Tiko mai na Lekutu 14 - Ai Vola Tabu (Vakadewa Makawa Vakavoutaki 2021)（FRV21）

Era sa Didi ka Vosa Kudrukudru na Tamata

1A ra sa tabalaka cake na domodra ka qoqolou nai soqosoqo taucoko; a ra sa tagi na tamata e na bogi ko ya.

2A ra sa didivaki Mosese kei Eroni ko ira kecega na Isireli. A ra sa kaya vei rau nai soqosoqo taucoko, “Ulei, na Kalou! E ca ni da a sega ni ciba mai na vanua ko Ijipita! Ulei, na Kalou, sa ca ni da a sega ni ciba e na vanua lala oqo!

3Ia ka cava sa kauti keda mai kina ko Jiova ki na vanua oqo, me da bale kina e nai seleiwau? Era na vakabobulataki na watida kei na luveda. Sa sega li ni vinaka cake me da lesu tale ki Ijipita?”

4A ra sa veikayaka vakai ira, “Tou lesia mada e dua me liutaki keda ka lesu tale ki Ijipita.”

5Erau a qai cuva vakatoboicu ko Mosese kei Eroni e na matadra taucoko nai soqosoqo ni Isireli.

6Ia ko Josua na luve i Nuni kei Kelepi na luve i Jifune, e rua mai vei ira na rai vanua, erau a qai dresulaka na nodrau i sulu.

7A rau sa vosa vei ira nai soqosoqo taucoko ni Isireli, ka kaya, “Na vanua keitou a lakova me keitou raica vakavinaka, sa vanua vinaka vakaidina.

8Kevaka sa rekitaki keda ko Jiova, ena kauti keda ki na vanua ko ya, ka solia vei keda; a vanua sa dave kina na sucu kei na oni.

9Ipe 3.16Ia ni kakua ni talaidredre vei Jiova, ni kakua talega ni rerevaki ira na lewe-ni-vanua, ni ra sa vaka na madrai vei keda. Sa lako tani vei ira na nodra kaukauwa, ka sa tiko kei keda ko Jiova; ni kakua ni rerevaki ira.”

10Ia nai soqosoqo taucoko era kaya me vakaviriki rau e na vatu.

Ia sa rairai mai e na vale ni veitavaki na serau i Jiova vei ira kecega na Isireli.

11A sa kaya vei Mosese ko Jiova, “A cava tale na kena dede me ra vakacudrui au tiko kina na kawa tamata oqo? Ia na gauna cava era na vakabauti au kina, e na vuku ni vakatakilakila kecega ka'u sa cakava oti e na kedra maliwa?

12Au na yaviti ira e na mate levu, ka vakuai ira, ia ka'u na vakayacori iko mo matanitu e levu cake ka kaukauwa cake vei ira.”

Sa Masulaki Ira na Tamata ko Mosese

13 Lako 32.11-14 A sa kaya vei Jiova ko Mosese, “Era na qai rogoca ko ira na kai Ijipita, ni ko ni a kauti ira na tamata oqo mai na kedra maliwa e na nomuni kaukauwa levu,

14ka ra na tukuna ki na lewe-ni-vanua oqo. I Jiova, era sa rogoca oti ni kemuni sa tiko kei ira na tamata oqo; ka ni ra sa veiraici mata, i Jiova, kei kemuni; ni sa vakarurugi ira tiko talega na nomuni o; ka ni kemuni sa liutaki ira talega e na duru o e na siga kei na duru bukawaqa e na bogi.

15Ia kevaka ko ni sa vakamatei ira na tamata oqo me vaka era le dua ga na tamata, era na qai vosa ko ira na veimatanitu era sa rogoca na kemuni rogorogo, ka kaya,

16‘Sa sega ni kauti ira rawa na tamata oqo ko Jiova ki na vanua ka bubului kina vei ira, sa qai vakamatei ira kina ko koya e na vanua lala.’

17Ia oqo, me levu mada na kaukauwa ni noqu Turaga, me vaka na nomuni vosa, ni kemuni a kaya,

18 Lako 20.5,6; 34.6,7; Vrua 5.9-10; 7.9-10 ‘Ko Jiova sa berabera ni cudru,

ka sa levu na nona yalololoma,

a sa dauvosota nai valavala ca kei na talaidredre,

ia sa sega ga ni vakadonuya na tamata ca,

ka sa cudruvaka na nodra caka ca na qase vei ira na luvedra,

ka yacova nai katolu kei nai kava ni tabatamata.’

19Mo ni vosota mada na nodra caka ca na tamata oqo me vaka na kena levu ni nomuni yalololoma, ka me vaka kemuni sa sega talega ni cudruvi ira na tamata oqo ka vakatekivu mai Ijipita ka yacova na siga edaidai.”

20A sa kaya ko Jiova, “Au sa vosoti ira, me vaka na nomu vosa.

21Ipe 3.18Ia oqo—me vaka ni'u sa bula, ka me vaka ni sa roboti vuravura na serau i Jiova—

22ena sega sara ni dua vei ira na tamata oqo ka sa raica oti na noqu serau kei na noqu veivakatakilakila ka'u a kitaka mai Ijipita mai na vanua lala talega, ka sa vakatini na nodra vakatovolei au vakaca ka ra sega ni vakarorogo ki na noqu vosa,

23me ra na raica na vanua ka'u a bubului kina vei ira na nodra qase; ko ira kece talega era a vakacudrui au era na sega ni raica.

24Josua 14.9-12Ia ko Kelepi ga na noqu tamata, ni sa duatani na yalona, ka sa muri au tikoga, au na vakayacori koya ki na vanua ka lako kina ko koya, ka ra na taukena ko ira na nona kawa.

25Ia ko ira na Amalekaiti kei ira na kai Kenani era a tiko mai na vanua buca. Dou lesu yani e na mataka, ka lako ki na vanua lala e na sala ki na Wasa Damudamu.”

Veitotogitaki na Kalou e na Vuku ni Didi se Vosa Kudrukudru

26A sa vosa vei Mosese kei Eroni ko Jiova, ka kaya,

27“Me vakaevei na kena dede me'u vosoti ira nai soqosoqo ca oqo, era daudidi vei au? Au sa rogoca na nodra didivaki au ko ira na Isireli.

28Mo kaya vei ira, ‘Sa kaya ko Jiova: Me vaka na kena dina na noqu bula, au na kitaka vakaidina vei kemudou me vaka dou a kaya e na daligaqu:

29Ipe 3.17na yagomudou ena bale e na vanua lala oqo; ia koi kemudou kecega sa wili, me vaka na nomudou i wiliwili kecega, kemudou sa yabaki ruasagavulu ka levu cake, oi kemudou sa didi vei au,

30dou na sega sara ni yaco ki na vanua ka'u dulaka kina na ligaqu me'u vakatikori kemudou kina, ko Kelepi ga na luve i Jifune, kei Josua na luve i Nuni.

31Ia ko ira ga na nomudou lalai, dou a kaya era na vakabobulataki, au na vakayacori ira kina, a ra na kila na vanua dou a beca.

32Ia koi kemudou, ena bale na yagomudou e na vanua lala oqo.

33Caka 7.36Ia ko ira na luvemudou, era na lako voli e na vanua lala ka yabaki vasagavulu, ka kana rarawa e na vuku ni nomudou lako vakatani, me mate mada na yagomudou e na vanua lala.

34Me vaka nai wiliwili ni siga dou a rai vanua kina, io na siga e vasagavulu, ena dua na yabaki me ka ni siga yadua, dou na cudruvi tiko e na vuku ni nomudou i valavala ca, io me vasagavulu na yabaki; ia dou na kila na noqu duatani vei kemudou.’

35Oi au ko Jiova, au sa vosataka, au na kitaka vakaidina na ka oqo ki nai soqosoqo ca taucoko oqo, era sa soqoni vata me veivorati kei au; e na vanua lala oqo era na oti kina, ia era na mate kina.”

36Ia ko iratou na tamata sa tala ko Mosese me raica na vanua, ko iratou ka lesu mai ka vakavuna na nodra didi vua ko ira nai soqosoqo taucoko e na vuku ni tukutuku cala me baleta na vanua ko ya—

37ko iratou na tamata ko ya ka kauta mai na ripote e sega ni vinaka—eratou a ciba e na mate levu e na mata i Jiova.

38Ia erau sa bula tikoga ko Josua na luve i Nuni kei Kelepi na luve i Jifune, mai vei ira na tamata ka la'ki raica na vanua.

Ai Matai ni Sasaga me Rawai ko Kenani(Vakarua 1.41-46)

39Ni sa tukuna na vosa oqo ko Mosese vei ira kece na Isireli, a ra sa tagi vakalevu na tamata.

40A ra sa sou e na mataka caca, ka cabe ki dela ni ulunivanua, ka kaya, “Raica, koi keimami oqo. Keimami na lako cake ki na vanua sa yalataka ko Jiova, ni keimami sa kitaka na ka ca.”

41Ia sa kaya ko Mosese, “A cava ko ni sa talaidredre kina ki nai vakaro i Jiova, ni na sega ga ni yaco oqori?

42Mo ni kakua ni lako cake, ni sa sega ni tiko kei kemuni ko Jiova; mo ni kakua kina ni yaviti e na matadra na nomuni meca.

43Ni ra sa tiko mai kina e na matamuni na Amalekaiti kei na kai Kenani, ia kemuni na bale e nai seleiwau. Ni kemuni sa vuki tani mai vei Jiova, ena sega kina ni tiko kei kemuni ko Jiova.”

44Ia era sa doudou ga me cabe ki dela ni ulunivanua, ka dina ga ni ko Mosese kei na kato ni veiyalayalati i Jiova sa sega ni lako tani mai na loma ni tikotiko.

45Era sa qai lako sobu na Amalekaiti kei na kai Kenani era tiko e na ulunivanua ko ya, ka yaviti ira, ka vakacemuri ira ka yaco ki Orima.