2 Samuela 12 - Ai Vola Tabu (Vakadewa Makawa Vakavoutaki 2021)（FRV21）

Sa Vunauci Tevita ko Necani na Parofita

1 Same 51 A sa talai Necani vei Tevita ko Jiova. A sa lako vua ko koya, ka kaya vua, “Sa tiko e na dua na koro e lewe rua na tamata, e dua sa vutuniyau, ka dua sa dravudravua.

2Na tamata vutuniyau sa levu sara na nona qele ni sipi kei na nona qele ni bulumakau;

3ia sa sega vua na tamata dravudravua e dua na ka, e dua walega na lami yalewa lailai ka volia ko koya, ka dauvakania. A sa tubu cake kaya kei iratou talega na luvena. Sa kania eso na tiki ni kena, ka sa gunu mai na mena bilo, ka sa koto e lomaserena, ka sa vaka e dua na luvena yalewa ki vua.

4A sa lako vua na tamata vutuniyau e dua na tamata sa lako tu, ia sa sega ni taura ko koya e dua na nona sipi se na nona bulumakau me vakarautaka vua sa taubale voli ka sa lako mai vua, ia sa qai taura ga na nona lami na tamata dravudravua, ka vakarautaka me kena na tamata sa lako mai vua.”

5A sa waqa vakalevu mai na cudru i Tevita vua na tamata. A sa kaya vei Necani, “Me vaka sa bula ko Jiova, sa dodonu me mate na tamata sa cakava na ka oqo,

6ka me na sauma vakava na lami, ni sa cakava na ka oqo, ka ni sa sega vua na loloma.”

7A sa kaya vei Tevita ko Necani, “Sai kemuni ga na tamata ko ya! Sa vosa vakaoqo ko Jiova na nodra Kalou na Isireli, ‘Ka'u a lumuti iko mo nodra tui na Isireli, ia ka'u a vakabulai iko mai na liga i Saula.

8Au a solia talega vei iko na nona vale na nomu turaga, kei iratou na watina na nomu turaga ki na lomaseremu, au a solia talega vei iko na nodra vale na Isireli kei ira na Juta; ia kevaka sa lailai ko ya, ka'u na qai vakaikuritaka vakalevu vei iko.

9A cava ko sa beca kina na vosa i Jiova, mo cakava na ka ca e matana? Ko a vakamatei Uraia na Itaiti e nai seleiwau, ka kauta na watina me watimu, ka vakamatei koya e na nodra i seleiwau na luve i Amoni.

10Ia oqo, ena sega kina ni yali mai na nomu vale nai seleiwau, ka sega ni mudu; ni ko sa beci au, ka kauta na wati Uraia na Itaiti me watimu.’

112Samu 16.22Sa vosa vakaoqo ko Jiova, ‘Raica, ka'u na vakatubura vei iko na ca mai na nomu vale. Ia ka'u na kauti iratou na watimu e matamu, ka solia vua na wekamu, ia ena moce vata kei iratou na watimu ko koya e na mata-ni-siga oqo.

12Ko a cakava vakavuni ko iko ia ka'u na cakava na ka oqo e matadra kecega na Isireli, kei na mata-ni-siga.’ ”

13A sa kaya vei Necani ko Tevita, “Au sa cala vei Jiova.” A sa kaya vei Tevita ko Necani, “Sa kauta tani na nomuni valavala ca ko Jiova; ko ni na sega ni mate.

14Ia ni kemuni sa vakavuna me ra vosavakacaca ko ira na meca i Jiova e na vuku ni ka oqo, sa na mate vakaidina talega na luvemuni sa sucu.”

15A sa qai lako yani ko Necani ki na nona vale.

Sa Mate na Gone e Vakasucuma ko Pacisepa

A sa vakavuna ko Jiova me tauvi mate na luve i Tevita ka vakasucuma na wati Uraia, ka sa malumalumu sara.

16A sa vakamasuta na Kalou ko Tevita e na vuku ni gone. A sa lolo ko Tevita, ka curu yani ka davo koto ga e na buturara e na veibogi.

17A sa ia ko iratou na qase ni nona vale ka la'ki tu e yasana me ra vakaduria cake mai na qele, ia sa bese ko koya, ka sega ni kana vata kei ira.

18E nai kavitu ni siga, a sa ciba na gone. Ka ratou sa rere ni tukuna vei Tevita ko ira na nona tamata ni sa mate na gone, ni ratou sa kaya, “Raica, ni se bula tiko na gone, edatou a vosa vua, ka sega ni vakarogoca na nodatou vosa ko koya. Ena vakaevei na nona rarawa ni datou sa tukuna vua ni sa mate na gone?”

19Ia ni sa raica ko Tevita ni ratou sa vakasolokakana tiko ko iratou na nona tamata, sa kila kina ko Tevita ni sa mate na gone. Ka sa taroga vei iratou na nona tamata ko Tevita, “Sa mate na gone, ne?” A ratou sa kaya, “Sa mate ko koya.”

20Sa qai tucake mai na qele ko Tevita, ka sili, ka lumu, ka veisautaka na nonai sulu. A sa qai la'ki curu ki na vale i Jiova, ka lotu. Sa qai lako ki na nona vale. Ia ni sa taroga me kana, sa kau mai vua na kakana, ka sa kana ko koya.

21Eratou sa qai taroga vua ko iratou na nona tamata, “A cava na ka oqo ko ni sa cakava? Ni se bula tiko na gone, ko ni a lolo ka tagi e na vukuna; ia ni sa qai mate na gone, ko ni a tucake ka kana.”

22A sa kaya ko koya, “Ni se bula tiko na gone, ka'u a lolo ka tagi, ni'u a kaya, ‘O cei e kila se na lomani au ko Jiova, se segai, me bula na gone?’

23Ia sa qai mate oqo ko koya. Me'u qai lolo e na vuku ni cava? Au sa rawa li ni kauti koya tale mai? Au na lako ga vua, ia ko koya ena sega ni lesu tale mai vei au.”

Sa Sucu ko Solomoni

24A sa vakacegui Pacisepa na watina ko Tevita, ka lako yani vua ka moce kaya, ka sa vakasucuma ko koya e dua na gonetagane, ka sa vakayacani koya ko Solomoni. A sa lomani koya ko Jiova,

25ka sa talai Necani na parofita ko koya; ka vakatokai kina na yacana ko Jititia, e na vuku i Jiova.

Kabai ka Rawai na Koro ko Rapa(1 Veigauna 20.1-3)

26Ia sa vala tiko ko Joape kei Rapa, ka nodra na luve i Amoni, a sa rawa na koro turaga ko ya.

27A sa tala eso na tamata vei Tevita ko Joape, ka kaya, “Au sa kabai Rapa, ka rawa na koro ni veiwai.

28Ia mo ni vakasoqoni ira vata na tamata sa vo, ka me buku na druadrua ni koro, ka rawa; de'u sa rawa na koro koi au, ka me vakatokai e na yacaqu.”

29A sa vakasoqoni ira vata na tamata kecega ko Tevita, ka lako ki Rapa, ka ia kina nai valu, ka rawa.

30Sa luvata na nona i sala vakaturaga mai vua na nodra tui, a kena bibi e dua na taledi koula, ka tu kina na veivatu talei eso; a sa vakaisalataki kina ko Tevita. A sa kauta yani nai toki-ni-valu mai na koro, e dua na ka levu sara.

31A sa kauti ira yani na tamata sa tiko kina, ka cudruvi ira e nai varo, kei nai kadrukadru kaukamea ni were, kei na matau kaukamea, ka lesi ira ki na cakacaka ni vatu-buli. A sa cakava vakakina ki na nodra koro kecega na luve i Amoni. A sa lesu tale ki Jerusalemi ko Tevita kei ira kecega na tamata.