Filimoni 1 - Ai Vola Tabu (Vakadewa Makawa Vakavoutaki 2021)（FRV21）

1Koi au ko Paula, sa vesu tu e na vuku i Karisito Jisu, kei Timoci na wekada, vei Filimoni o koya keirau sa dau lomana, kei na neirau i tokani,

2Kolo 4.17vei Afia talega na wekada yalewa, vei Akipo talega na neirau i tokani e nai valu oqo, vei ira talega nai soqosoqo lotu era sa tiko e na nomu vale:

3Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

Na Loloma kei na Vakabauta nei Filimoni

4Au sa vakavinavinaka vua na noqu Kalou, ni'u sa cavuti iko e na veisiga e na noqu masu;

5ni'u sa rogoca na nomu loloma kei na nomu vakabauta vua na Turaga ko Jisu, kivei ira kece talega era sa lotu;

6me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu.

7Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakaceguya na lomadra era sa lotu.

Na Vakamamasu me Baleti Onisimo

8E na vuku ni ka oqo, ka dina ga ni sa rawa me'u doudou vakalevu e na vuku i Karisito me'u vakarota vei iko na ka e kilikili,

9ia e na vinaka cake me'u yavutaka na noqu vakamamasu vei iko e na loloma—koi au, ko Paula, na qase ka sa vesu tiko edaidai e na vuku i Karisito Jisu—

10Kolo 4.9Au sa vakamasuti iko e na vuku ni luvequ, ko Onisimo, o koya ka'u sa vakatubura ni'u sa vesu tu.

11O koya ka sa sega ni yaga eliu vei iko, ia sa qai yaga sara vei iko oqo, vei au talega.

12Au sa qai tala tale vei iko, o koya oqo mo vakacegui koya, ni sa vaka na lewequ dina sara.

13Au sa via taura ga me tiko vei au, me kemui sosomi me sa qaravi au ni'u sa vesu tu e na vuku ni tukutuku-vinaka,

14ia ni'u sa sega ni kila na yalomu, au sa sega ni via cakava e dua na ka, me kakua ni vaka na ka ni vakasaurara na nomu loloma, ia me sa lomamu ga kina.

15Ni sai koya beka oqo sa lako tani vakalekaleka kina, mo tauri koya tale ka tawa mudu,

16me kakua ni vaka na tamata bobula walega, ia me uasivi cake mai na bobula, me wekamu lomani—e vakabibi vei au, ia ka vakaevei na kena levu vei iko, e na ka vakayago kei na ka ni Turaga talega.

17Ia oqo, kevaka ko sa okati au ni'u sai tokani, mo vakacegui koya me vakataki au.

18Kevaka sa vakacacani iko ko koya e na dua na ka, se sa dua na ka sa dinau kina vei iko, mo vola vei au.

19Oi au ko Paula, au sa vola e na ligaqu dina: Au na sauma. Ia ka'u sa sega ni kaya vei iko ni sa dodonu ga mo noqu talega ko iko.

20Io, noqu i tokani, me'u rekitaki iko mada e na Turaga! Vakaceguya na lomaqu e na vuku i Karisito.

21Ni ka'u sa vakadinata ko na talairawarawa, ka'u sa vola kina vei iko, ni'u sa kila ko na kitaka na ka ka'u sa kaya, ka uasivi cake kina.

22Mo vakarautaka talega e dua na vale me'u moce kina, ni'u sa nuitaka ni'u na soli lesu vei kemudou e na vuku ni nomudou masu.

Tini ena Loloma

23 Kolo 1.7; 4.12 Eratou sa loloma yani vei iko ko Epafira, keirau sa vesu vata kaya e na vuku i Karisito Jisu,

24Caka 12.12,25; 13.13; 15.37-39; 19.29; 27.2; Kolo 4.10,11kei iratou talega na noqu i tokani, ko Marika, ko Arisitako, ko Timasa, kei Luke.

25Me tiko kei na yalomudou na loloma ni noda Turaga ko Jisu Karisito. Emeni.