, “A cava dou sa cakava?”

19A ratou sa kaya vua, “Mo tiko lo ga! Mo tabonaka na gusumu e na ligamu, ka mo lako vata kei keimami, mo mai neimami qase ka neimami bete. Sa vinaka beka li vei iko mo bete ki na vale ni tamata e le duabau ga, se mo bete ki na dua na yavusa kei na mataqali e Isireli?”

20A sa reki kina na yalona na bete. A sa kauta ko koya na efoti, kei na matakau ceuceu, kei na veimatakau tani, ka lako yani e na kedra maliwa na tamata.

21A ra sa lesu ka lako yani, ka lewa me liu vei ira na gone lalai kei na manumanu e yavai va kei na veika era taukena.

22Ia ni ra sa veiyawaki sara kei na vale i Maika, era sa soqoni vata na tamata era sa tiko e na veivale sa voleka ki na vale i Maika, a ra sa la'ki vauci ira na Tani.

23A ra sa kaci yani vei ira na Tani, ka ra sa rai vuki, ka kaya vei Maika, “A cava sa manati iko, ni ko sa lako mai kei ira oqo ko sa vakasoqona vata mai?”

24A sa kaya ko koya, “Dou sa kauta tani na noqu kalou ka'u a cakava kei na bete, ka dou sa lako tani, ka cava tale sa qai vo vei au? Ia ka cava dou sa taroga kina vei au, ‘A cava sa manati iko?’ ”

25A ra sa kaya vua ko ira na Tani, “Me kakua ni rogo vei keimami na domomu, de so na tamata cudrucudru era na qai ravuti kemudou, ka dou na mate kina ko iko kei ira na nomu lewe-ni-vuvale.”

26A ra sa qai lako yani ko ira na Tani. Ia ni sa raica ko Maika ni ra sa kaukauwa cake ka sa malumalumu ko koya, a sa lesu tale ko koya ki na nona vale.

Era Laki Vakaitikotiko e Laisi ko Ira na Mataqali i Tani

27A ra sa kauta na veika ka cakava ko Maika, kei na nona bete talega; a ra sa lako ki Laisi, kivei ira na lewe-ni-vanua era sa vakacegu ka tiko wele voli ga, ka ra sa yaviti ira e nai seleiwau ka vakama na koro.

28A sa sega e dua me dro bula, ni sa yawa sara mai Saitoni, ka ra sa sega ni dauveilakovi kei ira na tamata tani. A sa koto oqori e na buca mai Peci-riopi. A ra sa qai tara na koro, ka tiko kina.

29A ra sa vakatoka na yaca ni koro ko Tani, me vaka na yaca i Tani na nodra qase, o koya ka luve i Isireli; ia na yaca ni koro koya eliu ko Laisi.

30A ra sa vakaduria cake me nodra na matakau ceuceu ko ira na Tani. Ia ko Jonacani, na luve i Kerisomi, na luve i Mosese, o koya kei ira na luvena, era sa bete ki na yavusa i Tani ka yacova na siga sa vakabobulataki kina na vanua.

31A ra sa vakaduria cake na matakau ceuceu i Maika, ko ya ka cakava ko koya, me nodra e na gauna kecega sa tiko kina mai Sailo na vale ni Kalou.