Isikeli 27 - Ai Vola Tabu (Vakadewa Makawa Vakavoutaki 2021)（FRV21）

A Lele me Baleti Taia

1A sa yaco vei au na vosa i Jiova, ka vaka:

2“Ia ko iko, na luve ni tamata, mo taurivaka na lele e na vuku i Taia,

3ka kaya vei Taia, ko koya ka toka mai na toba, ka nodra koro dauveivoli na tamata mai na veiyanuyanu e vuqa, sa kaya vakaoqo na Turaga ko Jiova:

“Ko iko Taia, ko sa kaya,

‘Sa ka taucoko sara na kequ totoka.’

4Sa tu mai na loma ni wasawasa na nomu i yalayala;

ko ira na nomu matai ni tara vale era sa vakataucokotaka na kemu totoka.

5Era sa vakarautaka na kau kece sara

e na damanu ni Siniri;

era sa taura na sitari ni Lepanoni

me caka kina na nomu i vana.

6Na oki ni Pasani

era sa taya kina na nomu i voce;

a nomu i tikotiko era sa cakava e na paini

sa kau mai na veiyanuyanu ko Kitimi,

ka sa bonati e na ivori.

7A lineni matailalai ni Ijipita ka veivolavolai

sa vakarewataki me nomu laca,

ka sa nomu drotini;

nai sulu karakarawa ka lokaloka mai na veibaravi kei Ilaisa

sa nomu i vakaruru.

8O ira na kai Saitoni kei na kai Arivati

sa ra nomu lewe ni waqa;

ko ira na nomu tamata matai, i Taia, era sa tiko vei iko;

era sa nomu kaimua ni waqa.

9O ira na qase ni Kipali kei ira na kena tamata vuku

sa ra tiko vei iko me ra nomu dausaubulu;

na waqa kecega ni wasawasa kei ira na lewe ni waqa

sa ra tiko vei iko me ra oga e na nomu i yau

ni ra dauveivoli kei iko.

10“O ira na kai Perisia kei na kai Luti kei na kai Futi

era sa tiko me ra nomu bati,

ka me ra nomu tamata ni valu;

nai sasabai kei nai vakaruru-ni-ulu era sa rubeca e tikimu,

era sa vakaraitaka na kemui ukuuku.

11O ira na kai Arivati kei na nomu bai

era sa tu e dela ni nomu bai e na veiyasana,

kei ira na tamata qaqa era sa tiko e na nomu veivale cecere.

Na nodra i sasabai era rubeca e na kena lalaga e na veitikina;

era sa cakava na nomu lagilagi me vakataucokotaki.

12“O Tasisi, sa dauveivoli kei iko e na vuku ni kena levu ni yau kecega; na siliva, na kaukamea, na tini, kei na uma, era sa veivolitaka e na nomu rara ni veivoli.

13O Javana, kei Tupali, kei Meseki, era dauveivoli kei iko; na tamata kei nai yaya parasa era sa veivolitaka e na nomu rara ni veivoli.

14Mai Peci-tokama era sa veivolitaka na ose, kei na ose ni valu, kei na meule, e na nomu rara ni veivoli.

15O ira na kai Titana, era dauveivoli kei iko; na lewe ni yanuyanu e vuqa, era dauvolia na ka ko sa rawata; nai leu ivori kei na eponi era kauta vei iko me kenai voli.

16Ko Siria, sa dauveivoli kei iko ni sa ka levu nai yaya ko sa cakava; na emeralita, kei nai sulu lokaloka, kei nai sulu veivolavolai, kei na lineni matailalai, kei na lase damudamu kei na rupi, era veivolitaka e na nomu rara ni veivoli.

17Ko Juta, kei na vanua ko Isireli, era dauveivoli kei iko; na witi ni Minici, kei na mileti, kei na oni, kei na waiwai, kei nai lumu wainimate era sa volitaka e na nomu rara ni veivoli.

18Ko Tamasiko sa dauveivoli kei iko e nai yaya levu ko sa cakava—e na vuku ni levu ni nomu veimataqali i yau—na waini ni Eliponi, kei na vutika ni sipi vulavula.

19Ko Tani talega kei Javana erau dauveivoli e na nomu rara ni veivoli—na kaukamea makamakalivata, kei na kasia, kei na kalamosi, sa tu e na nomu rara ni veivoli.

20Ko Titana sa dauveivoli kei iko e na ka me tevuki e nai dabedabe ni ose me vodoki.

21Ko Arapea kei na turaga kecega ni Kitari era sa dauveivolitaka kei iko na lami, kei na sipi tagane, kei na me; ena ka oqo era dauveivoli kei iko.

22Ko ira na dauveivoli mai Sipa kei Reama, era sa dauveivoli kei iko; na vuanikau kecega e boi vinaka sara, kei na vatu talei kecega, kei na koula, era sa volitaka e na nomu rara ni veivoli.

23Ko Karana, kei Kane, kei Iteni, kei ira na dauveivoli mai Sipa, kei Asuri, kei Kilimati, era dauveivoli kei iko.

24O ira oqo era sa dauveivoli kei iko e nai yaya kecega, e nai tutuvi karakarawa, kei nai sulu veivolavolai, kei na kato i sulu talei, sa vau e na dali, ka caka e na sitari, kei na ka eso ko sa dauveivolitaka.

25Vtaki 18.11-19A waqa ni Tasisi, sa dau usa i yau e na vukumu ki na nomu rara ni veivoli.

Ia ko sa vakavutuniyautaki,

ka sa rogo sara e loma ni wasawasa.

26“Era sa kauti iko ki na dua na wasa levu

ko ira na nomu dauvoce.

Ko sa kasere e na cagi na tokalau

e loma ni wasawasa.

27A nomu i yau, kei na nomu rara ni veivoli, na nomu ka ni veivoli,

na nomu lewe ni waqa, kei na nomu turaga ni waqa,

na nomu dausaubulu, kei ira era oga e na nomu i yau e dauveivolitaki,

kei ira kecega na nomu tamata i valu, ka tiko vata kei iko,

kei ira kecega na nomu era tiko e na kemu maliwa,

era na lutu dromu e loma ni wasawasa

e na siga ko sa rusa kina.

28Ena yavala na biau

ni sa rogo na nodra tagi na nomu turaga ni waqa,

29ka ra na sobu mai na nodra waqa

ko ira kece era dauvoce.

O ira na lewe ni waqa kei ira kece era turaga ni waqa

era na duri tu e vanua

30ka ra na tabalaka na domodra e na vukumu,

ka tagi vakalevu.

Era kaburaka na kuvu-ni-soso ki uludra,

ka ra na qiqi voli tiko e na dravusa;

31ka ra na tasia sara na uludra e na vukumu,

ka vauci ira e nai sulu taga,

ka ra na tagicaki iko ni sa rarawa na lomadra,

ka ra na qoqolou e na rarawa.

32Ka ni ra ia na tagi yaso, era na lelevaki iko

e na dua na lele:

‘Na koro cava me rau vakatauvatani kei Taia,

sa vagalui vakaoqo mai na loma ni wasawasa?

33Ni sa yau ki vanua na nomu kamunaga mai na veiwasawasa,

ko a vakasaututaki ira kina na veimataqali e vuqa;

ko a vakavutuniyautaki ira na tui kei vuravura

e na kena levu ni nomu i yau

kei na nomu i yaya e dauvolitaki

34E na siga ko a kasere kina

e na ua e na wai titobu,

sa qai rusa vata na nomu i yau e dauveivolitaki

kei ira na nomu e na kemu maliwa.

35O ira kece na lewe ni veiyanuyanu

era sa kidacalataki iko,

o ira talega na nodra tui era sa rere vakalevu sara,

era sa vakaveveku mata.

36O ira na dauveivoli e na veimataqali era na vakasiusiutaki iko;

ia ko sa yaco mo ka rerevaki,

ia ko na qai yali sara.’ ”