1Ia ni sa masu oti ko Esera, ka vakatusa ka tagi, ka cuva vakatoboicu e na mata ni vale ni Kalou, era sa qai soqoni vata vua nai soqosoqo levu mai vei ira na Isireli, na tagane, kei na yalewa, kei na gone, ni ra sa tagi vakalevu ko ira na tamata.
2A sa vosa vei Esera ko Sekanaia na luve i Jieli ka tagane, e dua vei ira na tagane na luve i Ilama, ka kaya, “Keimami sai valavala ca vua na neimami Kalou, ka bauti ira na yalewa era yalewa tani me wati keimami mai vei ira na lewe-ni-vanua, ia sa rawa me vinaka tale ko ira na Isireli mai na ka oqo.
3Ia oqo me da ia na veiyalayalati kei na noda Kalou, me keimami biuti ira tani na wati keimami kecega, kei ira era sa sucu vei ira, me vaka na vosa ni noqu turaga, kei na nodra vosa era sa sautaninini e na vuku ni vosa ni noda Kalou; ia me vakayacori me vaka na vunau.
4Mo ia, ni sa nomu i tavi na ka oqo, keimami sa loma vata talega kei iko. Mo yalo dei ga, ka kitaka.”
5Sa qai ia ko Esera, ka vakabubuluitaki ira na bete levu, kei ira na Livai, kei ira kecega na Isireli, me ra kitaka me vaka na vosa oqo. Ka ra sa bubului kina.
Sega ni Vakadonui na Yalewa Tani kei na Luvedra6Sa qai tucake ko Esera mai na mata ni vale ni Kalou, ka curu ki na tiki ni vale sa nei Joenani na luve i Ilaiasipi ka tagane. Ia ni sa yaco kina, sa sega ni kana madrai se gunu wai, ni sa tagicaka na nodra talaidredre era a vakabobulataki.
7A ra sa kacivaka yani e Juta kei Jerusalemi vei ira kece era a vakabobulataki, me ra soqoni vata mai ki Jerusalemi;
8ia ko koya sa na bese ni lako mai e na bogi tolu, me vaka na ka era a bosea na turaga kei ira na qase, me kovei na nona i yau kecega, ka me vakatatabui ko koya mai na nodra i soqosoqo era a kau vakabobula tani.
9Era sa qai soqoni vata ki Jerusalemi ko ira kecega na Juta kei na Penijamini ni se bera ni oti na bogi tolu. Oqori nai kaciwa ni vula, e nai karuasagavulu ni siga ni vula; a sa tiko ko ira kecega na tamata e na salatu mai na vale ni Kalou, ka sautaninini e na vuku ni ka oqo, e na vuku talega ni uca levu.
10A sa tucake ko Esera na bete, ka sa kaya vei ira, “Kemuni sa talaidredre, ni kemuni sa kauta na yalewa tani me watimuni, me vakalevutaka na nodra talaidredre na Isireli.
11Ia oqo mo ni vakatusa vei Jiova na Kalou ni nomuni qase, ka kitaka na ka e vinaka vua; ka tawasei kemuni tani mai vei ira na lewe-ni-vanua, kei ira na watimuni era yalewa tani.”
12Era sa qai vosa nai soqosoqo taucoko, ka kaya e na domo levu, “E dodonu me keimami kitaka me vaka na ka ko sa kaya.
13Ia ko ira na tamata era sa lewe vuqa, a sa levu na uca e na veisiga oqo, ka sa dredre me keimami tiko e tautuba. A sa sega ni caka rawa na ka oqo e na bogi dua, se na bogi rua, ni keimami sa lewe vuqa sa talaidredre e na ka oqo.
14Me ra ia tiko ko ira na noda turaga ni soqosoqo taucoko, ia me ra dui lako mai e na siga sa loku, ko ira kecega e na noda veikoro era sa veiwatini kei ira na yalewa tani, kei ira na qase mai na veikoro, kei ira na mataveilewai, ka me takali tani mada vei keda na cudru waqawaqa ni noda Kalou e na vuku ni ka oqo.”
15Ia ko Jonacani ga na luve i Asaeli ka tagane kei Jeasaia na luve i Tikiva ka tagane erau sa saqata na ka oqo, ka sa vukei rau ko Mesulame kei Sapitai na Livai.
16A ra sa kitaka vakakina ko ira na vakabobulataki. A ra sa lesi, ko Esera na bete, ka so vei ira na qase sa liu, me vaka na vale ni nodra qase, me vaka na yacadra yadua, a ra sa tiko sobu e nai matai ni siga e nai katini ni vula, me ra qaqa na ka oqo.
17A ra sa tinia vei ira kecega na tamata era a veiwatini kei ira na yalewa tani, a sa yaco nai matai ni siga e na kenai matai ni vula.
Ko Ira Era Cala Ni Ra Vakawati Tani18A sa kune eso mai vei ira na luvedra na bete era a veiwatini kei na yalewa tani, mai vei iratou na luve i Jesua na luve i Josateki kei iratou na wekana: ko Meesea, kei Iliesa, kei Jaripi, kei Kitalaia.
19A ra sa bubului me ra biuta tani na watidra, ia ni ra sa cala kina, era sa vakacabora e dua na sipi tagane mai na qele ni sipi, e na vuku ni nodra cala.
20Ia vei iratou na luve i Ima: ko Anani, kei Sepataia.
21Vei iratou talega na luve i Erimi: ko Meesea, kei Ilaijia, kei Semaia, kei Jieli, kei Usaia.
22Vei iratou talega na luve i Pasuri: ko Elioenai, ko Meesea, ko Isimeli, ko Nicaneli, ko Josapati, kei Elasa.
23Vei iratou talega na Livai: ko Josapati, kei Semeai, kei Kelaya (ko ya ko Kilita), ko Pecaaia, ko Juta, kei Iliesa.
24Vei iratou talega na dausere: ko Ilaiasipi; vei iratou talega nai vakatawa-ni-katuba: ko Salumi, kei Telemi, kei Urai.
25Ia vei ira na Isireli: vei iratou na luve i Parosi: ko Rimaya, kei Jisaia, kei Malikaia, kei Maijamini, kei Iliesa, kei Malikaia, kei Penaia.
26Vei iratou talega na luve i Ilama: ko Matanaia, ko Sakaraia, kei Jieli, kei Apiti, kei Jiremoci, kei Ilaijia.
27Vei iratou talega na luve i Satu: ko Elioenai, ko Ilaiasipi, ko Matanaia, kei Jiremoci, kei Sevati, kei Asisa.
28Vei iratou na luve i Pepai: ko Jioanani, ko Enanaia, ko Sapei, ko Acelai.
29Vei iratou na luve i Pani: ko Mesulame, ko Maluki, kei Ataia, ko Jasupi, kei Siali, kei Remoci.
30Vei iratou talega na luve i Peaci-moapi: ko Atina, ko Kilali, ko Penaia, ko Meesea, ko Matanaia, ko Pisalieli, kei Pinui, kei Manasa.
31Vei iratou na luve i Erimi: ko Iliesa, ko Isaia, ko Malikaia, ko Semaia, ko Simione,
32ko Penijamini, ko Maluki, ko Semaraia.
33Vei iratou na luve i Asumi: ko Matinai, ko Mataca, ko Sapati, ko Ilifeleti, ko Jiremei, ko Manasa, ko Semeai.
34Vei iratou na luve i Pani: ko Meatai, ko Emirami, kei Ueli,
35ko Penaia, ko Petiya, ko Kiluai,
36ko Vaniya, ko Meremoce, ko Ilaiasipi,
37ko Matanaia, ko Matinai, kei Jeesau,
38kei Pani, kei Pinui, kei Semeai,
39kei Selemaia, kei Necani, kei Ataia,
40ko Makanatipei, ko Sasei, ko Sarei;
41ko Esareli, kei Selemaia, ko Semaraia;
42ko Salumi, ko Amaraia, ko Josefa.
43Vei iratou na luve i Nipo: ko Jieli, ko Matacaia, ko Sapati, ko Sipina, ko Jatai, kei Joeli, ko Penaia.
44O ira kecega na tagane oqo era sa vakawati kei na yalewa era sa lewe ni matanitu tani, ka so vei ira sa vakaluveni vei ira na watidra.
Who We AreWhat We EelieveWhat We Do
2025 by iamachristian.org,Inc All rights reserved.
