Roma 10 - Ai Vola Tabu (Vakadewa Makawa Vakavoutaki 2021)（FRV21）

1O kemudou na veiwekani, au sa gadreva e na vu ni yaloqu, au sa masu talega vua na Kalou e na vukudra na Isireli, me ra bula.

2Ni'u sa tukuni ira ni ra sa lomakatakata vua na Kalou, ia era sa sega ni yalomatua.

3Ni ra sa sega ni kila na veivakadonui sa vu mai vua na Kalou, a ra sa qara me dua na veivakadonui vakataki ira, a ra sa sega kina ni vakamalumalumutaki ira me ra vakadonui mai vua na Kalou.

4Ni sa vakayacora na Karisito na ka sa nakiti e na vunau, me vakadonui ko ira kece era sa vakabauta.

Sa Baleti Keda Kece na Veivakabulai

5 Vsoro 18.5 Ni sa tukuna ko Mosese na veivakadonui sa yaco e na vuku ni vunau, “Na tamata sa cakava, ena bula kina.”

6Vrua 30.12-14Ia na veivakadonui sa yaco e na vakabauta sa tukuna vakaoqo, “Mo kakua ni vosa e na yalomu, ‘O cei me lako cake ki lomalagi?’ ”

7“se vaka ne, ‘O cei me lako sobu ki bulu?’ ”

8Ia ka cava e kaya?

“Sa voleka vei iko na vosa,

io e na gusumu, kei na yalomu”

(ko ya, na vosa ni vakabauta, o koya keitou sa vunautaka);

9ni kevaka ko na vakatusa e na gusumu ni sa Turaga ko Jisu, ka vakadinata e na vu ni yalomu ni sa vakaturi koya cake tale mai na mate na Kalou, ko na bula.

10Ni nona vakadinata na tamata e na vu ni yalona sa ka e vakadonui kina, kei na nona vakatusa mai gusuna sa ka e vakabulai kina.

11Aisea 28.16Ni sa kaya nai Vola Tabu, “O koya yadua sa vakabauti koya ena sega ni vakamaduataki.”

12Ni sa tautauvata na Jiu kei koya sa matanitu tani; ni sa dua bauga na Turaga vei ira kecega, o koya sa vutu ni ka vinaka vei ira kecega era sa masuti koya.

13Joeli 2.32Ni, “Ko ira vakayadua era sa masuta na yaca ni Turaga era na vakabulai.”

14Ia era na qai masu vakacava vua era sa sega ni vakabauta? A ra na vakabauti koya vakacava era sa sega ni se bau rogoca? A ra na rogoca vakacava kevaka e sega e dua me vunautaka?

15Aisea 52.7Ka ra na tukuna vakacava kevaka era sa sega ni talai? Me vaka na ka sa volai, “Sa lagilagi sara na yavadra era sa tukuna nai tukutuku-vinaka!”

16Aisea 53.1Ia era sa sega ni vakabauta kecega nai tukutuku-vinaka; ni sa kaya ko Aisea, “I Jiova, ko cei sa vakabauta na neitou i tukutuku?”

17Eda sa kila kina ni sa rawa na vakabauta e na vakarorogo, kei na vakarorogo e na vosa i Karisito.

18 Same 19.4 Ia ka'u sa taroga, Era sa sega li ni rogoca? E dina sa vakakina; ni,

“Sa lako na kedrai rogorogo ki vuravura taucoko,

kei na nodra vosa ki nai yalayala kei vuravura.”

19 Vrua 32.21 Ia ka'u sa taroga, Sa sega beka ni kila ko ira na Isireli? Sa tukuna eliu ko vakaoqo ko Mosese,

“Au na cakava mo dou vuvutaki ira era sa sega ni noqu tamata;

ka'u na vakacudrui kemudou mai na dua na matanitu sesewa.”

20 Aisea 65.1 A sa doudou sara ko Aisea, ka sa tukuna,

“Era sa kunei au ko ira era a sega ni qarai au;

au sa vakarairaitaki vei ira era a sega ni tarogi au.”

21 Aisea 65.2 Ia ka sa kaya vei ira na Isireli, “E na veisiga kecega ka'u sa dodoka yani na ligaqu kivei ira na tamata dautalaidredre ka dauvakatitiqa.”