Aisea 43 - Ai Vola Tabu (Vakadewa Makawa Vakavoutaki 2021)（FRV21）

Sa Yalataka na Kalou me Vakacegui Ira na Nona Tamata

1Ia oqo sa qai kaya ko Jiova,

ko koya ka vakatuburi iko, Jekope,

ka buli iko, Isireli:

Kakua ni ko rere, ni'u a voli iko;

au a kacivi iko e na yacamu, ko sa noqu.

2Ni ko sa lako e loma ni wai, ka'u na tiko kei iko;

kei na loma ni veiuciwai, ena sega ni luvuci iko;

ni ko sa lako e loma ni bukawaqa, ena sega ni kani iko,

ka na sega talega ni kati iko na yameyame ni buka.

3Ni sai au ko Jiova, na nomu Kalou,

na Yalosavasava ni Isireli, na nomu i Vakabula.

Ka'u a soli Ijipita me kemui voli,

kei Eciopea talega kei Sepa e na vukumu.

4Ni ko sa qai talei e mataqu,

ko sa dokai kina, ia ka'u a lomani iko;

ia ka'u na soli ira na tamata me kemui sere,

kei na veimatanitu mei voli ni nomu bula.

5Kakua ni ko rere, ni'u sa tiko vata kei iko;

au na kauti ira na nomu kawa mai na tokalau,

ka'u na vakasoqoni ira na kai nomu mai na ra talega;

6ka'u na kaya ki na vualiku, “Mo soli ira mai,”

ki na ceva talega, “Kakua ni ko bureitaki ira;

kauti ira mai na luvequ tagane mai na vanua yawa

kei ira na luvequ yalewa mai nai yalayala kei vuravura—

7ko ira yadua era sa vakayacani e na yacaqu,

ko ira ka'u a bulia me'u dauvakarokorokotaki kina,

ko ira ka'u a vakayacora ka vakatubura.”

Sa i Vakadinadina Bula i Jiova ko Isireli

8Dou kauti ira mai na tamata mataboko, ia era sa vakamatana,

kei ira na didivara, ia era sa vakadaligana!

9Me ra soqoni vata na veimatanitu kecega,

ia me ra vakasoqoni mai na veimataqali.

Ko cei vei ira me na tukuna rawa na ka oqo,

ka tukuna mai vei keda na ka ni gauna eliu?

Me ra kauti ira mai na nodra dauvakadinadina, me ra vakadonui kina,

se me ra rogoca, ka vakadinadina kina.

10Sa kaya ko Jiova, “Sai kemudou na noqui vakadinadina,

kei na noqu tamata ka'u sa digitaka,

mo dou sa kunea ka vakadinati au,

ka kila ni sai au ko Koya.

Sa sega na kalou ka buli eliu ka muri koi au,

ka na sega e dua me na taravi au.

11Koi au, io koi au ga ko Jiova,

ka sa sega tale nai Vakabula, koi au ga.

12Koi au ka'u a tukuna, ka ia na veivakabulai, ka vakatakila,

ni sa sega vei kemudou na kalou tani;

ia sai kemudou ga dou na tukuni au ni'u sa Kalou,” sa kaya ko Jiova.

13“Io, mai na gauna oqo, sai au ga;

ka sa sega e dua me vakabula rawa mai na ligaqu;

au na cakacaka tiko, ia ko cei me na vakadaroya?”

Na Dro Tani mai Papiloni

14Sa kaya vakaoqo ko Jiova,

na nomudou i Vakabula, na Yalosavasava ni Isireli:

“E na vukumudou ka'u a talaki ki Papiloni,

ka vakauti ira kece sara ga era sa dro;

io kei ira na kai Kalitia, era daukaila e na waqa.

15Koi au ko Jiova, na nomudou Kalou Yalosavasava,

o koya ka Buli ira na Isireli, ka'u sa nomudou Tui.”

16Sa kaya vakaoqo ko Jiova,

ko koya sa cakava na sala e na wasawasa,

kei na salatu e na wasa titobu,

17ko koya sa kauta mai na qiqi-ni-valu kei na ose,

na mataivalu kei na qaqa;

era na koto sobu vata, era na sega ni tucake tale;

era sa suibokoci, era sa bokoci me vaka na wa ni cina:

18Dou kakua ni vakananuma na ka makawa,

se vakasamataka na ka eliu.

19Raica, ka'u na cakava e dua na ka vou;

ena tubu ga oqo, dou sa sega beka ni kila?

Io, ka'u na cakava na sala e loma ni vanua lala,

kei na veiuciwai e na vanua dravuisiga.

20Ena dokai au na manumanu kila,

kei na gata lelevu kei na ositeriji;

ka ni'u sa solia na wai mai na vanua lala,

kei na uciwai mai na vanua dravuisiga,

me'u vagunuvi ira na noqu tamata, ka'u a digitaka,

21ko ira na tamata ka'u sa bulia me noqu

me ra na tukuna kina na noqu vinaka sara.

Nai Valavala Ca nei Isireli

22“Ia ko a sega ni masuti au, Jekope;

ko sa oca ni qaravi au, Isireli!

23Ko sa sega ni kauta mai vei au na sipi me nomu i soro kama;

ko sa sega talega ni vakarokorokotaki au e na nomuni madrali.

Au a sega ni lavaka vei iko mo ia na vakacaboisoro,

se vakaogaogataki e na drega me vakamai.

24Ko sa sega ni volia na noqu kalamosi e nai lavo,

ko sa sega talega ni vakamamautaki au e na uro ni nomu i soro.

Ia ko sa bitaki au ga e na nomu i valavala ca,

ka vakaocataki au e na nomu caka cala.

25“Koi au, io koi au ga,

ka'u sa buluta na nomu talaidredre e na vukuqu,

ka'u na sega ni nanuma tiko na nomu i valavala ca.

26Mo vakananumi au, me daru ia na veilewai;

mo tukuni iko mai, mo vakadonui kina.

27Sa caka cala na tamamu ka liu,

ka ra sa talaidredre vei au ko ira talega na nomu i vakavuvuli.

28O koya oqo ka'u sa vakacacani ira kina na turaga ni vale tabu,

ka soli ira na Jekope me cudruvi,

kei ira na Isireli me vakarogocataki.”