Dauveilewai 17 - Ai Vola Tabu (Vakadewa Makawa Vakavoutaki 2021)（FRV21）

Ko Maika kei Koya na Livai

1Sa dua na tamata mai na vanua veiulunivanua ko Ifereimi na yacana ko Maika.

2A sa kaya vua na tinana ko koya, “Na tiki ni siliva e dua na udolu ka dua na drau ka sa kau tani mai vei iko, na ka ko a vosa vakacudrucudru kina, ka vosataka talega kina vei au, raica, sa tu vei au na siliva; sai au ga ka kauta.” Ka sa kaya ko tinana, “Me vakalougatataki na luvequ mai vei Jiova.”

3A sa qai vakasuka ko koya vei tinana na tiki ni siliva e dua na udolu ka dua na drau. Ka sa kaya ko tinana, “Au sa vakacabora oti vakaidina na siliva vei Jiova mai na ligaqu me nei luvequ, me caka kina e dua na matakau ceuceu ka dua na matakau kaukamea. Ia oqo, au na vakasuka tale vei iko.”

4Ia ni sa vakasuka ko koya na siliva vua na tinana, sa taura ko tinana e rua na drau na tiki ni siliva, ka solia vua na kena matai, ka sa cakava kina ko koya e dua na matakau ceuceu kei na dua na matakau kaukamea. A sa la'ki tu ga e na vale i Maika.

5A sa dua na nona burekalou na tamata oqo ko Maika, ka sa cakava ko koya e dua na efoti kei na so na matakau, ka sa bulia e dua na luvena me nona bete.

6Dvei 21.25E na gauna ko ya sa sega na tui vei ira na Isireli; era sa dui cakava ga ko ira na tamata yadua na ka sa vinakata ko koya.

7A sa dua na cauravou mai Peceliema e Juta, e na yavusa i Juta; e dua vei ira na Livai ko koya, ka sa tiko vulagi mai kea.

8A sa lako na tamata ko ya mai na koro ko Peceliema mai Juta me la'ki tiko vulagi e na dua na vanua ena kunea. Ia ni sa lako tu, sa yaco ki na vanua veiulunivanua ko Ifereimi, ki na vale i Maika.

9A sa kaya vua ko Maika, “O sa lako mai vei?” A sa kaya vua ko koya, “Koi au na Livai mai Peceliema e Juta, ia ka'u sa lako tu me'u tiko vulagi e na dua na vanua ka'u na kunea.”

10A sa kaya vua ko Maika, “Mo tiko ga kei au, mo tamaqu ka mo noqu bete, ia ka'u na solia vei iko e tini na tiki ni siliva e na veiyabaki, kei nai sulu me rauti iko, kei na kemu.” A sa curu ki loma na Livai.

11A sa vinakata na Livai me tiko vata kei koya, ka sa vaka e dua na luvena ko koya na cauravou.

12A sa buli koya na Livai ko Maika, ka sa yaco na cauravou me nona bete, ka sa tiko e na vale i Maika.

13Sa qai kaya ko Maika, “Au sa qai kila, ni na caka vinaka vei au ko Jiova, ni sa noqu bete e dua na Livai.”