Lako Yani 24 - Ai Vola Tabu (Vakadewa Makawa Vakavoutaki 2021)（FRV21）

Na Dra ni Veiyalayalati

1A sa kaya vei Mosese ko koya, “Dou cabe cake mai vei Jiova, ko iko kei Eroni, ko Netapi, kei Epaiu, kei na lewe vitusagavulu vei ira na qase ni Isireli, ka lotu ni dou sa toka vakayawa.

2Ia ko Mosese duaduaga me toro voleka mai vei Jiova; ia ko ira na kena vo me ra kakua ni toro voleka mai, ka me ra kakua talega ni cabe vata kaya ko ira na tamata.”

3A sa lako ko Mosese, ka tukuna vei ira na tamata na vosa kecega i Jiova, kei na lewa kecega. A ra sa vosa vata na tamata kecega, ka ra kaya, “A vosa kecega sa kaya ko Jiova keimami na cakava.”

4A sa vola na vosa kecega i Jiova ko Mosese, a sa sou e na mataka, ka cakava nai cabocabo-ni-soro e ruku ni ulunivanua, kei na duru e tinikarua, me vaka nai wiliwili ni veiyavusa i Isireli era tinikarua.

5A sa tala eso na cauravou mai vei ira na Isireli, a ra sa vakacabora eso nai soro kama, ka vakamatea eso na bulumakau mei madrali ni veivinakati vei Jiova.

6A sa waseruataka na dra ko Mosese, ka livia ki na beseni; a sa kureitaka e dua na kena wase ni dra ki na dela ni cabocabo-ni-soro.

7A sa taura nai vola ni veiyalayalati, ka wilika ni ra sa rogoca tiko na tamata; a ra sa kaya, “A ka kecega sa kaya ko Jiova keimami na cakava, ka talairawarawa.”

8Maciu 26.28; Mari 14.24; Luke 22.20; 1Kori 11.25; Ipe 9.19-20; Ipe 10.29A sa taura na dra ko Mosese ka kureitaka vei ira na tamata, ka kaya, “Raica, na dra ni veiyalayalati, sa ia vei kemudou e na vosa kecega oqo ko Jiova.”

Ko Mosese e na Ulunivanua ko Saineai

9Sa ra qai cabe ko Mosese kei Eroni, ko Netapi kei Epaiu, ka le vitusagavulu vei ira na qase ni Isireli;

10a ra sa raica na Kalou nei Isireli; ia sa koto e ruku ni yavana na ka sa vaka na raravatu, ia na kena vatu na safaia, a sa vaka dina na lomalagi na kena rairai makare.

11A sa sega ni tarai ira na nodra turaga na Isireli ko koya; a ra sa raica na Kalou, ka ra kana ka gunu.

12A sa kaya vei Mosese ko Jiova, “Mo cabe mai vei au ki na ulunivanua, ka tiko kina; ia ka'u na solia vei iko na vatu raraba, kei na vunau, kei na ka ka'u sa lesia, o koya ka'u sa vola oti; mo vakatavulica vei ira.”

13A sa cavu tu ko Mosese kei Josua na nona dauveivuke, ka sa cabeta na ulunivanua ni Kalou ko Mosese.

14A sa kaya vei ira na qase ko koya, “Dou waraki keirau mada eke, me keirau lako tale mada mai vei kemudou; ka raica, sa tiko kei kemudou ko Eroni kei Uri. Kevaka sa dua na ka me lewai vua e dua, ia me qai lako mai vei rau.”

15A sa cabeta na ulunivanua ko Mosese, a sa ubia na ulunivanua na o.

16A sa tiko na serau i Jiova e na dela ni Ulunivanua ko Saineai, a sa ubia na o ka bogi ono. Ia e na kenai kavitu ni siga sa kacivi Mosese ko koya mai na loma ni o.

17Ia na serau i Jiova, sa vaka na bukawaqa sa caucaudre na kenai rairai e na dela ni ulunivanua, ni sa raica ko ira na Isireli.

18Vrua 9.9A sa curu ko Mosese ki loma ni o, a sa cabeta na ulunivanua. A sa tiko mai na ulunivanua ko Mosese ka siga vasagavulu ka bogi vasagavulu.