Josua 9 - Ai Vola Tabu (Vakadewa Makawa Vakavoutaki 2021)（FRV21）

Era Lawakitaki Josua na Kai Kipioni

1Ia ni ra sa rogoca ko ira kecega na tui sa tiko e na tai oqo ni Joritani e na vanua veiulunivanua, kei na buca, kei na baravi kece ni Wasa Levu sa donui Lepanoni—ko ira na Itaiti, kei ira na Amoraiti, ko ira na kai Kenani, ko ira na Perisaiti, ko ira na Aivaiti, kei ira na Jepusaiti—

2era sa qai soqoni vata, ka ra sa yalovata me ra veivala kei Josua kei ira na Isireli.

3Ia ko ira na kai Kipioni, ni ra sa rogoca na ka sa kitaka ko Josua ki Jeriko kei Ai,

4era sa qai ia vaqaseqase, ka sa lako eso me vaka eratou sa tamata talai, ka vakavodoka na taga madra eso ki na nodratou asa, eso talega na tavaya kuli-ni-manumanu ni waini sa madra, ka kadresu, ka vauci;

5a sa vakaivava e nai vava sa madra ka botani, a ra sa vakaisulu e nai sulu madra; ia sa kaukauwa ka vukovukoa na madrai kece sa kedratou i vaqa.

6A ratou sa lako kivei Josua ki nai tikotiko mai Kilikali, a ratou sa kaya vua kei ira talega na Isireli, “Keitou sa lako mai na vanua vakayawa; ia oqo dou ia na veiyalayalati kei keitou.”

7Lako 23.32; 34.12; Vrua 7.2A ra sa kaya na Isireli vei iratou na Aivaiti, “De dou sa bula tiko e na keitou maliwa; ia keitou na ia rawa vakaevei na veiyalayalati kei kemudou?”

8A ratou kaya vei Josua, “Keitou sa nomu tamata.” A sa kaya ko Josua, “O cei koi kemudou? Ka dou sa lako mai vei?”

9A ratou kaya vua, “Koi keitou na nomu tamata keitou sa lako mai na vanua vakayawa sara, e na vuku ni yaca i Jiova na nomu Kalou; ni keitou sa rogoca na kenai rogorogo, kei na ka kecega sa cakava ko koya mai Ijipita,

10Tiko 21.21-35kei na ka kecega sa cakava ko koya vei rau na nodra tui na Amoraiti, vei Sioni na tui Esiponi kei Oki na tui Pasani, ka tiko mai Aseteroci, koi rau ka tiko mai tai kadua ni Joritani.

11A ra kaya vei keitou ko ira na neitou qase, kei na lewe ni neitou vanua kecega, ‘Dou kauta e na ligamudou nai vaqa me kemudou e gaunisala, ka la'ki veitavaki kei ira, ka kaya vei ira, “Koi keitou sa nomudou tamata; dou ia na veiyalayalati kei keitou.” ’

12Na keitou madrai oqo keitou a kauta katakata mai na neitou veivale me neitou i vaqa, e na siga keitou a cavu tu kina me lako mai vei kemudou, ia oqo, raica, sa kaukauwa ka vukovukoa.

13Ia oqo na tavaya kuli-ni-manumanu ni waini keitou a vakasinaita, ni ra sa vou; ka raica, era sa kacabote; ia na neitou i sulu oqo kei na neitou i vava, sa madra mai ni sa yawa sara na sala.”

14Era sa qai taura na tamata na kedratou eso, ka sega mada ni taroga oqo vei Jiova.

15A sa ia ko Josua na tiko veisaututaki kei na veiyalayalati kei iratou, me ra bula; ka sa bubului vei iratou ko ira na nodra turaga nai soqosoqo.

16Ia ni sa oti e bogi tolu na kena qaravi na veiyalayalati kei iratou, era sa qai rogoca ni ra sa tiko veivolekati, ka bula voli ga e na kedra maliwa.

17A ra sa cavu tu ko ira na Isireli, ka yaco ki na nodra veikoro e na bogi tolu. Ia na nodra veikoro ko Kipioni, kei Kifira, kei Pieroci, kei Kiriaci-jiarimi.

18Ia era sa sega ga ni mokuti ira ko ira na Isireli, ni ra bubului oti vei ira ko ira na nodra turaga nai soqosoqo, e na yaca i Jiova na Kalou ni Isireli. A ra sa qai vosa kudrukudrutaki ira na turaga veiliutaki ko ira nai soqosoqo taucoko.

19Ia era sa kaya na turaga kece vei ira nai soqosoqo taucoko, “Keitou sa bubului vei ira e na yaca i Jiova na Kalou ni Isireli, ia oqo, sa tabu ni da tarai ira.

20Oqo ga na ka eda na kitaka vei ira; eda na vakabulai ira ga, de sa da na cudruvi, e na vuku ni bubului keitou a bubului kina vei ira.”

21A ra sa kaya vei ira ko ira na turaga, “Me ra bula ga.” Era sa qai yaco me ra dauta buka ka dautaki wai vei ira nai soqosoqo taucoko, me vaka na ka era sa vakatura vei ira ko ira na turaga.

22A sa kacivi iratou ko Josua, ka vosa vei iratou, ka kaya, “A cava dou lawakitaki keitou kina, ni dou sa kaya, ‘Keimami sa tiko vakayawa sara vei kemudou’, ia dou sa bula tikoga e na keitou maliwa?

23Dou sa qai cudruvi oqo, ka eso vei kemudou e na cakacaka tikoga vakabobula, me ra dauta buka ka dautaki wai ki na vale ni noqu Kalou.”

24A ratou sa vosa vei Josua, ka kaya, “Sa tukuni vakaidina vei keimami na nomu tamata na ka sa vakarota ko Jiova na nomu Kalou vei Mosese na nona tamata, me solia vei kemudou na vanua taucoko, ka me vakamatea kecega na lewe-ni-vanua e na matamudou—ka keimami a qai rere vakalevu kina e na vukumudou de keimami mate, ka keimami a kitaka kina na ka oqo.

25Ia oqo, raica, keimami sa tiko e na ligamu. Mo kitaka ga vei keimami na ka sa vinaka ka dodonu e matamu.”

26A sa kitaka vakakina vei ira ko koya, ka vakabulai ira mai na ligadra na Isireli, me ra kakua ni vakamatei ira.

27Ia sa vakayacori ira ko Josua e na siga ko ya me ra dauta buka ka dautaki wai vei ira nai soqosoqo, ki nai cabocabo-ni-soro talega i Jiova, e na tikina sa digitaka ko koya ka yacova na siga edaidai.