Akeai 2 - Ai Vola Tabu (Vakadewa Makawa Vakavoutaki 2021)（FRV21）

Na Totoka ni Vale Tabu sa Vakavoui

1E nai kavitu ni vula, e nai karuasagavulu ka dua ni siga ni vula, sa yaco na vosa i Jiova vei Akeai na parofita, ka vaka:

2“Mo vosa mada vei Serupepeli na luve i Sialitieli, na kovana e Juta, kei Josua na luve i Jiosataki, na bete levu, kei ira na tamata sa vo tiko, ka kaya,

3Esera 3.12‘O cei vei kemudou sa bula tiko dou a raica na vale oqo e na kena lagilagi eliu? Ka sa vaka beka evei na ka dou sa qai raica edaidai? Sa sega li ni vaka na ka wale sara e na matamudou?

4Ia mo gumatua mada ga, i Serupepeli, sa kaya ko Jiova. Mo gumatua talega, i Josua na luve i Jiosataki, na bete levu. Mo dou gumatua kece talega, na lewe-ni-vanua, sa kaya ko Jiova. Dou ia na cakacaka, ni'u sa tiko vata kei kemudou, sa kaya ko Jiova-ni-lewevuqa,

5Lako 29.45,46me vaka na noqu vosa ni veiyalayalati kei kemudou, ni dou a lako mai Ijipita. Sa tiko ga kei kemudou na Yaloqu. Dou kakua ni rere.

6Ipe 12.26Ni sa kaya vakaoqo ko Jiova-ni-lewevuqa: Sa vakadua tale, sa vo vakalailai, ka'u na qai vakayavalati lomalagi kei vuravura, kei na waitui, kei na vanua mamaca.

7Ka'u na vakayavalata na veimatanitu kecega, me rawa ni yaco mai kina nai yau talei ni veimatanitu kecega, ka'u na qai vakasinaita na vale oqo e nai ukuuku, sa kaya ko Jiova-ni-lewevuqa.

8Sa noqu na siliva, ka sa noqu na koula, sa kaya ko Jiova-ni-lewevuqa.

9Ena levu cake sara na lagilagi ni vale oqo e muri mai na kena e liu, sa kaya ko Jiova-ni-lewevuqa. Ia e na vanua oqo ka'u na vakayacora kina na veivinakati, sa kaya ko Jiova-ni-lewevuqa.’ ”

A Veivunauci kei na Vosa ni Yalayala

10E nai karuasagavulu-ka-va ni siga e nai kaciwa ni vula, e nai karua ni yabaki i Taraiasi, sa yaco na vosa i Jiova vei Akeai na parofita me tukuna:

11“Sa kaya vakaoqo ko Jiova-ni-lewevuqa: Mo tarogi ira mada na bete e na vuku ni vunau, ka kaya:

12‘Ke dua na tamata sa kauta na lewe ni manumanu mei soro tabu e na tutu ni nona i sulu, a sa tara e na tutu ni sulu na madrai, se na su, se na waini, se na waiwai, se dua na kakana, sa na tabu kina na ka oqori se segai?’ ” A ra sa kaya na bete, “E segai.”

13Tiko 19.11-22Sa qai kaya ko Akeai, “Kevaka e dua sa sega ni savasava e na vuku ni yago ni mate e veitaratara kaya, ka mani tara e dua na ka oqo, ena sega li ni tawa savasava?” A ra sa kaya na bete, “Io, ena sega ni savasava.”

14Sa qai vosa tale ko Akeai, ka kaya, “Sa vakakina ko ira na tamata oqo, ka sa vakakina na matanitu oqo e mataqu, sa kaya ko Jiova; ka sa vaka talega kina na cakacaka kecega ni ligadra; ka veika era sa vakacabora mai kea sa sega ni savasava.

15Ia oqo, mo dou qai vakananuma mada e na siga oqo edaidai ka lako yani. Ni bera ni biu na vatu me veitaqataqai e dela ni vatu e na vale tabu i Jiova,

16dou a vakaevei tu? Ni sa lako mai e dua ki nai binibini i vakarau e ruasagavulu, ia ka sa qai tini ga. Ni sa lako mai e dua ki nai keli-waini me takiva nai vakarau e limasagavulu mai nai keli, ia sa qai ruasagavulu walega.

17Au a yaviti kemudou e na cagi todra, kei na bo-kata, kei na uca-cevata, e na cakacaka kece ni ligamudou; ia dou a sega ga ni lesu vei au, sa kaya ko Jiova.

18Dou vakananuma mada e na siga oqo ka lako yani, io mai nai karuasagavulu-ka-va ni siga e nai kaciwa ni vula ka yacova na gauna sa oti yani. Io me tekivu mai na siga sa tauyavutaki kina na vale tabu i Jiova, dou vakananuma kina oqo:

19Sa vo li na sila e na lololo? E dina sara ni ra se sega ga ni vua na vaini, na lolo, na pomekaraneti kei na olive. Ia me tekivu mai na siga oqo ka lako yani, au na vakalougatataki kemudou.”

Na Vosa ni Yalayala ni Kalou vei Serupepeli

20A sa yaco tale e nai karua ni gauna na vosa i Jiova vei Akeai e nai karuasagavulu-ka-va ni siga ni vula, ka vaka:

21“Mo kaya vei Serupepeli, na kovana e Juta, Au na vakayavalata na lomalagi kei vuravura,

22ka'u na vukica nai tikotiko vakaturaga ni veimatanitu. Au na vakarau vakarusa na kaukauwa ni veimatanitu e na veivanua, ka vukica na qiqi-ni-valu kei ira era vodo kina. A ra na dui bale sobu na ose kei ira era vodo kina, na tamata yadua e nai seleiwau ni wekana.

23E na siga ko ya, sa kaya ko Jiova-ni-lewevuqa, au na kauti iko, Serupepeli na luve i Sialitieli, na noqu tamata, sa kaya ko Jiova, ka'u na vakayacori iko mo vaka na mama ni sitaba, ni sai iko ka'u sa digitaka, sa kaya ko Jiova-ni-lewevuqa.”