Tiko mai na Lekutu 22 - Ai Vola Tabu (Vakadewa Makawa Vakavoutaki 2021)（FRV21）

Sa Talaki ko Pelaki kivei Pelami

1A sa toki ko ira na Isireli, ka la'ki tiko mai na vanua veibuca mai Moapi, e na tai kadua ni Joritani sa donui Jeriko.

2Ia ko Pelaki na luve i Sipori, sa kunea na ka kecega era a kitaka na Isireli vei ira na Amoraiti.

3A ra sa rere vakalevu ko ira mai Moapi e na vukudra na tamata, ni ra sa lewe vuqa. A sa taqaya ko ira mai Moapi e na vukudra na Isireli.

4A ra sa kaya ko ira mai Moapi vei ira na qase ni Mitiani, “Nai vavakoso oqo ena kania na ka kecega sa voliti keda, me vaka sa kania na co ni vanua na bulumakau.” Ia ko Pelaki, na luve i Sipori, sa tui Moapi e na gauna ko ya.

5Tiko 31.8; 2Pita 2.15,16; Juta 1.11A sa tala ko koya eso nai talaki vei Pelami na luve i Piori ki Picori, o koya sa voleka ki na Uciwai, ki na nodra vanua na kai nona, me kacivi koya, ka kaya, “Raica, sa lako mai e dua na matanitu mai Ijipita. Raica, era sa ubia na dela ni vanua, a ra sa mai tiko donui au.

6Au kerei iko mo lako mada mai, mo mai vatonaka na matanitu oqo; ni ra sa rui kaukauwa vei au. De'u na gumatua, me daru yaviti ira, ia me'u vakasavi ira tani mai na vanua oqo, ni'u sa kila sa kalougata ko koya ko sa vosavakalougatataka, ka sa ca ko koya ko sa vatonaka me ca.”

7A ra sa lako na qase ni Moapi kei na qase ni Mitiani, ka kauta na kenai sau na daurairai; a ra sa lako vei Pelami, ka tukuna vua na vosa i Pelaki.

8A sa kaya vei ira ko koya, “Dou moce mada eke e na bogi oqo, ka'u na qai mai tukuna vei kemudou na vosa sa na kaya vei au ko Jiova.” A ra sa tiko kei Pelami ko ira na turaga ni Moapi.

9A sa lako mai vei Pelami na Kalou, ka kaya, “O cei na tamata oqo era tiko kei iko?”

10A sa kaya vua na Kalou ko Pelami, “O Pelaki na luve i Sipori, na tui Moapi, sa talaki vei au, ka kaya,

11‘Raica, na matanitu sa lako mai Ijipita, era ubia na dela ni vanua. Mo lako mai oqo, mo mai vatonaki ira. De'u qai gumatua kina vei ira e nai valu ka vakasavi ira tani.’ ”

12A sa kaya vei Pelami na Kalou, “Mo kakua ni lako vata kei ira; mo kakua ni vatonaki ira na tamata; ni ra sa kalougata ga.”

13A sa tu cake e na mataka ko Pelami, ka kaya vei ira na turaga mai vei Pelaki, “Dou lako yani ki na nomudou vanua, ni sa bese ni soli au ko Jiova me'u lako vata kei kemudou.”

14A ra sa cavu tu ko ira na turaga ni Moapi, ka lesu vei Pelaki, ka kaya, “Sa bese ni lako mai kei keitou ko Pelami.”

15A sa qai tala tale ko Pelaki e lewe vuqa na turaga, era dokai cake vei ira ka liu.

16A ra sa lako mai vei Pelami, ka kaya vua, “Sa vosa vakaoqo ko Pelaki na luve i Sipori, ‘Me kakua mada e dua na ka me tarova na nomu lako mai vei au;

17ni'u na vakalevulevui iko sara, ka kitaka na ka kecega ko na kaya vei au. Au kerei iko mo lako mada mai, mo vatonaka na matanitu oqo.’ ”

18Ia sa vosa ko Pelami ka kaya vei ira na tamata nei Pelaki, “Kevaka sa na solia vei au ko Pelaki na siliva kei na koula e sinai rawa kina na nona vale, au sa sega kina ni rawata me'u vakatanitaka me levu cake se me lailai sobu na vosa i Jiova na noqu Kalou.

19Ia oqo, au sa kerei kemudou kina mo dou moce mada eke e na bogi edaidai, me'u kila na ka ena kaya tale vei au ko Jiova.”

20A sa lako mai vei Pelami e na bogi ko ya na Kalou, ka sa kaya vua, “Kevaka era lako mai na tamata me kacivi iko, mo cavu tu, mo lako vata kei ira; ia na vosa ga ka'u na kaya vei iko, ko ya ga mo vakayacora.”

21A sa cavu tu e na mataka ko Pelami, ka vauca nai vodovodo ki na nona asa, ka lako yani kei ira na turaga ni Moapi.

Ko Pelami, kei na Asa kei na Agilosi

22A sa waqa mai na cudru ni Kalou ni sa lako ko koya, ka sa tu e na sala ko koya na agilosi i Jiova me vorati koya. Ia sa vodo lako e nona asa, ka rau lako vata kaya e le rua na nona cauravou.

23Ia sa raica na asa, ni sa tu e na sala na agilosi i Jiova, ka taura tu e ligana na nona i seleiwau. A sa vakatikitiki tani mai na sala na asa, ka lako ki na veiwere. A sa mokuta na asa ko Pelami, me vagolea ki na sala.

24A sa tu na agilosi i Jiova e na sala mai na veivaini, a sa dua na bai vatu vaka, ka dua na bai vatu vaka.

25Ia ni sa raica na agilosi i Jiova na asa, sa lako ravita na bai vatu, ka sa qaqia na yava i Pelami ki na bai vatu. A sa mokuta tale ko koya.

26A sa lako yani ki liu na agilosi i Jiova, ka tu e na yasana qiqo, ka sa sega na sala me lako rawa kina ki nai matau se nai mawi.

27Ia sa raica na agilosi i Jiova na asa, ka sa davo sobu e ruku i Pelami. A sa waqa mai na cudru i Pelami, ka sa mokuta na asa e nai titoko.

28A sa qai dolava na gusu ni asa ko Jiova, ka sa vosa kina na asa vei Pelami, ka kaya, “A cava ka'u sa cakava vei iko, ko sa mokuti au vakatolu kina?”

29A sa kaya vua na asa ko Pelami, “Ni ko sa vakalialiai au! Ke dua mada nai seleiwau e ligaqu, au na vakamatei iko!”

30Ia sa kaya vei Pelami na asa, “Au sa sega beka ni nomu asa koi au, ka ko sa dauvodoki au e na nomu bula taucoko ka yacova na siga oqo? Au a daukitaka beka vakaoqo vei iko?” A sa kaya ko koya, “E segai.”

31A sa qai vakamataraitaki Pelami ko Jiova, ka sa raica rawa ko koya ni sa tu e na sala na agilosi i Jiova, ka sa taura tu e ligana na nona i seleiwau. A sa cuva vakatoboicu.

32A sa kaya vua ko koya na agilosi i Jiova, “A cava ko sa mokuta vakatolu kina na nomu asa? Raica, ka'u a lako mai me'u tataro, ni sa lako vakatani na nomu i valavala vei au.

33A sa raici au na asa, ka gole tani kina vakatolu vei au. Kevaka e sega ni gole tani vei au, ke'u sa vakamatei iko oti vakaidina, ka vakabulai koya.”

34A sa qai kaya vua na agilosi i Jiova ko Pelami, “Au sai valavala ca, ni'u a sega ni kila ni kemuni a tu e na sala me tarovi au. Ia oqo, kevaka sa ca vei kemuni, ka'u na lesu tale.”

35A sa kaya vei Pelami na agilosi i Jiova, “Dou lako ga kei ira na tamata; ia na vosa ga ka'u na cavuta vei iko ko ya ga mo vosataka.” A sa lako ko Pelami kei ira na turaga mai vei Pelaki.

Sa Tavaki Pelami ko Pelaki

36Ia ni sa rogoca ko Pelaki sa lako tiko mai ko Pelami, sa lako yani ko koya me tavaki koya, ki na dua na koro ni Moapi, mai nai yalayala i Arinoni, ko ya na kenai yalayala sara.

37A sa kaya vei Pelami ko Pelaki, “Au a sega beka ni veitalaki yani mo kacivi mai? A cava ko a sega kina ni lako mai vei au? Sa sega beka ni dina ni'u sa via vakalevulevui iko?”

38A sa kaya vei Pelaki ko Pelami, “Raica, ka'u sa lako mai oqo kivei iko! Ka'u sa cavuta rawa li e dua na ka lailai? A vosa ga sa solia vei au na Kalou, ko ya ga ka'u na cavuta.”

39A sa lako vata kei Pelaki ko Pelami, ka rau sa yaco ki Kiriaci-usoci.

40A sa vakamatea na bulumakau kei na sipi ko Pelaki, ka sa vota na kedra ko Pelami kei ira na turaga era sa tiko kaya.

41Ia e na mataka, sa kauti Pelami ko Pelaki ki cake ki na vanua cecere nei Peali, ka sa raici ira mai kina e dua nai wase ni tamata.