1A sa kaya vei ira kecega na Isireli ko Samuela, “Raica, ka'u sa vakarorogo vei kemuni e na ka kecega ko ni a vosa kina vei au, ia ka'u sa lesia vei kemuni e dua na tui.
2Ka raica, sa qai lako voli e matamuni na tui; ia koi au, ka'u sa qase ka sika mai; ka raica, na luvequ, eratou sa tiko kei kemuni. Ia ka'u a lako voli e na matamuni ni'u a gone ka yacova na siga oqo.
3Au sa tiko oqo; ni tukuni au e na mata i Jiova, kei na matana sa lumuta oti ko koya. A bulumakau i cei ka'u sa kovea? Se na asa i cei ka'u sa kovea? Ia ko cei ka'u sa lawakitaka? Ko cei ka'u sa vakasaurarataka? Se ko cei ka'u sa taura mai vua nai solisoli ni veivaqumi me mataboko kina na mataqu? Ia ka'u na qai vakasuka kivei kemuni.”
4A ra sa kaya, “Ko sa sega ni lawakitaki keimami, se vakasaurarataki keimami, ko sa sega talega ni taura e dua na ka mai vua e dua na tamata.”
5A sa kaya vei ira ko koya, “Sai vakadinadina ga vei kemuni ko Jiova, ka sai vakadinadina edaidai oqo na nonai lumuti, ni kemuni sa sega ni kunea e dua na ka e ligaqu.” A ra sa kaya, “Sa kenai vakadinadina ko koya.”
6 Lako 6.26 A sa kaya vei ira na tamata ko Samuela, “Ko Jiova sa kenai vakadinadina, o koya sa lesi Mosese kei Eroni, ka kauti ira cake na nomuni qase mai na vanua ko Ijipita.
7Ia mo ni tu mada ga vakadua me'u vosa vakadodonu vei kemuni e na mata i Jiova e na vuku ni cakacaka dodonu kecega i Jiova, sa cakava ko koya vei kemuni kei ira na nomuni qase eliu.
8Lako 2.23Ni sa lako mai ki Ijipita ko Jekope, ka sa tagi vei Jiova ko ira na nomuni qase, sa qai talai Mosese kei Eroni ko Jiova, a rau sa kauti ira tani na nomuni qase mai Ijipita, ka vakaitaukeitaki ira e na vanua oqo.
9Dvei 3.12; 4.2; 13.1Ia era sa guilecavi Jiova ga na nodra Kalou. Ka sa volitaki ira ko koya ki na liga i Sisera, na kavetani ni valu nei Asori, kei na ligadra na kai Filisitia, kei na ligana na tui Moapi; ka ra sa veivala kei ira.
10Dvei 10.10-15A ra sa tagi vei Jiova, ka kaya, ‘Keimami sai valavala ca, ni keimami sa biuti Jiova, ka qaravi ira na Peali kei na Aseteroci. Ia oqo, mo ni vakabulai keimami mai na ligadra na neimami meca, ka keimami na qai qaravi kemuni.’
111Samu 3.20; Dvei 4.6; 7.1; 11.29A sa talai Jerupeali ko Jiova, kei Baraki, kei Jefica, kei Samuela, ka vakabulai kemuni mai na ligadra na nomuni meca era sa tiko vakavolivoliti kemuni, ia kemuni sa tiko vakacegu.
121Samu 8.19Ia ni kemuni a raica ni sa lako cake me vala kei kemuni ko Neasi na nodra tui na luve i Amoni, kemuni a kaya vei au, ‘E segai, me lewai keda ga e dua na tui’, ia ka sa nomuni tui tiko ko Jiova na nomuni Kalou.
13Ia mo ni raica mada oqo na tui kemuni a digitaka, o koya ko ni a kerea! Ia raica, sa lesia vei kemuni ko Jiova e dua na tui.
14Kevaka ko ni na rerevaki Jiova, ka qaravi koya, ka vakarorogo ki na nona vosa, ka sega ni talaidredre ki nai vakaro i Jiova, ka sa muri Jiova na nomuni Kalou, oi kemuni kei koya talega na tui sa lewai kemuni, sa na qai vinaka.
15Ia kevaka kemuni na sega ni vakarorogo ki na vosa i Jiova, ka sa talaidredre ga ki nai vakaro i Jiova, ena qai veisaqasaqa kei kemuni na liga i Jiova ka vakakina na nomuni tui.
16Ia oqo, mo ni tu vakadua mada ka raica na ka levu oqo ena cakava e matamuni ko Jiova.
17Sa sega li ni gauna ni tamusuki witi edaidai? Au na masu vei Jiova, me solia ko koya na kurukuru kei na uca; mo ni kila kina ka raica ni sa ka levu na nomuni valavala ca, ko ni sa cakava e na mata i Jiova ni kemuni a kerea me dua na nomuni tui.”
18A sa masu vei Jiova ko Samuela, ka sa solia ko Jiova na kurukuru kei na uca e na siga ko ya; a ra sa rerevaki Jiova vakalevu kei Samuela talega ko ira kecega na tamata.
19A ra sa kaya vei Samuela ko ira kecega na tamata, “Mo masulaki keimami na nomu tamata vei Jiova na nomu Kalou, me keimami kakua ni mate, ni keimami sa kuria na neimami valavala ca kecega e na ca oqo, ni keimami sa kerea e dua na neimami tui.”
20A sa kaya ko Samuela vei ira na tamata, “Ni kakua ni rere; ko ni sa cakava oti na ka ca oqo. Ia ni kakua ga ni vuki tani mo ni kua kina ni muri Jiova, ia mo ni qaravi Jiova ga e na yalomuni taucoko;
21ia mo ni kakua ni vuki lesu tale, mo ni muria kina na ka wale, na ka e sega ni yaga ka sega ni veivakabulai, ni sa ka wale na veika oqori.
22Ni na sega ni laivi ira na nona tamata ko Jiova, e na vuku ni yacana cecere; ni sa vinakata ko Jiova me qisi kemuni mo ni nona tamata.
23Ia koi au, me'u kakua sara ni cala vei Jiova ni ka'u sa cegu ni masulaki kemuni, ia ka'u na vakavulici kemuni e nai valavala vinaka ka dodonu.
24Ni rerevaki Jiova ga, ka qaravi koya vakaidina e na yalomuni taucoko, ka mo ni nanuma na veika cecere sa vakayacora vei kemuni ko koya.
25Ia kevaka ko ni na ia tikoga nai valavala ca, ko ni na vakarusai, koi kemuni vata kei na nomuni tui.”
Who We AreWhat We EelieveWhat We Do
2025 by iamachristian.org,Inc All rights reserved.
