Efeso 6 - Ai Vola Tabu (Vakadewa Makawa Vakavoutaki 2021)（FRV21）

O Ira na Gone kei Ira nai Tubutubu

1 Kolo 3.20 Oi kemudou na gone, dou talairawarawa vei ira na nomudou qase e na ka sa vinaka vua na Turaga, ni sa dodonu oqo.

2Lako 20.12; Vrua 5.16“Mo vakarokoroko vei rau na tamamu kei na tinamu”—oqo na vunau taumada ka tiko vata na vosa ni yalayala:

3“mo vinaka kina, ka mo bula balavu talega e na dela i vuravura.”

4 Kolo 3.21 Oi kemudou talega na qase, dou kakua ni vakacudrui ira na nomudou gone, ia dou vakavulici ira e na vunau kei nai vakavuvuli ni Turaga.

O Ira na Bobula kei Ira na Nodra Turaga

5 Kolo 3.22-25 Oi kemudou na tamata, dou talairawarawa vei ira na nomudou turaga vakayago, e na rere kei na sautaninini, ni sa dina na yalomudou, me vaka vei Karisito;

6mo dou kakua ni makutu e matadra ga na turaga, mo dou vinakati kina vakatamata; ia me vaka dou sa tamata nei Karisito, mo dou cakava na loma ni Kalou mai na vu ni yalomudou;

7ni sa vinakata tiko na lomamudou, ka me vaka vei koya na Turaga, ka segai vei ira na tamata, dou sa makutu kina;

8ni dou sa kila na ka vinaka kecega ena cakava na tamata yadua, se bobula se i taukei, ena saumi vakakina mai vua na Turaga.

9 Vrua 10.17; Kolo 3.25; 4.1 Oi kemudou talega, na turaga, dou kitaka vakakina vei ira, ka kakua ni vosa vakacudrucudruya, ni dou sa kila sa tiko mai lomalagi na nomudou Turaga, o koya sa nodra talega, ka sa sega ni vakaduiduitaka e dua ko koya.

Nai Yaragi Taucoko ni Kalou

10Me'u tinia, oi kemudou na wekaqu, mo dou kaukauwa tiko e na Turaga, kei na kena levu ni nona kaukauwa.

11Dou vakaiyaragi e nai yaragi kecega ni Kalou mo dou tudei rawa ka vorata nai lawaki ni tevoro.

12Ni da sa sega ni veivala kei ira na tamata, ia eda sa veivala ga kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca e na veiyasana vakalomalagi.

13O koya oqo mo dou vakaiyaragi e nai yaragi kecega ni Kalou, mo dou vorata rawa kina e na siga ca, ia ni dou sa kitaka kece, mo dou tudei.

14Aisea 11.5; 59.17O koya mo dou qai tudei ni sa vauci tu na tolomudou e na lomadina, ka sa tu e na lomaseremudou nai sasabai ni valavala dodonu;

15Aisea 52.7ka sa vakaivava na yavamudou e na cakacaka ni tukutuku-vinaka ni veivinakati.

16Ia me kenai kuri, mo dou kauta na vakabauta mei sasabai, mo dou na bokoca rawa kina na gasau kama kecega ni tevoro;

17Aisea 59.17ka kauta na bula mei vakaruru ni ulu, kei nai seleiwau ni Yalo Tabu, oqori na vosa ni Kalou.

18Dou masu tikoga e na masumasu kecega kei na daukerekere e na Yalo Tabu, ka yadrava tiko kina e na gumatua kei na daukerekere e na vukudra kecega na tamata lotu,

19e na vukuqu talega, me soli vei au na ka me'u tukuna, ka vosa vakadoudou ni'u tukuna na ka vuni ni tukutuku-vinaka,

20o koya, ka'u sa talai me'u vunautaka, oi au sa vesu tu, ka me'u tukuna vakadoudou, me vaka sa kilikili kei au me'u tukuna.

Tini e na Loloma

21 Caka 20.4; 2Timo 4.12 Kolo 4.7,8 Ia mo dou kila talega na noqu tiko, kei na noqu i valavala, ena tukuna na ka kecega vei kemudou ko Tikiko, na wekaqu daulomani kei nai talatala yalodina ni Turaga;

22o koya ka'u sa tala vei kemudou e na vuku ni ka oqo, mo dou kila kina na neitou tiko, me vakaceguya talega na yalomudou ko koya.

23Me nodra na veiwekani na vakacegu, kei na loloma, kei na vakabauta, mai vua na Kalou ko Tamada kei na Turaga ko Jisu Karisito.

24Me tu na loloma vei ira kecega era sa lomana na noda Turaga ko Jisu Karisito e na lomadina. Emeni.