Isikeli 29 - Ai Vola Tabu (Vakadewa Makawa Vakavoutaki 2021)（FRV21）

Sa Cudruvi ko Ijipita

1 Aisea 19.1-25; Jere 46.2-26 E nai katini ni yabaki, e nai katini ni vula, e nai katinikarua ni siga ni vula sa yaco vei au na vosa i Jiova, ka vaka:

2“Ko iko na luve ni tamata, mo vaqara na matamu vei Fero na tui Ijipita, ka parofisaitaka na ka ena yaco vua, kei na ka ena yaco ki Ijipita taucoko;

3mo kaya mada, Sa kaya vakaoqo na Turaga ko Jiova:

“Raica, koi au na nomu meca,

ko iko Fero na tui Ijipita,

na gata levu

sa koto e na maliwa ni nona uciwai,

o koya ka kaya, ‘Na noqu uciwai sa noqu ga;

ni ka'u sa cakava ga me noqu.’

4Ia ka'u na vakacoba na siwa ki na gusumu,

ka vakabita na ika e na nomu uciwai ki na varimu,

ka'u na yarataki iko cake mai na loma ni nomu uciwai,

ia na ika kecega e na nomu uciwai ena kabita na varimu.

5Au na biuti iko laivi talega ki na vanua lala,

ko iko kei na ika kecega e na nomu uciwai;

ko na lutu ki na dela ni vanua,

ka dou na sega ni vakasoqoni se kumuni vata;

ka'u sa soli kemudou kina me kedra

na manumanu ni vanua kei na manumanu vuka.

6 Aisea 36.6 Era na qai kila na kai Ijipita kecega

ni sai au ko Jiova

me vaka ni ko sa i titoko gasau

ki na vale i Isireli;

7ni gauna era tauri iko kina e na ligamu, ko sa qai ramusu,

ka sa vakamavoataki kina na tabadra kece sara;

ka gauna era raviti iko kina, ko sa qai ramusu,

ka vakavuna me sega ni tudei kina na tolodra kece sara.

8O koya oqo sa kaya kina na Turaga ko Jiova: Raica, au na vakayacora vei iko nai seleiwau, ka muduka tani vei iko na tamata kei na manumanu;

9ia na vanua ko Ijipita, ena lala ka tawa yaga. Ka ra na kila ni sai au ko Jiova.

“E na vuku ni nomu kaya vakaoqo, ‘Sa noqu na uciwai, ka'u sa cakava koi au’,

10o koya oqo, ka'u sa veimecaki kina kei iko kei na nomu uciwai, ka'u na vakalalataka sara na vanua ko Ijipita me tawa yaga tu ga, mai Mikitoli ka yala ki Saiini ka yala ki Eciopea.

11Ena sega ni lako voli kina e dua na yava ni tamata, se dua na yava ni manumanu, ena sega talega ni tawa ka yabaki vasagavulu.

12Ia ka'u na vakalalataka na vanua ko Ijipita me lala sara tu e na maliwa ni veivanua lala, a nona veikoro talega ena lala tu ga e na maliwa ni veikoro rusa ka yabaki vasagavulu. Ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua.

13“Ia ka sa kaya vakaoqo na Turaga ko Jiova: Ni sa oti e vasagavulu na yabaki, ka'u na qai vakasoqoni ira na kai Ijipita mai vei ira na lewe ni veivanua era dui vakasevi kina;

14ia ka'u na kauti ira tale mai na kai Ijipita era a vakabobulataki, ka vakalesui ira ki na vanua ko Pacirosi, ki na vanua era a sucu kina; ka ra na matanitu lolovira mai kea.

15Ena matanitu lolovira duadua vei ira na veimatanitu; ena sega talega ni vakalevulevui koya tale ki na veimatanitu; ni'u na vakalailaitaki ira, me ra kakua ni nodra turaga tale na veimatanitu.

16Ia ena sega tale ni nodra tikina na vale i Isireli me ra vakararavi kina; era na vakananuma ga kina na nodra caka cala, ni ra golevi ira e na kere veivuke. Ia era na kila ni sai au na Turaga ko Jiova.”

E na Vakamalumalumutaki Ijipita ko Papiloni

17Ia e nai karuasagavulu ka vitu ni yabaki, e nai matai ni vula, e nai matai ni siga ni vula, sa qai yaco vei au na vosa i Jiova, ka vaka:

18“Ko iko na luve ni tamata, Ko Nepukanesa na tui Papiloni ka lavaka vei ira na nona mataivalu e dua na cakacaka levu me ca kina ko Taia. Era sa ulu cou kece, ka drakulu kece na tabadra, ia ka sa sega na kenai sau vua, se vei ira na nona mataivalu, mai Taia, e na vuku ni cakacaka sa cakava kina ko koya.

19O koya oqo sa kaya kina na Turaga ko Jiova: Raica, au na solia vei Nepukanesa na tui Papiloni na vanua ko Ijipita me kenai sau; ia ena kauta ko koya na kena lewe vuqa, ka tokitaka na kenai toki-ni-valu, ka kovea na kenai yau; ia oqori sa na kedrai sau na nona mataivalu.

20Ka'u sa solia vua na vanua ko Ijipita me kenai sau ni cakacaka sa cakava ko koya, e na vukuqu, sa kaya na Turaga ko Jiova.

21“E na siga ko ya ka'u na cakava me kubu na kaukamea ni vale i Isireli, ia ka'u na solia vei iko mo vosa doudou e na kedra maliwa; ka ra na kila ni sai au ko Jiova.”