1A ra sa didi na tamata, a sa cata ko Jiova. A sa rogoca ko Jiova ka sa waqa mai na nona cudru; a sa kana mate e na kedra maliwa na bukawaqa i Jiova, a sa kani ira eso e nai yalayala ni tikotiko.
2A ra sa tagi vei Mosese na tamata; a sa vakamamasu vei Jiova ko Mosese, a sa boko na bukawaqa.
3A sa vakatokai na yaca ni yasana ko ya ko Tapera, ni sa kana mate na bukawaqa i Jiova e na kedra maliwa.
Digitaka ko Mosese e Vitusagavulu na Qase4Era sa qai garova vakalevu na lewe ni manumanu ko ira na duikaikai era sa tiko vata kei ira. A ra sa tagi tale ko ira talega na Isireli, ka kaya, “Ko cei ena vakani keda e na lewe ni manumanu?
5Eda sa nanuma tiko na ika eda a kania vakailoa mai Ijipita; na kiukaba, kei na meleni, kei na liki, kei na varasa, kei na qaliki;
6ia oqo, sa mamaca mai na lomada; sa sega tale na ka me da kania, na mana walega oqo.”
7 Lako 16.31 Ia na mana sa vaka na sore ni koriada, kei na rokana sa vaka na roka ni mataniciva.
8Lako 16.13-15Era a lako voli na tamata ka tomitomika, ka qaqia e nai qaqi, se lauvutu e na sedre, ka vavia e na bilo, ka bulia me keke. Ia ni sa tovolei, sa vaka na kakana sa caka vata kei na waiwai.
9Ia ni sa lutu ki nai tikotiko na tegu e na bogi, sa qai qeqera mai na mana.
10A sa rogoca na nodra tagi na tamata ko Mosese e na nodra veimataqali, a tamata yadua mai na katuba ni nona valelaca. A sa waqa vakalevu na cudru i Jiova, a sa cata talega ko Mosese.
11A sa kaya vei Jiova ko Mosese, “A cava ko ni sa vakararawataki au kina na nomuni tamata? Ia ka cava ko ni sa sega ni lomani au kina, kemuni sa tauca kina vei au na kedrai colacola bibi na tamata kecega oqo?
12Au sa kunekunetaka beka na tamata kecega oqo? Se'u sa vakatuburi ira, mo ni kaya kina vei au, Mo keveti ira voli e na lomaseremu, me vaka sa keveta na luvena sa sucu tiko e dua na tamata, ki na vanua ko a bubului kina kivei ira na nodra qase?
13Au na rawata mai vei na lewe ni manumanu, me'u solia vei ira kecega na tamata oqo? Ni ra sa tagi mai vei au, ka kaya, ‘Mo solia vei keimami na lewe ni manumanu me keimami kania.’
14Au sa sega ni rawata me'u kauti ira kecega na tamata oqo vakataki au ga, sa rui bibi vei au.
15Ia kevaka ko ni sa cakacaka vakaoqo vei au, mo ni vakamatei au sara mada—kevaka ko ni sa lomani au—me'u kakua kina ni raica na noqu vakaloloma.”
Na Qase ni Isireli era Lewe Vitusagavulu16A sa kaya vei Mosese ko Jiova, “Mo soqona vata vei au e lewe vitusagavulu mai vei ira na qase ni Isireli, o ira ko sa kila era sa qase vei ira na tamata, ka turaga vei ira; ka kauti ira ki na vale ni veitavaki, me ra tu vata kina kei iko.
17Ia ka'u na lako sobu ka vosa vei iko mai kea. Ia na Yalo sa tiko vei iko ka'u na solia vakakina vei ira, ia era na colata vata kei iko na kedrai colacola bibi na tamata, mo kakua kina ni colata vakataki iko ga.
18Ia mo kaya vei ira na tamata: Dou vakasavasavataki kemudou ka waraka na mataka, dou na qai kana lewe ni manumanu; ni dou a tagi e na daliga i Jiova, ka kaya, ‘Ko cei me vakani keda e na lewe ni manumanu? Ni sa vinaka cake na noda tiko mai Ijipita!’ O koya oqo ena qai vakani kemudou ko Jiova e na lewe ni manumanu, ia dou na kania.
19Dou na sega ni kania bogi dua walega, se bogi rua, se bogi lima, se bogi tini, se bogi ruasagavulu,
20ia e na loma ni vula taucoko—me yacova ni sa lako tani mai na ucumudou, ka sa velavela vei kemudou—baleta ni dou sa besetaki Jiova, ko koya sa tiko vata kei kemudou, a sa tagi e matana, ka kaya, ‘A cava li eda sa lako tani kina mai Ijipita?’ ”
21Ia sa kaya ko Mosese, “O ira na tamata ka'u sa tiko kaya, era sa oba vakaonosagavulu (600,000) era sa taubale; ia kemuni sa kaya, ‘Au na solia vei ira na lewe ni manumanu, me ra kana tiko kina ka dua na vula taucoko’!
22Me na vakamatei beka na qele ni sipi kei na bulumakau me kedra, me rauti ira? Se na kumuni vata beka na ika kece mai na wasawasa me kedra, me rauti ira?”
23A sa kaya vei Mosese ko Jiova, “Sa lekaleka beka mai na liga i Jiova? Ko na raica e na gauna oqo se na yaco dina vei iko na noqu vosa, se segai.”
24A sa lako yani ko Mosese, ka tukuna vei ira na tamata na vosa i Jiova, a sa vakasoqoni ira vata e le vitusagavulu mai vei ira na qase ni tamata, ka sa vakatikori ira me ra volita na Vale tabu.
25A sa lako sobu ko Jiova e na o, a sa vosa vua, ia na Yalo sa tiko vua, sa solia vakakina vei ira na qase e lewe vitusagavulu. Ia ni sa toka ga vei ira na Yalo, era sa parofisai, ia era sa sega ni vakaruataka.
26A sa tiko ga e nai tikotiko e le rua vei ira na qase sa volai; a yacana e dua ko Elitati, a yacana nai karua ko Metati, ka rau a sega ni lako yani ki na Vale tabu; ia sa lutu vei rau na Yalo ka rau sa parofisai e loma ni tikotiko.
27A sa cici yani e dua na cauravou, ka tukuna vei Mosese, ka kaya, “O Elitati kei Metati, erau sa parofisai tiko e loma ni tikotiko.”
28A sa kaya ko Josua na luve i Nuni, o koya sa dauqaravi Mosese, e dua vei ira na nona cauravou, “I Mosese, noqu turaga, mo tarovi rau.”
29A sa kaya vua ko Mosese, “Ko sa vuvu e na vukuqu, ne? E vinaka mada ke ra sa parofita na tamata kecega i Jiova, ka solia vei ira na Yalona ko Jiova.”
30A sa lako ki loma ni tikotiko ko Mosese, kei ira vata kaya na qase ni Isireli.
Na Toa Kila (Kueli)31A sa lako mai vei Jiova e dua na cagi, ka cagina eso na toa kila mai na wasawasa, ka vakalutuma me volita nai tikotiko; ia na kena yawa na vanua era sa kune kina sa rauta na lako e na dua na siga taucoko, ia na kena cecere mai na qele sa rua na kiupiti.
32A ra sa ia tiko na tamata e na siga taucoko ko ya ka bogivaka, kei na siga taucoko ka tarava, ni ra sa kumuna vata na toa kila. O koya sa gadreva vakalailai sara sa kumuna e tini na omeri; ka ra talaucaka me kedra e na veiyasana ka volita nai tikotiko.
33Ni ra se kania tiko na lewe ni manumanu, ka se bera ni tiloma, sa waqa mai na cudru i Jiova vei ira na tamata, a sa vakayacora vei ira na tamata ko Jiova e dua na mate levu sara.
34A sa vakatokai na yaca ni tikina ko ya ko Kipiroci-ateva, ni ra a buluti ira kina na tamata era kusikusima.
35Era sa toki na tamata mai Kipiroci-ateva, ka lako ki Eseroci; a ra sa tiko mai Eseroci.
Who We AreWhat We EelieveWhat We Do
2025 by iamachristian.org,Inc All rights reserved.
